AKP ប៉េកាំង ថ្ងៃទី០៨ ខែមីនា ឆ្នាំ២០២៦ -- នៅក្នុងសន្និសីទសារព័ត៌មានមួយនាព្រឹកនៅថ្ងៃទី០៨ ខែមីនា ឆ្នាំ២០២៦ នេះ សមាជិកការិយាល័យនយោបាយនៃគណៈកម្មាធិការកណ្តាល CPC និងជារដ្ឋមន្ត្រីការបរទេសលោក វ៉ាង យី (Wang Yi) បានពន្យល់លម្អិតអំពីការរំពឹងទុកនៃការធ្វើជាម្ចាស់ផ្ទះនៃកិច្ចប្រជុំមេដឹកនាំសេដ្ឋកិច្ច APEC​ ដោយលោកបាននិយាយថាឆ្នាំនេះ គឺជាឆ្នាំ APEC ចិន។ យើងនឹងធ្វើជាម្ចាស់ផ្ទះនៃកិច្ចប្រជុំ APEC ជាលើកទីបី​ ដោយកាលពីលើកទីមួយធ្វើនៅទីសៀងហៃក្នុងឆ្នាំ២០០១ ហើយលើកទីពីរនៅទីក្រុងប៉េកាំងក្នុងឆ្នាំ២០១៤ រហូតមកដល់ពេលនេះ លើកទីបីនៅទីក្រុងសិនជិននៅក្នុងឆ្នាំនេះ។ APEC ក្នុងរយៈពេល ២៥ឆ្នាំកន្លងមកនេះបានជួបប្រទះនឹងការឡើងចុះក្នុងកិច្ចសហប្រតិបត្តិការក្នុងតំបន់ និងបានឃើញពីការប្តេជ្ញាចិត្តដ៏រឹងមាំរបស់ប្រទេសចិនក្នុងការរីកចម្រើនរួមគ្នាជាមួយតំបន់អាស៊ីប៉ាស៊ីហ្វិក។

លោក វ៉ាង យី បានចង្អុលបង្ហាញថា ដើម្បីធ្វើជាម្ចាស់ផ្ទះដ៏ល្អ ប្រទេសចិននឹងផ្តោតលើគោលបំណងស្នូលមួយពេញមួយឆ្នាំ ពោលគឺការបកប្រែគោលដៅនៃការកសាងសហគមន៍អាស៊ីប៉ាស៊ីហ្វិកទៅជាសកម្មភាព និងប្រែក្លាយផែនការរបស់ខ្លួនទៅជាការពិត បន្ទាប់ពីរាប់ទសវត្សរ៍បានកន្លងផុតទៅចាប់តាំងពីគំនិតនៃសហគមន៍អាស៊ីប៉ាស៊ីហ្វិកត្រូវបានដាក់ចេញជាលើកដំបូង។

លោកបានបន្ថែមថា គំនិតនេះមិនត្រូវស្ថិតនៅលើតែក្រដាស ឬគ្រាន់តែជាចក្ខុវិស័យនោះទេ។ យើងសង្ឃឹមថានឹងរកឃើញចម្លើយនៅទីក្រុងសិនជិន ដែលផ្តល់នូវការឯកភាពគ្នាយ៉ាងទូលំទូលាយ អាទិភាពច្បាស់លាស់ និងជំហានដែលអាចអនុវត្តបាន ដើម្បីឱ្យប្រជាជននៅក្នុងតំបន់អាចភ្ជាប់ទំនាក់ទំនងជាមួយ និងធ្វើសកម្មភាពក្នុងការកសាងសហគមន៍អាស៊ីប៉ាស៊ីហ្វិក។

លោក វ៉ា​ង យី បានកត់សម្គាល់ថា តាមរយៈការទំនាក់ទំនងយ៉ាងស៊ីជម្រៅជាមួយភាគីទាំងអស់ យើងបានសម្រេចចិត្តលើប្រធានបទ APEC ឆ្នាំនេះ គឺ «ការកសាងសហគមន៍អាស៊ីប៉ាស៊ីហ្វិកដើម្បីរីកចម្រើនជាមួយគ្នា»។ APEC Shenzhen នឹងផ្តោតទៅលើអាទិភាពទាំងបី គឺ ភាពបើកចំហ នវានុវត្តន៍ និងកិច្ចសហប្រតិបត្តិការ ហើយម្តងទៀត នឹងកំណត់ទិសដៅ និងប្រមូលផ្តុំចំណុចខ្លាំងសម្រាប់កិច្ចសហប្រតិបត្តិការអាស៊ីប៉ាស៊ីហ្វិកនៅចំណុចប្រសព្វមួយ។ យើងនឹងសាងសង់សសរស្តម្ភសំខាន់ៗនៃសហគមន៍អាស៊ីប៉ាស៊ីហ្វិក តម្រឹមផ្លូវផ្សេងៗគ្នាឆ្ពោះទៅរកតំបន់ពាណិជ្ជកម្មសេរីនៃតំបន់អាស៊ីប៉ាស៊ីហ្វិក ធ្វើការរៀបចំសមស្របសម្រាប់ការតភ្ជាប់តំបន់និងលើកកម្ពស់យ៉ាងសកម្មនូវការផ្លាស់ប្តូរឆ្ពោះទៅរកការអភិវឌ្ឍឌីជីថលឆ្លាតវៃ និងបៃតង។ ពេញមួយឆ្នាំ ភាគីចិននឹងធ្វើជាម្ចាស់ផ្ទះព្រឹត្តិការណ៍ជាង៣០០ នៅក្នុងទីក្រុងនានាទូទាំងប្រទេស ដោយមានការចូលរួមពីបណ្តាខេត្ត និងទីក្រុងជាច្រើនរបស់ចិន។ សេដ្ឋកិច្ចសមាជិក APEC ទាំងអស់នឹងមានឱកាសចូលរួមចំណែក។

លោក វ៉ាង យី បានចង្អុលបង្ហាញថា សិនជិន គឺជាបង្អួចដ៏សំខាន់មួយ​ ស្តីពីកំណែទម្រង់ និងការបើកចំហរបស់ប្រទេសចិន ដែលជាការបង្ហាញដ៏អស្ចារ្យនៃសង្គមនិយមដែលមានលក្ខណៈចិន និងជាព្រំដែននៃនវានុវត្តន៍នៅក្នុងតំបន់ឈូងសមុទ្រក្វាងទុង-ហុងកុង-ម៉ាកាវ។ យើងត្រៀមខ្លួនរួចជាស្រេចដើម្បីធ្វើការជាមួយភាគីទាំងអស់ ដើម្បីលើកកម្ពស់ការចាប់ផ្តើមឡើងវិញពី APEC Shenzhen ឆ្ពោះទៅរកគោលដៅនៃសហគមន៍អាស៊ីប៉ាស៊ីហ្វិក៕

ដោយ៖ យា ចិន្ដាខន្ដី (រូបភាព៖ ស៊ីនហួ)