AKP ភ្នំពេញ ថ្ងៃទី ២១ ខែមេសា ឆ្នាំ ២០២៦--វិទ្យាស្ថានសេដ្ឋកិច្ចនិងហិរញ្ញវត្ថុបបានចាប់ផ្ដើមដំណើរការថ្នាក់សិក្សា នៃកម្មវិធីបណ្ដុះបណ្ដាលជំនាញបច្ចេកទេស កម្រិតវិញ្ញាបនបត្រ ផ្សារភ្ជាប់មុខ តំណែងដល់សិក្ខាកាមជាមន្ត្រីអនុវត្តការងារហិរញ្ញវត្ថុសាធារណៈ នៃអង្គភាពថវិកាអាណាបកផ្ទេរសិទ្ធិពេញលេញ នៃក្រសួងសេដ្ឋកិច្ចនិងហិរញ្ញវត្ថុ ក្រសួងស្ថាប័ន រួមទាំងមន្ទីរជំនាញ សរុប ៥០៦ នាក់ (ស្រី ២១៥ នាក់) ។ 

បើតាមការឱ្យដឹងពីវិទ្យាស្ថានសេដ្ឋកិច្ច និងហិរញ្ញវត្ថុ ចាប់ពីថ្ងៃទី ២០ខែមេសា ឆ្នាំ២០២៦តទៅ វគ្គសិក្សាចូលរៀនលើកទី១ នេះ មាន ៣ កម្រិត គឺ កម្រិតទី១, ទី២ និង ទី៣ លើជំនាញបច្ចេកទេសចំនួន ៣ គឺ ជំនាញគ្រប់គ្រងថវិកា, ជំនាញលទ្ធកម្មសាធារណៈ និង ជំនាញគណនេយ្យសាធារណៈ ផ្នែករជ្ជទេយ្យបុរេប្រទាន ហើយការចូលរៀនលើកទី១ មាន ២ ក្រុម គឺ ក្រុមទី១ សិក្សាថ្ងៃ ចន្ទ-ពុធ-សុក្រ និង ក្រុមទី២ សិក្សាថ្ងៃ អង្គារ-ព្រហស្បតិ៍។

សូមគូសបញ្ជាក់ថា វគ្គបណ្ដុះបណ្ដាលជំនាញបច្ចេកទេស កម្រិតវិញ្ញាបនបត្រផ្សារភ្ជាប់មុខតំណែង ឆ្នាំ ២០២៦ នេះ ផ្តោតលើ ៥ ជំនាញ គឺៈ (១). គ្រប់គ្រងថវិកា, (២).លទ្ធកម្មសាធារណៈ, (៣). គណនេយ្យសាធារណៈ ផ្នែករជ្ជទេយ្យបុរេប្រទាន, (៤). គណនេយ្យសាធារណៈ ផ្នែករជ្ជទេយ្យចំណូល, និង (៥). គ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ, ដែលមាន កម្រិតទី១, កម្រិតទី២, និង កម្រិតទី៣ នៃកម្រិតគុណវុឌ្ឍិវិជ្ជាជីវៈជំនាញហិរញ្ញវត្ថុសាធារណៈ សម្រាប់សិក្ខាកាមគោលដៅជាមន្ត្រីអនុវត្តការងារហិរញ្ញវត្ថុសាធា រណៈ សរុប ២០០០ នាក់ ។

 វគ្គបណ្ដុះបណ្ដាលនេះ នឹងបង្រៀនដោយឧទ្ទេសាចារ្យរបស់វិទ្យាស្ថានសេដ្ឋកិច្ចនិងហិរញ្ញវត្ថុ និង សាកលវិទ្យាល័យសេដ្ឋ កិច្ចនិងហិរញ្ញវត្ថុ រួមនឹងការធ្វើបទឧទ្ទេសបច្ចេកទេស ចែករំលែកចំណេះដឹង និង បទពិសោធលើការអ នុវត្តជាក់ស្តែង តាមជំនាញនីមួយៗ ដោយឧទ្ទេសាចារ្យ និង វាគ្មិន មកពីអគ្គលេខា ធិការដ្ឋាន អគ្គនាយកដ្ឋាន និង អង្គភាពជំនាញពាក់ព័ន្ធ នៃក្រសួង សេដ្ឋកិច្ចនិងហិរញ្ញវត្ថុ ។

សូមរំលឹកជូនថា វគ្គបណ្ដុះបណ្ដាលជំនាញបច្ចេកទេសនេះ ត្រូវបានរៀប ចំឡើងក្នុងគោលបំណង ដើម្បីលើក  កម្ពស់ប្រសិទ្ធភាពការងារ និង ដើម្បីកសាងគុណវុឌ្ឍិវិជ្ជាជីវៈជំនាញហិរញ្ញវត្ថុសាធារណៈ របស់មន្ត្រីអនុវត្តការងារហិរញ្ញវត្ថុសាធារណៈ ស្របតាមមាត្រា១៤ នៃច្បាប់ស្ដីពី ហិរញ្ញវត្ថុសាធារណៈ និង អនុក្រឹត្យលេខ ៤៥ អនុក្រ.បក ចុះថ្ងៃទី១១ ខែមីនា ឆ្នាំ២០២៤ ស្ដីពី គុណវុឌ្ឍិវិជ្ជាជីវៈជំនាញហិរញ្ញវត្ថុសាធារណៈ ព្រមទាំងដើម្បីចូលរួមអនុវត្តកម្មវិធីនយោបាយនីតិកាលទី៧ នៃរដ្ឋសភា និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល៕

ដោយ ៖ទូច វលក្ខ័ណ ,ប្រភព៖វិទ្យាស្ថានសេដ្ឋកិច្ចនិងហិរញ្ញវត្ថុ