AKP ប៉េកាំង ថ្ងៃទី០៨ ខែមីនា ឆ្នាំ២០២៦ -- នៅក្នុងសន្និសីទសារព័ត៌មាននៅថ្ងៃទី០៨ ខែមីនា ឆ្នាំ២០២៦ នេះ សមាជិកការិយាល័យនយោបាយនៃគណៈកម្មាធិការកណ្តាល CPC និងជារដ្ឋមន្ត្រីការបរទេស លោក វ៉ាង យី (Wang Yi) បាននិយាយអំពីទំនាក់ទំនងចិន-រុស្ស៊ី ដោយលោកបានចង្អុលបង្ហាញថា ឆ្នាំនេះ គឺជាខួបលើកទី៣០ នៃភាពជាដៃគូយុទ្ធសាស្ត្រសម្របសម្រួលចិន-រុស្ស៊ី និងខួបលើកទី២៥ នៃសន្ធិសញ្ញាអ្នកជិតខាងល្អ និងសហប្រតិបត្តិការមិត្តភាពចិន-រុស្ស៊ី។ នៅក្នុងពិភពលោកដែលមានភាពប្រែប្រួល និងច្របូកច្របល់ ទំនាក់ទំនងចិន-រុស្ស៊ីបានឈរយ៉ាងរឹងមាំប្រឆាំងនឹងឧបសគ្គទាំងអស់។ លោកបាននិយាយថា «ខ្ញុំគិតថា ហេតុផលចម្បងគឺថាភាពជាដៃគូយុទ្ធសាស្ត្រសម្របសម្រួលចិន-រុស្ស៊ីត្រូវបានផ្អែកលើសមភាពការគោរព និងផលប្រយោជន៍ទៅវិញទៅមកចាប់តាំងពីថ្ងៃដំបូង។ វាតំណាងឱ្យទិសដៅនៃទំនាក់ទំនងប្រទេសធំៗប្រភេទថ្មី»។

លោក វ៉ាង ​យី បានកត់សម្គាល់ថា ចិន និងរុស្ស៊ីមានឯករាជ្យភាពជាយុទ្ធសាស្ត្រ។ យើងតែងតែគោរពផលប្រយោជន៍ស្នូលរបស់គ្នាទៅវិញទៅមក មិនដាក់ឆន្ទៈ ឬរបៀបវារៈរបស់គ្នាទៅវិញទៅមក ហើយប្រកាន់ខ្ជាប់នូវគោលការណ៍មិនចងសម្ព័ន្ធភាព មិនប្រឈមមុខដាក់គ្នា និងមិនកំណត់គោលដៅភាគីទីបីណាមួយឡើយ។

ចិន និងរុស្ស៊ីចែករំលែកកម្រិតខ្ពស់នៃការជឿទុកចិត្តគ្នាទៅវិញទៅមកខាងនយោបាយ។ ការធ្វើការរួមគ្នាជាចំណុចស្នូលនៃទំនាក់ទំនងនេះ។ ហើយភាពធន់ជាយុទ្ធសាស្ត្រដ៏រឹងមាំអនុញ្ញាតឱ្យវាទប់ទល់នឹងការញុះញង់ ឬសម្ពាធពីខាងក្រៅណាមួយ។

លោកបានបញ្ជាក់ថា ប្រទេសចិន និងរុស្ស៊ីធ្វើសកម្មភាពសម្របសម្រួលយ៉ាងជិតស្និទ្ធ។ នៅក្នុងកិច្ចការអន្តរជាតិ និងតំបន់សំខាន់ៗប្រទេសចិន និងរុស្ស៊ីចែករំលែកការឯកភាពគ្នាជាយុទ្ធសាស្ត្រទូលំទូលាយបំផុត និងការសម្របសម្រួលជាយុទ្ធសាស្ត្រជិតស្និទ្ធបំផុត រួមទាំងការការពារច្បាប់ និងសណ្តាប់ធ្នាប់អន្តរជាតិ។

លោក វ៉ាង យី បាននិយាយថា សណ្តាប់ធ្នាប់អន្តរជាតិក្រោយសង្គ្រាមលោកលើកទី២ បានឈានដល់ចំណុចសំខាន់ម្តងទៀត។ កាលពីឆ្នាំមុន ប្រមុខរដ្ឋនៃប្រទេសចិន និងរុស្ស៊ីបានចូលរួមពិធីរំលឹកជ័យជម្នះនៃសង្គ្រាមប្រឆាំងហ្វាស៊ីសនៅក្នុងប្រទេសរបស់គ្នាទៅវិញទៅមក ហើយបានចេញសេចក្តីថ្លែងការណ៍រួមសំខាន់ៗចំនួនបី ស្តីពីការពង្រឹងការសម្របសម្រួលជាយុទ្ធសាស្ត្រដ៏ទូលំទូលាយ ការពង្រឹងស្ថិរភាពជាយុទ្ធសាស្ត្រសកលលោក និងការរក្សាសិទ្ធិអំណាចនៃច្បាប់អន្តរជាតិ ដែលនេះជាការផ្ញើសារយ៉ាងច្បាស់លាស់មួយទៅកាន់ពិភពលោកអំពីការគាំទ្រយ៉ាងម៉ឺងម៉ាត់នូវទស្សនៈត្រឹមត្រូវនៃប្រវត្តិសាស្ត្រលើសង្គ្រាមលោកលើកទី២ ការការពារផ្លែផ្កានៃជ័យជម្នះនៃសង្គ្រាម និងការប្រឆាំងនឹងសកម្មភាពគំរាមកំហែងឯកតោភាគី។ កាលពី ៨០ឆ្នាំមុន ប្រទេសចិន និងរុស្ស៊ីបានរួមចំណែករួមគ្នាក្នុងការកសាងសណ្តាប់ធ្នាប់ក្រោយសង្គ្រាម។ ថ្ងៃនេះ ៨០ឆ្នាំក្រោយប្រទេសចិន និងរុស្ស៊ីរួមគ្នានឹងបន្ថែមសន្ទុះដល់ការមកដល់នៃពិភពលោកពហុប៉ូល៕

ដោយ៖ យា ចិន្ដាខន្ដី (រូបភាព៖ ស៊ីនហួ