AKP ប៉េកាំង ថ្ងៃទី០៨ ខែមីនា ឆ្នាំ២០២៦ -- លោក ស៊ុន យេលី (Sun Yeli)រដ្ឋមន្ត្រីក្រសួងវប្បធម៌ និងទេសចរណ៍របស់ប្រទេសចិន បាននិយាយនៅក្នុងសន្និសីទសារព័ត៌មានមួយ ស្តីពីជីវភាពរស់នៅរបស់ប្រជាជនចិន ក្នុងអំឡុងពេលសម័យប្រជុំលើកទីបួននៃសមាជប្រជាជនជាតិលើកទី១៤ នៅទីក្រុងប៉េកាំងថា ចំនួនភ្ញៀវទេសចរបរទេសដែលមកទស្សនាប្រទេសចិនបានកើនឡើងយ៉ាងខ្លាំងនៅក្នុងឆ្នាំ២០២៥ ដោយការចំណាយកើនឡើង៤០% ពីមួយឆ្នាំទៅមួយឆ្នាំ។

លោកបាន​បន្ថែមថា ការធ្វើដំណើរទេសចរណ៍ចូលប្រទេសចិនមានលើសពី ១៥០លាននាក់កាលពីឆ្នាំមុន ដែលកើនឡើង ១៧% ពីមួយឆ្នាំទៅមួយឆ្នាំ ខណៈដែលការចំណាយមានលើសពី ១៣០ប៊ីលានដុល្លារអាម៉េរិក។ក្នុងចំណោមនោះ មានភ្ញៀវទេសចរបរទេសជាង ៣០លាននាក់បានចូលមកក្នុងប្រទេសចិនដោយមិនចាំបាច់មានទិដ្ឋាការ។

ប្រទេសចិនបន្តពង្រីកគោលនយោបាយឯកតោភាគីរបស់ខ្លួនដោយមិនចាំបាច់មានទិដ្ឋាការ ដែលឥឡូវនេះគ្របដណ្តប់លើប្រទេសចំនួន៥០។លោក ស៊ុន បាននិយាយថា «ការធ្វើដំណើរទេសចរណ៍ទៅកាន់ប្រទេសចិនបានក្លាយជារឿងប្រាកដនិយមណាស់»។

ការទូទាត់ប្រាក់តាមទូរស័ព្ទបានក្លាយជាផ្នែកមួយនៃបទពិសោធន៍ធ្វើដំណើររបស់ភ្ញៀវទេសចរបរទេស។ ការចំណាយតាមរយៈការទូទាត់តាមទូរស័ព្ទដោយភ្ញៀវទេសចរបរទេស បានឈានដល់ចំនួន ៨០ប៊ីលានយន់(១១ប៊ីលានដុល្លារអាម៉េរិក) ក្នុងឆ្នាំ២០២៥។

ប្រទេសចិនបានដាក់ចេញនូវវិធានការជាច្រើនដើម្បីសម្រួលដល់ការទូទាត់ និងការទិញទំនិញសម្រាប់ភ្ញៀវទេសចរបរទេស រួមទាំងការអនុញ្ញាតឱ្យកាតធនាគារអន្តរជាតិភ្ជាប់ទៅកម្មវិធីទូទាត់តាមទូរស័ព្ទក្នុងស្រុក អនុញ្ញាតឱ្យមានការប្រើប្រាស់កាបូបអេឡិចត្រូនិចនៅក្រៅប្រទេសនៅក្នុងប្រទេសចិន និងពង្រីកចំណុចប្តូរប្រាក់ និងចំណុចសងប្រាក់ពន្ធសម្រាប់អ្នកធ្វើដំណើរចាកចេញ។

ទន្ទឹមនឹងនេះ វិស័យទេសចរណ៍របស់ប្រទេសចិនក៏កំពុងរីកចម្រើនផងដែរ ដោយការធ្វើដំណើរក្នុងស្រុក និងការចំណាយពេញមួយឆ្នាំ២០២៥ និងក្នុងអំឡុងពេលវិស្សមកាលបុណ្យចូលឆ្នាំចិនកាលពីក្នុងខែកុម្ភៈ ឆ្នាំ២០២៦ កន្លងទៅនេះ បានឈានដល់កម្រិតខ្ពស់បំផុតមួយដែលមិនធ្លាប់មាន៕

ដោយ៖ យា ចិន្ដាខន្ដី (រូបភាព៖ ស៊ីនហួ)