AKP ភ្នំពេញ ថ្ងៃទី០៦ ខែមីនា ឆ្នាំ២០២៦ -- យោងតាមការប្រកាសរបស់ក្រសួងការបរទេសអេហ្ស៊ីប បានឱ្យដឹងថា រដ្ឋមន្ត្រីការបរទេសនៃប្រទេសអេហ្ស៊ីប អារ៉ាប៊ីសាអូឌីត អេមីរ៉ាតអារ៉ាប់រួម អូម៉ង់ និងស៊ីរី បានធ្វើកិច្ចពិគ្រោះយោបល់តាមទូរស័ព្ទដាច់ដោយឡែកពីគ្នា ដើម្បីព្រមានប្រឆាំងនឹងការពង្រីកភាពតានតឹងក្នុងតំបន់ដែលកំពុងបន្តកើតមាន បន្ទាប់ពីការវាយប្រហាររបស់សហរដ្ឋអាមេរិក-អ៊ីស្រាអែលលើអ៊ីរ៉ង់។

យោងតាមសេចក្តីថ្លែងការណ៍របស់ក្រសួងបានឱ្យដឹងថា ដោយសម្តែងការព្រួយបារម្ភយ៉ាងខ្លាំងចំពោះការកើនឡើងនៃយោធាធ្ងន់ធ្ងររដ្ឋមន្ត្រីទាំងនោះបានឯកភាពគ្នាថា ការពង្រីកជម្លោះនៅក្នុងតំបន់នេះ គឺជាការគំរាមកំហែងដោយផ្ទាល់ដល់សន្តិសុខ និងសន្តិភាពអន្តរជាតិ។

រដ្ឋមន្ត្រីការបរទេសអេហ្ស៊ីប លោក បាដឺ អាប់ដេឡាតទី (Badr Abdelatty) បានបញ្ជាក់ជាថ្មីនូវការគាំទ្រយ៉ាងពេញទំហឹងរបស់ទីក្រុងគែរចំពោះរដ្ឋអារ៉ាប់ក្នុងអំឡុងពេលនៃការសន្ទនាតាមទូរស័ព្ទរបស់លោកជាមួយសមភាគីរបស់លោក ដោយបដិសេធយ៉ាងម៉ឺងម៉ាត់ចំពោះការវាយប្រហារណាមួយដែលផ្តោតលើទឹកដីរបស់ពួកគេ។

លោក អាប់ដេឡាតទី បានសង្កត់ធ្ងន់ថា សន្តិសុខជាតិអារ៉ាប់គឺមិនអាចកាត់ផ្តាច់បាន ហើយបានបដិសេធលេសណាមួយដើម្បីបង្ហាញអំពីភាពត្រឹមត្រូវនៃការវាយប្រហារបែបនេះ ឬធ្វើឱ្យប៉ះពាល់ដល់អធិបតេយ្យភាពរបស់រដ្ឋទាំងនេះ។

រដ្ឋមន្ត្រីទាំងនោះបានព្រមព្រៀងគ្នាបន្តការពិគ្រោះយោបល់ និងការសម្របសម្រួលយ៉ាងជិតស្និទ្ធក្នុងរយៈពេលខាងមុខ ពង្រឹងការពិភាក្សាលើការរៀបចំតំបន់នាពេលអនាគត និងសង្កត់ធ្ងន់លើភាពចាំបាច់នៃសំឡេងអារ៉ាប់រួបរួមគ្នា ដើម្បីការពារផលប្រយោជន៍ និងធនធានរបស់អារ៉ាប់ ខណៈពេលដែលការពារសន្តិសុខ និងស្ថិរភាពក្នុងតំបន់។

ការផ្សព្វផ្សាយ​ផ្នែកការទូតនេះ ធ្វើឡើងបន្ទាប់ពីការវាយប្រហារទ្រង់ទ្រាយធំរវាងសហរដ្ឋអាមេរិក និងអ៊ីស្រាអែលទៅលើអ៊ីរ៉ង់ ដែលចាប់ផ្តើមកាលពីព្រឹកថ្ងៃសៅរ៍ និងការវាយប្រហារតបតជាបន្តបន្ទាប់របស់អ៊ីរ៉ង់ ដែលកំណត់គោលដៅលើទ្រព្យសម្បត្តិរបស់អ៊ីស្រាអែល និងសហរដ្ឋអាមេរិកនៅក្នុងតំបន់៕

ដោយ៖ មូល មិនា (ប្រភព៖ ភីបផលដេលី)