AKP ភ្នំពេញ ថ្ងៃទី១៣ ខែមករា ឆ្នាំ២០២៦ -- ការតវ៉ាប្រឆាំងរដ្ឋាភិបាលនៅក្នុងប្រទេសអ៊ីរ៉ង់បានចូលដល់សប្តាហ៍ទីបីហើយ ដោយការតវ៉ានេះបានរីករាលដាលពាសពេញប្រទេស ចំពេលដែលកំពុងមានវិបត្តិកាន់តែធ្ងន់ធ្ងរឡើង ដែលបង្កឡើងដោយការលំបាកផ្នែកសេដ្ឋកិច្ចកាន់តែធ្ងន់ធ្ងរ និងការធ្លាក់ចុះយ៉ាងខ្លាំងនៃរូបិយបណ្ណរៀលរបស់អ៊ីរ៉ង់។

អ្នកលក់ដូរជាច្រើនបានចូលរួមធ្វើការតវ៉ានៅទូទាំងប្រទេស ដោយបិទអាជីវកម្មរបស់ពួកគេ ដើម្បីឆ្លើយតបទៅនឹងស្ថានភាពសេដ្ឋកិច្ចដែលកាន់តែអាក្រក់ទៅៗ។

រដ្ឋមន្ត្រីការបរទេសអ៊ីរ៉ង់ លោក អាបាស់ អារ៉ាកជី (Abbas Araghchi)បាននិយាយកាលពីថ្ងៃចន្ទថា ការតវ៉ាដែលកំពុងបន្តនៅក្នុងប្រទេសនេះមិនអាចពិពណ៌នាថាជាបាតុកម្មបានទេ ផ្ទុយទៅវិញ លោកបានហៅពួកគេថាជា «សង្គ្រាមភេរវកម្ម»។

ថ្លែងនៅក្នុងសន្និសីទសារព័ត៌មានមួយ លោក អារ៉ាកជី បាននិយាយថា«អ្វីដែលកំពុងកើតឡើងនៅពេលនេះមិនមែនជាការតវ៉ាទេ វាគឺជាសង្គ្រាមភេរវកម្មប្រឆាំងនឹងប្រទេស»។

លោកបានអះអាងថា «អាជ្ញាធរអ៊ីរ៉ង់មានខ្សែអាត់សំឡេងនៃសារសំឡេងដែលបានផ្ញើទៅកាន់ក្រុមភេរវករ ដោយបញ្ជាឱ្យពួកគេបាញ់ប្រហារលើជនស៊ីវិល និងកងកម្លាំងសន្តិសុខ»។

លោក អារ៉ាកជី បាននិយាយថា ក្រុមទាំងនោះក៏បានកំណត់គោលដៅលើអគាររដ្ឋាភិបាល ស្ថានីយ៍ប៉ូលិស និងហាងនានាផងដែរ ហើយបានអះអាងថា អាជ្ញាធរមានរូបភាពដែលបង្ហាញពីអាវុធដែលកំពុងត្រូវបានចែកចាយក្នុងចំណោមក្រុមអ្នកតវ៉ា។

ប្រធានាធិបតីអ៊ីរ៉ង់បាននិយាយកាលពីថ្ងៃអាទិត្យសប្តាហ៍មុនថារដ្ឋាភិបាលរបស់លោកប្តេជ្ញាដោះស្រាយបញ្ហាសេដ្ឋកិច្ចរបស់អ៊ីរ៉ង់ ដែលនេះជាការកត់សម្គាល់ជាលើកដំបូងរបស់លោក ចាប់តាំងពីការតវ៉ាដែលបានចាប់ផ្តើមកាលពីខែមុន។

លោក អាលី ឡារីចានី (Ali Larijani) លេខាធិការ​នៃ​ក្រុមប្រឹក្សា​សន្តិសុខ​ជាតិ​ជាន់ខ្ពស់​របស់​អ៊ីរ៉ង់ បាន​អំពាវនាវឱ្យ​មានសកម្មភាព​ដ៏​ម៉ឺងម៉ាត់ប្រឆាំង​នឹង​អ្វី​ដែល​លោក​ហៅថា «ក្រុម​កុបកម្ម»៕

ដោយ៖ យា ចិន្ដាខន្ដី (ប្រភព៖ AA-AKP)