AKP ភ្នំពេញ ថ្ងៃទី០៧ ខែតុលា ឆ្នាំ២០២៥-- មន្ទីរពេទ្យកុមារអង្គរ ដែលជាមន្ទីរពេទ្យទទួលព្យាបាលកុមារកើតជំងឺមហារីកដោយឥតគិតថ្លៃ បានប្រកាសបើកយុទ្ធនាការ «រួមគ្នាជួយសង្គ្រោះកុមារមានជំងឺមហារីក» ដើម្បីរៃអង្គាសថវិកា ២០០០០០ដុល្លារអាមេរិក ក្នុងការជួយសង្រ្គោះដល់កុមារចាប់ពីពេលនេះរហូតដល់ដំណាច់ឆ្នាំ២០២៥។ យុទ្ធនាការនេះរៀបចំឡើងចាប់ពីថ្ងៃទី០៦ ដល់ថ្ងៃទី៣១ ខែតុលា ឆ្នាំ២០២៥។

លោកសាស្ត្រាចារ្យ វេជ្ជបណ្ឌិត ងួន ច័ន្ទភក្ត្រា នាយកមន្ទីរពេទ្យកុមារអង្គរ បានថ្លែងថា មន្ទីរពេទ្យកុមារអង្គរ (Angkor Hospital for Children) ជាអង្គការក្រៅរដ្ឋាភិបាលមួយដែលមិនស្វែងរកប្រាក់កម្រៃ។ អង្គការនេះបានបង្កើតឡើងដោយជាងថតរូបជនជាតិជប៉ុនមួយរូបឈ្មោះ Kenro Izu នៅឆ្នាំ១៩៩៩ ដែលគិតពីការព្យាបាលគឺរយៈពេល២៦ឆ្នាំហើយដោយក្នុងនេះបានផ្តល់ការពិនិត្យព្យាបាលដល់កុមារកម្ពុជាដោយមិនគិតកម្រៃបានប្រមាណ៣លាននាក់មកហើយ។

លោកសាស្រ្តាចារ្យបានថ្លែងបញ្ជាក់ថា “អ្វីដែលពិសេសនោះគឺមន្ទីរពេទ្យកុមារអង្គរបានផ្តល់ការព្យាបាលដល់កុមារដែលកើតរោគជំងឺមហារីក ដោយទូទៅ និងឥតយកប្រាក់។ សម្រាប់នាពេលនេះដែរ មន្ទីរពេទ្យកុមារអង្គរបានប្រកាសបើកយុទ្ធនាការ “រួមគ្នាជួយសង្រ្គោះកុមារមានរោគជំងឺមហារីកចាប់ពីថ្ងៃទី០៦ ដល់ថ្ងៃទី៣១ ខែតុលា ឆ្នាំ២០២៥។ សម្រាប់គោលបំណងនៃយុទ្ធនាការនេះគឺ៖ ទី១.ផ្សព្វផ្សាយ ក៏ដូចជាលើកកម្ពស់ យល់ដឹងអំពី ជំងឺមហារីកទៅដល់កុមារ។ ទី២. រៃអង្គាសថវិកាមូលនិធិជួយបំពេញកង្វះខាតដល់មន្ទីរពេទ្យកុមារអង្គរចំនួន២០០០០០ដុល្លារអាមេរិក ដើម្បីមានសមត្ថភាពអាចបន្តការជួយសង្រ្គោះដល់កុមារចាប់ពីពេលនេះរហូតដល់ដំណាច់ឆ្នាំ២០២៥នេះ។

នាយកផ្នែកអភិវឌ្ឍន៍អាជីវកម្ម ក្រុមហ៊ុន បុរីប៉េងហួតគ្រុប លោក កួរ ម៉េងហួរ ឱ្យដឹងថា ក្រុមហ៊ុនប៉េងហួតគ្រុប ជាមួយនឹងមន្ទីរពេទ្យកុមារអង្គរ  បានចាប់ដៃគ្នាសហការក្នុងរយៈពេល៥ឆ្នាំមកហើយតាមរយៈការឧបត្ថម្ភថវិកាប្រចាំឆ្នាំ។ ចូលរួមចំណែក្នុងការផ្សព្វផ្សាយយុទ្ធនាការមនុស្សធម៌ជាមួយពលរដ្ឋទូទាំងប្រទេសដើម្បីបេសកម្មរបស់មន្ទីរពេទ្យ។ នាឆ្នាំនេះដែរ ក្រុមហ៊ុនប៉េងហួតគ្រុបបានចូលរួមឧបត្ថម្ភថវិកាចំនួន៥ម៉ឺនដុល្លារដល់មន្ទីរពេទ្យកុមារអង្គរ។ សង្ឃឹមថាតាមរយៈស្មារតីចូលរួមទាំងអស់គ្នា យើងអាចចូលរួមចំណែកជាមួយរាជរដ្ឋាភិបាលក្នុងការលើកកម្ពស់វិស័យសុខាភិបាល និងការអភិវឌ្ឍសង្គម ជាពិសេសសគឺការចូលរួមសង្រ្គោះកុមារមានរោគមហារីកនៅកម្ពុជារបស់យើងតែម្តង។

លោក បណ្ឌិត ខួរ ធារ៉ា បានបញ្ជាក់ក្នុងបទបង្ហាញថាជំងឺមហារីកបាតភ្នែកគឺជាជំងឺមួយតែងកើតទៅលើកុមារ ហើយបើមិនទទួលការព្យាបាលឱ្យជាសះស្បើយទាន់ពេលវេលាទេគឺនឹងប្រឈមគ្រោះថ្នាក់ធ្ងន់ធ្ងរដែលនាំឱ្យពិការភ្នែកដែលក្នុងនោះមានទាំងពិការភ្នែកម្ខាង និងកុមារខ្លះទាំងពីរតែម្តង។ជំងឺនេះនៅកម្ពុជាពិសេសមន្ទីរពេទ្យកុមារអង្គរអាចព្យាបាលឱ្យជា១០០ភាគរយ។នៅកម្ពុជាអត្រាការព្យាបាលកន្លងមកអាចជាសះស្បើយរហូតដល់៨៣ភាគរយទៀតផង។

វេជ្ជបណ្ឌិត ប៊ុន សិរីលក្ខណ៍ គ្រូពេទ្យឯកទេសជំងឺមហារីកកុមារនៃមន្ទីរពេទ្យកុមារអង្គរ និងជាសមាជិកនៃផែនការជាតិប្រយុទ្ធនឹងជំងឺមហារីកបានបញ្ជាក់ដែរថានៅមន្ទីរពេទ្យកុមារអង្គរមានលទ្ធភាពអាចព្យាបាលជំងឺមហារីកច្រើនជាង៣០ប្រភេទ។ក្នុងចំណោមជំងឺមហារីកដែលសម្បូរឃើញកើតមានច្រើនជាងគេគេគឺមានមហារីកគ្រាប់ឈាម មហារីកក្នុងខួរក្បាល មហារីកកូនកណ្តុរ និងមហារីកបែបដុំសាច់ជាដើម។

ដោយឡែកឌីជេ ណាណា និងលោក សាយ ដែលជាទូតសុច្ឆន្ទៈនៃមន្ទីរពេទ្យកុមារអង្គរ សម្រាប់យុទ្ធនាការ “រួមគ្នាជួយសង្គ្រោះកុមារមានជំងឺមហារីក” បានបង្ហាញការប្តេជ្ញាចិត្តរួមគ្នាក្នុងការចូលរួមយុទ្ធនាការនេះ ក្នុងការរៃអង្គាសថវិការសម្រាប់ជួយដល់មន្ទីរពេទ្យកុមារអង្គរដើម្បីជួយសង្រ្គោះកុមារដែលកើតមហារីកដោយមិនគិតថវិកា។

គួរបញ្ជាក់ថាមន្ទីរពេទ្យកុមារអង្គរបានបង្កើតផ្នែកព្យាបាលជំងឺមហារីករបស់ខ្លួននៅក្នុងឆ្នាំ២០១២ ដោយចាប់ផ្តើមពីការព្យាបាលជំងឺមហារីកបាតភ្នែក។ នៅឆ្នាំ២០២១ អគារព្យាបាលជំងឺមហារីកកុមារត្រូវបានបើកដំណើរការជាផ្លូវការ។ បច្ចុប្បន្ន មន្ទីរពេទ្យកុមារអង្គរ បានព្យាបាលជំងឺមហារីកកុមារប្រមាណ៣០ប្រភេទ បានព្យាបាលកុមារចំនួន៥០៨ករណី និងបានណាត់ជួបពិគ្រោះព្យាបាលជំងឺចំនួន ៣ ៣៩៧ករណី៕

ដោយ៖ មករា រូបភាព៖ លោក ស៊ិន សារ៉េត