AKP ភ្នំពេញ ថ្ងៃទី១៥ ខែឧសភា ឆ្នាំ២០២៦ -- សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានគូសបញ្ជាក់ថា រាជរដ្ឋាភិបាល នឹងសាងសង់ស្តូបមួយដើម្បីរម្លឹកដល់វីរៈកងទ័ពដែលបានពលីក្នុងបុព្វហេតុការពារដែនអធិបតេយ្យភាពពីសំណាក់ថៃកន្លងមកនេះ។

ថ្លែងក្នុងកម្មវិធីអបអរសាទរខួប លើកទី១៩ ទិវាអតីតយុទ្ធជន និងនិវត្តជនកម្ពុជា នាថ្ងៃទី១៥ ខែឧសភា ឆ្នាំ២០២៦ នៅសាលមហាស្រពកោះពេជ្រ រាជធានីភ្នំពេញ សម្តេចធិបតី ហ៊ុន ម៉ាណែត បានថ្លែងយ៉ាងដូច្នេះថា៖ «បន្ទាប់ពីឯកឧត្តម ទៀ សី ហា ឱ្យឯកឧត្តម ណឹម សុវត្ថិ សិក្សារៀបចំហើយ ខ្ញុំបានគាំទ្រគំនិតនេះដោយឱ្យគិត គូររៀបចំស្តូប ដើម្បីរម្លឹកទៅដល់វីរៈកងទ័ព វីរៈយុជន វីរៈនគរបាលជាតិ វីរៈកងរាជអាវុហត្ថ ដែលបានពលីក្នុង បុព្វហេតុការពារធិបតេយ្យភាពជាតិរបស់យើង»។ សម្តេចធិបតីបានលើកឡើងថា កន្លងមកយើងមានវិមាន ឈ្នះ ឈ្នះ រួចហើយដើម្បីរម្លឹក ដល់វីរៈកងទ័ព វីរៈយុជន វីរៈនគរបាល បាន ពោលគឺកងកម្លាំងប្រដាប់អាវុធគ្រប់ភាគីទាំងអស់ ដែលបានចូលរួមឆ្លងកាត់ការលំបាកទាំងពីការវៃគ្នាចប់ឆ្នាំ១៩៩៨ ខណៈក្រោយឆ្នាំ១៩៩៨ នេះគឺ សង្គ្រាមការពារទឹកដី។ សម្តេចធិបតីនាយករដ្ឋមន្រ្ដីបានសង្កត់ធ្ងន់ថា៖ «យើងធ្វើស្តូបនេះដើម្បីរម្លឹកជាប្រចាំសម្រាប់កូនចៅជំនាន់ក្រោយបានដឹងពីការលះបង់ដ៏ធំធេង របស់បងប្អូនទាំងក្នុងបុព្វហេតុការពារ អធិបតេយ្យជាតិរបស់យើងនេះ គឺត្រូវគិតគូរបន្តទៀត»។

ជាមួយគ្នានោះដែរសម្តេចធិបតីនាយករដ្ឋមន្រ្ដីក៏បានស្នើឱ្យគណៈរដ្ឋមន្ត្រីធ្វើការគិតគូររៀបចំមេដាយសម្រាប់ផ្តល់ជូនដល់កងទ័ពនៅពេលចូលប្រយុទ្ធការពារទឹកដី ដោយផ្ទាល់។ សម្តេចធិបតីបានបញ្ជាក់បន្ថែមថា៖ «ពិតណាស់យើងមានមេដាយការពារជាតិមាន ប៉ុន្តែមេដាយ សម្រាប់សមរភូមិមួយៗត្រូវទាមទារឱ្យមាន ដើម្បីឱ្យដឹង ហើយក៏មានមេដាយពិសេស សម្រាប់ពិការក្នុងសមរភូមិដែរដើម្បីជាការលើកទឹកចិត្ត»៕

ដោយ៖ប៊ុនរិទ្ធ