AKP ភ្នំពេញ ថ្ងៃទី១០ ខែកុម្ភៈ ឆ្នាំ២០២៥-- ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានកោតសរសើរ និងវាយតម្លៃខ្ពស់ចំពោះអង្គការ Exceed Worldwide Mine-Ex Foundation និង ICRC សម្រាប់កិច្ចសហប្រតិបត្តិការជាមួយរាជរដ្ឋាភិបាលកម្ពុជា ក្នុងរយៈពេលជាច្រើនឆ្នាំកន្លងមកនេះ ដែលបានចូលរួមយ៉ាងសកម្មក្នុងការថែទាំ និងផ្តល់សេវាកម្មនានាដល់ជនមានពិការភាព ជាពិសេសជនរងគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម ការគាំទ្រដល់សហគមន៍ឱ្យទទួលបានការអប់រំ ដោយបានផ្លាស់ប្តូរជីវិតសិស្សានុសិស្ស និងប្រជាជនកម្ពុជាជាច្រើននាក់ តាមរយៈការបង្កើតសាលាសម្រាប់បង្រៀនពីការប្រើប្រាស់ឧបករណ៍សិប្បនិម្មិត និងអ័រតូទិក ការផ្តល់សេវាកម្មស្តារលទ្ធភាពពលកម្មកាយសម្បទាដែលមានគុណភាពខ្ពស់ ការបង្កើនសមត្ថភាពយុវជនដោយផ្តោតលើការអប់រំ និងអភិវឌ្ឍជំនាញសម្រាប់កុមារ និងយុវជន និងបន្តជំរុញកិច្ចសហការជាមួយសហគមន៍ជាដើម។ ការលើកឡើងរបស់ឯកឧត្តមបណ្ឌិតសភាចារ្យ ហង់ជួន ណារ៉ុន ដូចនេះធ្វើឡើងនាជំនួបពិភាក្សាការងារជាមួយគណៈប្រតិភូអង្គការ Exceed Worldwide និងមូលនិធិ Mine-Ex Foundation នៅទីស្តីការក្រសួង នាថ្ងៃទី១០ ខែកុម្ភៈ ឆ្នាំ២០២៥។

តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះសមិទ្ធផលដែលអង្គការខាងលើសម្រេចបាននាពេលកន្លងមក ជាពិសេសចំពោះជនមានពិការភាពផ្ទាល់ ដោយបានផ្តល់នូវជំនួយមនុស្សធម៌ដល់កម្ពុជាដូចជា អវយវៈសិប្បនិម្មិតដោយឥតគិតថ្លៃដែលផ្តល់លទ្ធភាពឱ្យពួកគាត់មានឱកាសត្រឡប់ទៅបន្តការសិក្សា និងប្រកបរបរចិញ្ចឹមជីវិតក្នុងជីវភាពជាប្រក្រតីឡើងវិញ ក្នុងគោលដៅកាត់បន្ថយភាពក្រីក្រសម្រាប់ជនមានពិការភាព។

ក្នុងជំនួបនេះភាគីទាំងពីរបានផ្តោតជាសំខាន់ទៅលើការលើកកម្ពស់ជនមានពិការភាព ដើម្បីចូលរួមគ្រប់សកម្មភាពក្នុងសង្គមដូចជាប្រជាជនទូទៅដែរ តាមរយៈការឧបត្ថម្ភរទេះរុញ អវយវៈសិប្បនិម្មិត ការផ្តល់ថវិកាក្នុងការបង្កើតមុខរបរខ្នាតតូចដល់គ្រួសារជនមានពិការភាព ជាពិសេសការបញ្ជូនកុមារមានពិការភាព និងកុមារដែលឪពុកម្ដាយមានពិការភាពឱ្យទទួលបានការអប់រំនៅសាលា និងឧបត្ថម្ភសម្ភារសិក្សា ព្រមទាំងការបណ្ដុះបណ្ដាលបច្ចេកទេសផលិតអវយវៈសិប្បនិម្មិតដល់និស្សិតជាតិ និងអន្តរជាតិជាច្រើនផងដែរ៕

ដោយ៖ ចាន់ សុភឿន (ប្រភព៖ ក្រសួងអប់រំ)