AKP បន្ទាយមានជ័យ ថ្ងៃទី០៩ ខែកុម្ភៈ ឆ្នាំ២០២៥-- ស្រូវប្រាំងរបស់កសិករចំនួន១៤៣០០ហិកតានៅក្នុងស្រុកព្រះនេត្រព្រះនិងស្រុកភ្នំស្រុកក្នុងខេត្តបន្ទាយមានជ័យដែលកន្លងមកនេះជួបបញ្ហាខ្វះទឹកនោះ ឥឡូវនេះនៅក្នុងស្រែមានទឹកគ្រប់គ្រាន់សម្រាប់ចិញ្ចឹមដើមស្រូវឱ្យលូតលាស់ខៀវស្រងាត់បន្ទាប់ពីអាជ្ញាធរខេត្តមន្ទីរធនធានទឹក និងឧតុនិយម ខេត្តបានធ្វើការចុះជួយសង្គ្រោះដោយបានបើកទ្វារទឹកពីអាងត្រពាំងថ្មបង្ហូរចុះមកតាមប្រឡាយមេចែកចាយទៅកាន់ស្រែក្នុងតំបន់ជួបបញ្ហាខ្វះទឹកនោះ។

លោក យឹម ប៊ុនរ៉ុម ប្រធានមន្ទីរធនធានទឹក និងឧតុនិយមខេត្តបន្ទាយមានជ័យ បានប្រាប់ឱ្យដឹងនៅព្រឹកថ្ងៃទី០៩ ខែកុម្ភៈ ឆ្នាំ២០២៥ នេះថា ការជួយសង្គ្រោះស្រូវប្រាំងនេះបានធ្វើឡើងក្រោមបទបញ្ជារបស់ក្រសួងធនធានទឹក និងឧតុនិយម  ឯកឧត្តមអភិបាលខេត្តបន្ទាយមានជ័យ ដោយរួមសហការជាមួយអាជ្ញាធរមូលដ្ឋាន រួមជាមួយម្ចាស់ស្រែ ចាប់ផ្តើមតាំងពីដើមខែមករារហូតដល់ពេលនេះយើងបានបញ្ចប់រួចរាល់ដោយបង្ហូរទឹកពីអាងត្រពាំងថ្ម សង្រ្គោះស្រូវសរុបបានចំនួន ១៤៣០០ហិកតា លើឃុំចំនួន៧ រួមមានឃុំពន្លៃ ឃុំប៉ោយចារ ឃុំស្រះជីក ស្ថិតក្នុងស្រុកភ្នំស្រុក ឃុំរហាល ឃុំព្រះនេត្រព្រះ ឃុំទានកាំ ឃុំភ្នំលៀប ស្ថិតក្នុងស្រុកព្រះនេត្រព្រះ។

ក្នុងឱកាសចុះពិនិត្យជាក់ស្តែងស្ថានភាពទឹក និងការងារអន្តរាគមន៍បង្ហូរទឹកសង្រ្គោះស្រូវប្រាំងជូនប្រជាកសិករនៅស្រុកព្រះនេត្រព្រះ និងស្រុកភ្នំស្រុក ខេត្តបន្ទាយមានជ័យកាលពីថ្ងៃទី០៨ ខែកុម្ភៈ ឆ្នាំ២០២៥នេះ លោក អ៊ុច ហ៊ីង អគ្គនាយករង នៃអគ្គនាយកដ្ឋានកិច្ចការបច្ចេកទេស ក្នុងនាមតំណាងដ៏ខ្ពង់ខ្ពស់របស់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម
បានណែនាំដល់មន្ទីរធនធានទឹក និងឧតុនិយមខេត្ត ត្រូវបន្តយកចិត្តទុកដាក់លើការងារអន្តរាគមន៍សង្រ្គោះស្រូវរដូវប្រាំងជូនប្រជាកសិករឱ្យបានទាន់ពេលវេលា ព្រមទាំងផ្តល់ការណែនាំដល់សហគមន៍កសិករប្រើប្រាស់ទឹក និងអាជ្ញាធរមូលដ្ឋាន ឱ្យចូលរួមលើការងារថែទាំ និងការគ្រប់គ្រងប្រព័ន្ធធារាសាស្រ្ត ដើម្បីឱ្យមាននិរន្តរភាពបានយូរអង្វែង ព្រមទាំងការប្រើប្រាស់ទឹកឱ្យមានលក្ខណៈសន្សំសំចៃខ្ពស់។

លោក ហីរី ហាំង អភិបាលរងស្រុកភ្នំស្រុកតំណាងឱ្យប្រជាកសិករបានសម្ដែងការអរគុណដល់ប្រមុខរាជរដ្ឋាភិបាលក៏ដូចក្រសួងធនធានទឹកនិងឧតុនិយមអភិបាលខេត្តបន្ទាយមានជ័យដែលជានិច្ចកាលតែងតែយកចិត្តទុកដាក់ដោះស្រាយការលំបាកជូនដល់ប្រជាពលរដ្ឋដែលជួបបញ្ហាលំបាកនៅគ្រប់ទីកន្លែងជាក់ស្តែងដូចការជួយដោះស្រាយបានទឹកសម្រាប់ស្រោចស្រពស្រូវប្រាំងរបស់កសិករនៅក្នុងស្រុកទាំង២នេះទាន់ពេលវេលាដែលបានជួយបង្ដលក្ខណៈដល់កសិករយើងអាចមានលទ្ធភាពគ្រប់គ្រាន់ដែលគ្រោងនឹងប្រមូលផលនៅពាក់កណ្តាលខែមីនាខាងមុខនេះ៕

ដោយ ឈុន សារ៉ាត