AKP ភ្នំពេញ ថ្ងៃទី០៧ ខែកុម្ភៈ ឆ្នាំ២០២៥--ថ្លែងប្រាប់ទីភ្នាក់ងារសារព័ត៌មានកម្ពុជា ពីសាធារណរដ្ឋប្រជាមានិតចិន តាមរយៈសារអេឡិចត្រូនិក នៅព្រឹកថ្ងៃទី០៧ ខែកុម្ភៈ ឆ្នាំ២០២៥ លោក កុសល ពិសី ប្រធានសហព័ន្ធកីឡាស្គែតកម្ពុជាមានប្រសាសន៍ថា បើទោះបីជាលទ្ធផលកីឡាករស្គែតកម្ពុជា ក្នុងព្រឹត្តិការណ៍ប្រកួតកីឡាអាស៊ី រដូវរងា នៅចិន ឆ្នាំ២០២៥ បែបណាក្តី ក៏កីឡាករកម្ពុជាជម្នះការលំបាក ក្នុងការហ្វឹកហាត់ត្រៀម ក្រោមអាកាសធាតុត្រជាក់ -២០អង្សាសេ ដើម្បីបង្ហាញវត្តមានរបស់កម្ពុជាប្រកបដោយមោទកភាពជាតិ។

លោក កុសល ពិសី បានជម្រាបជូនថា ៖«នៅក្នុងការចូលរួមប្រកួតកីឡាអាស៊ី រដូវរងា ឆ្នាំ២០២៥ នៅសាធារណរដ្ឋប្រជាមានិតចិន គឺជាកំណត់ត្រាជាប្រវត្តិសាស្ត្រជាលើកដំបូងបំផុត ក្នុងការបង្ហាញវត្តមានរបស់ព្រះរាជណាចក្រកម្ពុជា ក្នុងព្រឹត្តិការណ៍នេះ ដោយយើងដឹងហើយថា កម្ពុជាមិនមានរដូវរងា ឬធ្លាក់ទឹកកកនោះទេ។ ដូច្នេះ ការចូលរួមលើកដំបូងនេះ គឺជាការលើកទឹកចិត្តដ៏ខ្ពង់ខ្ពស់របស់គណៈកម្មាធិការអូឡាំពិកអន្តរជាតិ គណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡា»។

ប្រធានសហព័ន្ធរូបនេះបន្ថែមថា ៖«យើងមិនរំពឹងថានឹងទទួលបានលទ្ធផលល្អកម្រិតខ្ពស់ពេកនោះទេ ប៉ុន្តែការចូលរួមរបស់អត្តពលិកកម្ពុជា នាពេលនេះ គឺការចូលរួមប្រកួតយ៉ាងស្វាហាប់ និងផ្តោតសំខាន់លើសុវត្ថិភាព ដែលជាគោលការណ៍របស់ប្រតិភូកម្ពុជាយើង។ សំខាន់បំផុត នេះគឺជាមូលដ្ឋាននៃការចាប់ផ្តើមដំបូង ដែលជាឱកាសក្នុងការពង្រឹងសមត្ថភាពរបស់កីឡាករស្គែតកម្ពុជាទាំង៤នាក់ និងបន្តការចូលរួមវគ្គបណ្តុះបណ្តាលនាពេលខាងមុខ ក្នុងការស្វែងរកជំនាញលើវិញ្ញាសាជាច្រើនទៀត»។

ព្រឹត្តិការណ៍កីឡាអាស៊ី រដូវរងានេះមានច្រើនប្រភេទកីឡា និងច្រើនវិញ្ញាសា ដូចជាវិញ្ញាសាក្តារលើទឹកកក របាំលើទឹកកក ការប្រកួតល្បឿនលើទឹកកជាដើម។ លោកអះអាងថា ចំពោះកម្ពុជាធ្លាប់មានកីឡារបាំលើទឹកកក ប្រកួតហុកគីលើទឹកកក និងជិះក្តាររំអិលលើទឹកកក ដែលមានលំនាំជិះបន្ទះក្តារដូចគ្នា មានកង់ Skateboard ប៉ុន្តែក្នុងការប្រកួតនៅប្រទេសចិននេះ ជាប្រភេទក្តារលើទឹកកក មិនមានកង់ទេ ដោយត្រូវរំអិលលើទឹកកកតែម្តង។ ជិះក្តាររំអិលលើទឹកកក (Snowboard) មានវិញ្ញាសា៣តូចៗទៀត ខណៈកីឡាករកម្ពុជាទាំង៤នាក់បានជ្រើសរើសយកវិញ្ញាសា Slopestyle ដែលមានលក្ខណៈលំបាក ដោយមានទួលខ្ពស់ និងមានជម្រៅជ្រៅរហូតដល់ ១៥ម៉ែត្រ ប៉ុន្តែកីឡាករកម្ពុជាមិនទាន់មានការហ្វឹកហាត់ដល់កម្រិតខ្ពស់បែបនេះនៅឡើយទេ ដោយកីឡាករយើងទើបហ្វឹកហាត់នៅកូរ៉េខាងត្បូង ២ដង ក្នុង១ដងត្រឹមតែ២សប្តាហ៍ប៉ុណ្ណោះ កាលពីពេលកន្លងទៅ។ ជារួម កីឡាករកម្ពុជា ដែលលេងលើវិញ្ញាសា Slopestyle មិនទាន់មានកម្រិតបច្ចេកទេសដល់កម្រិតខ្ពស់នៅឡើយទេ ដោយសារវាត្រូវការពេលវេលាហ្វឹកហាត់យូរច្រើនឆ្នាំ ហើយយើងមិនទាន់មានសមត្ថភាពក្នុងការទប់ល្បឿន ឬសម្តែងក្បាច់បញ្ជាក្តារបង្វឹលខ្លួន និងលោតជម្រៅដល់ទៅ ១៥ម៉ែត្រនៅឡើយទេ។

ក្នុងនាមជាប្រធានសហព័ន្ធកីឡាស្គែតកម្ពុជា និងក្នុងនាមជាគ្រូបង្វឹកផង លោក កុសល ពិសី បានថ្លែងអំណរគុណយ៉ាងជ្រាលជ្រៅបំផុតជូនចំពោះថ្នាក់ដឹកនាំគណៈកម្មាធិការជាតិអូឡាំពិកកម្ពុជា (NOCC) ដែលបានលើកទឹកចិត្តដល់កីឡាករយើងបានចូលរួមប្រកួត ហើយយើងបានលើកទឹកចិត្តជូនដល់កីឡាករកម្ពុជាទាំង៤នាក់ ក្នុងកម្រិតសមត្ថភាពដែលពួកគាត់មាន ដោយសំខាន់រក្សាសុខសុវត្ថិភាពរបស់គាត់ទាំងអស់គ្នា។ ទោះជាអត្តពលិកកម្ពុជាធ្វើសម្រចបានក្នុងកម្រិតលទ្ធផលបែបណាក្តី ទោះចាញ់ ឬឈ្នះក្តី ក៏យើងទទួលយកដោយក្តីរីករាយ ព្រោះនេះជាការបង្ហាញវត្តិមានជាប្រវត្តិសាស្ត្រដំបូងរបស់កម្ពុជាយើង។

បញ្ហាលំបាកខ្លាំងមួយទៀត គឺបញ្ហាអាកាសធាតុ ដែលត្រជាក់ខ្លាំង ស្ថិតក្នុងកម្រិត -២០អង្សាសេ ដោយយើងលំបាក់ ក្នុងការឈរលើទឹកកក លើសពី១ម៉ោង នៅលើកំពូលភ្នំនៃតំបន់ហ្វឹកហាត់នេះ។ នៅត្រឹម១ម៉ោង គឺកីឡាករយើងតែងតែរត់ចូលតង់ ដើម្បីរក្សាកម្តៅឡើងវិញ រួចហើយទើបចេញទៅបន្តការហ្វឹកហាត់បន្ថែមទៀត។ ចំពោះសម្ភារប្រើប្រាស់ ដូចជាម៉ាស៊ីនថត និងទូរស័ព្ទដៃជាដើម ត្រូវកក ឬរលត់ដោយស្វ័យប្រវត្តិត្រឹម១០ទៅ ១៥នាទី។

ដោយឡែកសម្រាប់ការទទួលបដិសណ្ឋារកិច្ច និងការទទួលរៀបចំការប្រកួតរបស់ម្ចាស់ផ្ទះចិន ត្រូវបានលោកអះអាងប្រាប់ ទីភ្នាក់ងារសារព័ត៌មានកម្ពុជា AKP ទៀតថាមានភាពល្អប្រសើរ ដោយប្រតិភូយើងទទួលបានភាពកក់ក្តៅ ដោយមានភាពរួសរាយរាក់ទាក់ និងយកចិត្តទុកដាក់ខ្ពស់ពីមន្ត្រីរៀបចំ ខណៈការទទួលការស្នាក់នៅសណ្ឋាគារ អាហារហូបចុក៣ពេលមានគុណភាព។ ម្ចាស់ផ្ទះចិនមានបទពិសោធខ្ពស់ ក្នុងការរៀបចំការប្រកួតកីឡាកម្រិតទ្វីបអាស៊ីនេះ ខណៈប្រតភូកីឡាកម្ពុជាទទួលបានការចាប់អារម្មណ៍ខ្ពស់ពីប្រព័ន្ធផ្សព្វផ្សាយចិន និងអន្តរជាតិ ក្នុងព្រឹត្តិការណ៍កីឡាអាស៊ី រដូវរងា ឆ្នាំ២០២៥នេះផងដែរ។

លោក កុសល ពិសី បានសង្កត់ធ្ងន់ថា បន្ទាប់ពីការចូលរួមប្រកួតលើកដំបូងនេះ លោកដាក់ក្តីសង្ឃឹមថានឹងមានកម្មវិធីប្រកួតជាបន្តបន្ទាប់ទៀត ក្នុងវិស័យកីឡារដូវរងា ហើយអត្តពលិកកម្ពុជានឹងបន្តការហ្វឹកហាត់ត្រៀមចូលរួមប្រកួតក្នុងកីឡាអាស៊ីរដូវរងាត្រូវបានរៀបចំឡើងរៀងរាល់៤ឆ្នាំម្តង។ ស្របតាមគោលនយោបាយរបស់គណៈកម្មាធិការអូឡាំពិកអន្តរជាតិ ដែលលើកទឹកចិត្តដល់ប្រទេសក្នុងតំបន់ត្រូពិកគ្មានរដូវរងាបានចូលរួមប្រកួតក្នុងព្រឹត្តិការណ៍រដូវរងា ហើយអត្តពលិកកម្ពុជា ដែលទទួលបានការលើកទឹកចិត្តពី NOCC ក្នុងព្រឹត្តិការណ៍នេះនឹងបន្តចូលរួមប្រកួតក្នុងព្រឹត្តិការណ៍កីឡារដូវរងាកម្រិតទ្វីប និងអន្តរជាតិជាបន្តបន្ទាប់ទៀត៕

ដោយ ហេង ណាលីន (រូបភាពផ្តល់ជូនដោយលោក កុសល ពិសី)