AKP ភ្នំពេញ ថ្ងៃទី០៦ ខែកុម្ភៈ ឆ្នាំ២០២៥--

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានគូសបញ្ជាក់ក្នុងកិច្ចប្រជុំនាថ្ងៃទី០៦ ខែកុម្ភៈ ឆ្នាំ២០២៥ ស្តីពីការត្រៀមលក្ខណៈឆ្ពោះទៅរៀបចំការសម្ពោធសមិទ្ធផលកំណែទម្រង់វិទ្យាស្ថានជាតិអប់រំ ថា ក្រសួងអប់រំ យុវជន និងកីឡា បាន និងកំពុងធ្វើកំណែទម្រង់ស៊ីជម្រៅ និងគ្រប់ជ្រុងជ្រោយ ដោយបានរៀបចំរចនាសម្ព័ន្ធគ្រប់គ្រងឡើងវិញ បានប្រែក្លាយវិទ្យាស្ថានជាតិអប់រំឱ្យទៅជាគ្រឹះស្ថានឧត្តមសិក្សាពេញលេញ ដែលរួមមាន៤អង្គភាពគឺ ១. មហាវិទ្យាល័យ គរុកោសល្យ ២. សាលាក្រោយបរិញ្ញាបត្រ ៣. មជ្ឈមណ្ឌលស្រាវជ្រាវ អប់រំ និងនវានុវត្តន៍ និង៤. អង្គភាពកិច្ចការទូទៅ ដែលចែកចេញជា១៤ដេប៉ាតឺម៉ង់ និងការិយាល័យ។

ក្នុងកិច្ចប្រជុំនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណដល់គណៈកម្មការកំណែទម្រង់វិទ្យាស្ថានជាតិអប់រំដែលបានខិតខំយកចិត្តទុកដាក់ និងបំពេញការងាររហូតទទួលបានលទ្ធផលដ៏ល្អប្រសើរ ដោយបានកែប្រែវិទ្យាស្ថានជាតិអប់រំទៅជាគ្រឹះស្ថានមួយដែលស្មើស្តង់ដាថ្នាក់តំបន់ ព្រមទាំងបានគូសបញ្ជាក់ថា ការសម្ពោធសមិទ្ធផល និងការប្រគល់សញ្ញាបត្រនៃវិទ្យាស្ថានជាតិអប់រំនាពេលខាងមុខនេះ គឺជាព្រឹត្តិការណ៍ប្រវត្តិសាស្ត្រផង និងជាការដាក់ចេញនូវចក្ខុវិស័យឆ្លើយតបទៅនឹងការវាយតម្លៃគ្រូបង្រៀនផង ដោយឯកឧត្តមបានផ្តល់អនុសាសន៍មួយចំនួនជូនក្រុមការងារដើម្បីអនុវត្តបន្តដូចជា សូមឱ្យរៀបចំរបាយការណ៍ស្ដីពីដំណើរវិវត្តន៍នៃប្រវត្តិវិទ្យាស្ថានជាតិអប់រំ និងប្រមូលធាតុចូលទាំងរូបភាព និងឯកសារពាក់ព័ន្ធពីអ្នកជំនាន់មុន រៀបចំការសិក្សាស្រាវជ្រាវរបស់គរុនិស្សិត សរសេរ និងបោះពុម្ពផ្សាយដោយកំណត់ប្រធានបទក្នុងការសរសេរឱ្យឆ្លើយតបនឹងបញ្ហាការរៀន និងបង្រៀននាពេលបច្ចុប្បន្ន រៀបចំពិព័រណ៍ស្នាដៃដោយផ្ដោតរំលេចពីវិធីសាស្ត្របង្រៀនថ្មី និងចិត្តវិទ្យាគរុកោសល្យ។

ជាមួយគ្នានេះដែរ ឯកឧត្តមបណ្ឌិតសភាចារ្យ ហង់ជួន ណារ៉ុន បានលើកទឹកចិត្តដល់គណៈកម្មការកំណែទម្រង់ឱ្យបន្តយកចិត្តទុកដាក់ខិតខំសម្រេចនូវលទ្ធផលថ្មីៗបន្ថែមទៀត ដោយផ្អែកលើគោលដៅអភិវឌ្ឍចំនួន២ ដែលក្នុងនោះ ទី១.ការអនុវត្តស្ដង់ដាវិជ្ជាជីវៈគ្រូបង្រៀនទាក់ទងទៅនឹងចិត្តវិទ្យាអប់រំ និងការបញ្ចូលនូវវិធីសាស្ត្របង្រៀនថ្មីៗ និង ទី២.ការអប់រំស្ទែម ដោយធ្វើការអង្កេតទៅលើគរុនិស្សិតពីបញ្ហាបណ្ដុះបណ្ដាលគ្រូលើផ្នែកស្ទែម ការផ្ដោតទៅលើគ្រូមានជំនាញគណិតវិទ្យា និងស្ថិតិ រួមជាមួយការបណ្ដុះបណ្ដាលគ្រូទៅលើផ្នែកបំណិនបញ្ញាសិប្បនិម្មិត (AI) ផងដែរ៕

ដោយ៖ ចាន់ សុភឿន (ប្រភព៖ ក្រសួងអប់រំ)