AKP កំពង់ធំ ថ្ងៃទី០១ ខែកុម្ភៈ ឆ្នាំ២០២៥-- ឯកឧត្តម សាមឺឌី ស៊ីវឌ្ឍនា រដ្ឋលេខាធិការក្រសួងអប់រំ យុវជន និងកីឡា អញ្ជើញចូលរួមក្នុងពិធីបិទសន្និបាតបូកសរុបវាយតម្លៃលទ្ធផលការងារអប់រំ យុវជន និងកីឡាខេត្តកំពង់ធំ ឆ្នាំសិក្សា២០២៣-២០២៤ និងលើកទិសដៅការងារឆ្នាំសិក្សា២០២៤-២០២៥ ដោយមានការអញ្ជើញូលរួមពីលោក អ៊ុង វុទ្ធី អភិបាលរងខេត្តកំពង់ធំ លោក លោកស្រីថ្នាក់ដឹកនាំមន្ទីរ អង្គភាព អាជ្ញាធរ មូលដ្ឋាន ព្រមទាំងអង្គការដៃគូអភិវឌ្ឍជាតិ-អន្តរជាតិ នាយក នាយិកា លោកគ្រូ អ្នកគ្រូនិងអ្នកពាក់ព័ន្ធទាំងអស់កាលពីរសៀលថ្ងៃទី៣១ ខែមករា ឆ្នាំ២០២៥ នៅសាលាគរុកោសល្យ និងវិក្រិតការខេត្តកំពង់ធំ។

ក្នុងឱកាសនោះ លោក អ៊ុង វុទ្ធី បានផ្ដល់អនុសាសន៍មួយចំនួនដើម្បីឱ្យការអនុវត្តការងារអប់រំ យុវជន និងកីឡា កាន់តែទទួលបានសមិទ្ធផលថ្មីៗបន្ថែមទៀត៖ ១. លោកប្រធានមន្ទីរ និងគណៈគ្រប់គ្រងសាលាត្រូវសហការជាមួយអាជ្ញាធរមានសមត្ថកិច្ចចាត់វិធានការឱ្យបានម៉ឺងម៉ាត់និងត្រូវពង្រឹងវិន័យផ្ទៃក្នុងសាលារៀនទាំងរដ្ឋ និងឯកជន ទប់ស្កាត់ឱ្យបានបញ្ហាក្មេងទំនើងក្នុងសាលារៀន។ ២. ត្រូវបន្តពង្រឹងវិន័យសីលធម៌ ចរិយាធម៌ សុជីវធម៌ គុណធម៌ និងឥរិយាបថល្អទាំងបុគ្គលិកអប់រំនិងសិស្សានុសិស្ស។ ៣. ត្រូវបន្តជំរុញការសាងសង់ហេដ្ឋារចនាសម្ព័ន្ធសុខភាពអនាម័យ ការផ្សព្វផ្សាយការលើកកម្ពស់សុខភាព សុវត្ថិភាពចំណីអាហារនិងការបង្ការជំងឺនានានៅគ្រប់គ្រឹះស្ថានសិក្សា។ ៤. ត្រូវបង្កើត និងបន្តបង្កើតកម្មវិធីអប់រំផ្សព្វផ្សាយបន្ថែមពាក់ព័ន្ធនឹងការប្រយុទ្ធប្រឆាំងអំពើហិង្សាការជួញដូរស្រ្តី និងកុមារលុបបំបាត់ ការរើសអើងក្នុងសង្គម ទប់ស្កាត់ការរីករាលដាលនៃជំងឺអេដស៍ គ្រោះថ្នាក់នៃការប្រើប្រាស់គ្រឿងញៀននិងការអប់រំពាក់ព័ន្ធនឹងការគោរពច្បាប់ចរាចរណ៍ផ្លូវគោកជាដើមដើម្បីបំផុសស្មារតីចូលរួមទប់ស្កាត់និងការគោរពច្បាប់ក្នុងស្រទាប់សិស្សនិងយុវជនដែលជាទំពាំងស្នងឫស្សី។ ៥. មន្ទីរអប់រំ យុវជន និងកីឡា និងមន្ទីរអង្គភាពពាក់ព័ន្ធត្រូវបន្តសហការគាំទ្រ និងត្រួតពិនិត្យឱ្យបានហ្មត់ចត់នូវការអនុវត្តមុខងារក្នុងវិស័យអប់រំ យុវជននិងកីឡាដែលបានផ្ទេរទៅឱ្យរដ្ឋបាល ក្រុងស្រុក ដើម្បីធានាឱ្យបានថាការផ្ទេរមុខងារនេះត្រូវបានអនុវត្តស្របតាមចក្ខុវិស័យរបស់រាជរដ្ឋាភិបាល។ ៦. ត្រូវជំរុញនិងលើកទឹកចិត្តការចូលរួមរបស់មាតាបិតា អាណាព្យាបាល និងសហគមន៍ក្នុងការអប់រំស្របតាមពាក្យស្លោក“ភាពជាដៃគូរដ្ឋ និងសហគមន៍ដើម្បីការអប់រំ” និង៧. ត្រូវរៀបចំឱ្យមានការប្រកួតកីឡាទាំងក្នុងសាលារៀនទាំងថ្នាក់ខេត្ត និងក្នុងព្រឹត្តិការណ៍សំខាន់ៗនានា ដើម្បីជំរុញឱ្យសិស្សានុសិស្សនិងយុវជនចូលរួមលេងកីឡាស្របតាមពាក្យស្លោក “យុវជនម្នាក់ ចេះកីឡាមួយប្រភេទយ៉ាងតិចប្រចាំជីវិត”។

ឯកឧត្តម សាមឺឌី ស៊ីវឌ្ឍនា មានប្រសាសន៍ថា ក្រសួងអប់រំ យុវជន និងកីឡា បានផ្តល់យុទ្ធសាស្រ្តអាទិភាព៤បន្ថែមទៀតរួមមាន៖ ការអប់រំឌឺជីថល ការបង្កើតមជ្ឈមណ្ឌលឧត្តមភាពនៅគ្រឹះស្ថានឧត្តមសិក្សា ការកសាងប្រព័ន្ធ និងការអភិវឌ្ឍសមត្ថភាព និងការអភិវឌ្ឍការអប់រំកាយនិងកីឡា។ លើសពីនេះទៀត យើងបានបន្តពង្រឹងគុណភាពអប់រំ និងការបណ្តុះបណ្តាលគ្រប់កម្រិត ការបង្កើតសាលារៀនគម្រូ។ ការពង្រឹងគុណភាពនៃការបណ្តុះបណ្តាលគ្រូបង្រៀន និងវិធីសាស្រ្តបង្រៀន។ ការបន្តលើកកម្ពស់ការអប់រំឌីជីថល ការលើកកម្ពស់សុខភាពសិក្សានិងពង្រឹងអភិបាលកិច្ចគ្រឹះស្ថានឧត្តមសិក្សានិងការលើកកម្ពស់វិស័យកីឡាផ្សារភ្ជាប់នឹងការអប់រំ និងការបន្តជំរុញចលនា “យុវជនម្នាក់ ចេះកីឡាមួយប្រភេទយ៉ាងតិចប្រចាំជីវិត” គឺជាគន្លឹះចាំបាច់ក្នុងការជំរុញការអភិវឌ្ឍមូលធនមនុស្សឱ្យសម្រេចបានជោគជ័យ មានគុណភាពខ្ពស់ដែលអាចកសាងនិងអភិវឌ្ឍធនធានមនុស្សប្រកបដោយមនសិកាវិជ្ជាជីវៈ និងសមត្ថភាពជំនាញពិតប្រាកដលើគ្រប់វិស័យជាប្រយោជន៍ដល់ការកសាងសង្គមជាតិមួយដែលមានសុខសន្តិភាព ស្ថិរភាព សណ្តាប់ធ្នាប់សង្គម មានការអភិវឌ្ឍប្រកបដោយចីរភាព បរិយាបន្ន និងសមធម៌មានប្រជាជនប្រកបដោយចំណេះដឹងខ្ពស់ និងវប្បធម៌ជ្រៅជ្រះមានជីវភាពសមរម្យ និងមានការរស់នៅប្រកបដោយសុខដុមរមនាទាំងក្នុងសង្គមជាតិ និងនៅក្នុងក្រុមគ្រួសារ៕

ដោយ ស៊ុម វណ្ណា