AKP ភ្នំពេញ ថ្ងៃទី២៦ ខែមករា ឆ្នាំ២០២៥-- ក្រសួងអប់រំ យុវជន និងកីឡា ដែលមាននាយកដ្ឋានបរិវត្តកម្មឌីជីថលជាសេនាធិការ បានសហការជាមួយអង្គការ UNICEF ប្រចាំប្រទេសកម្ពុជា និង EdTech Hub បានធ្វើការសិក្សាស្រាវជ្រាវ និងប្រមូលព័ត៌មានទៅលើបំណិនសមត្ថភាពឌីជីថល  ក្នុងការប្រើប្រាស់សម្រាប់កិច្ចការងាររដ្ឋបាលអប់រំប្រចាំថ្ងៃ និងការបង្រៀន រៀន របស់គ្រូបង្រៀននៅកម្រិតបឋមសិក្សា មធ្យមសិក្សាបឋមភូមិ មធ្យមសិក្សាទុតិយភូមិ គ្រូឧទ្ទេសនៅតាមគ្រឹះស្ថានបណ្ដុះបណ្ដាលគ្រូ បុគ្គលិកអប់រំនៅតាមការិយាល័យអប់រំ យុវជន និងកីឡា ស្រុក ខណ្ឌ ក្រុង បុគ្គលិកអប់រំនៅតាមមន្ទីរអប់រំយុវជន និងកីឡា រាជធានី ខេត្ត និងបុគ្គលិកអប់រំនៅតាមអង្គភាពក្រោមឱវាទក្រសួងអប់រំ យុវជន និងកីឡា។

ការចុះសិក្សាស្រាវនេះមានគោលបំណងសិក្សាស្វែងរកឱ្យឃើញនូវកម្រិតចំណេះដឹង និងបំណិនសមត្ថភាពឌីជីថលរបស់បុគ្គលិកអប់រំដែលមានស្រាប់ ព្រមទាំងកំណត់បាននូវគម្លាតចំណេះដឹង ឌីជីថលរវាងបុគ្គលិកអប់រំនៅថ្នាក់ជាតិ ថ្នាក់ក្រោមជាតិ គ្រឹះស្ថានបណ្ដុះបណ្ដាលគ្រូ និងគ្រូបង្រៀននៅកម្រិតទាំងបីភូមិសិក្សា ដើម្បីបានជាព័ត៌មានសម្រាប់ក្រសួងអប់រំ យុវជន និងកីឡា និងដៃគូអភិវឌ្ឍន៍នានារៀបចំផែនការសកម្មភាពបំប៉នចំណេះដឹង និងសមត្ថភាពឌីជីថល  ដែលឆ្លើយតបទៅនឹងតម្រូវការជាក់ស្ដែង និងមានប្រសិទ្ធភាពខ្ពស់៕

ដោយ៖ ចាន់ សុភឿន (ប្រភព៖ ក្រសួងអប់រំ)