AKP ភ្នំពេញ ថ្ងៃទី២៣ ខែមករា ឆ្នាំ២០២៥ -- សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅរសៀលថ្ងៃទី២៣ខែមករា ឆ្នាំ២០២៥នេះ បានឆ្លៀតឱកាសដ៏មមាញឹក អញ្ជើញជាអធិបតី ក្នុង “ពិធីបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅ ការងារឆ្នាំ២០២៥ របស់ក្រសួងសាធារណការ និងដឹកជញ្ជូន” ព្រមទាំងវត្តមានរបស់ ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា អង្គទូត តំណាងអង្គទូត ក្រសួង-ស្ថាប័ន គណៈអភិបាលរាជធានី ខេត្ត និងភ្ញៀវកិត្តិយសជាតិ-អន្តរជាតិ។

វិស័យសាធារណការ និងដឹកជញ្ជូន ត្រូវបានកំណត់នៅក្នុងបញ្ចកោណទី២ “ការធ្វើពិពិធកម្មសេដ្ឋកិច្ច និងការបង្កើនភាពប្រកួតប្រជែង” ត្រង់មុំទី២ ការលើកកម្ពស់ការតភ្ជាប់ និងការបង្កើនប្រសិទ្ធភាពនៃវិស័យដឹកជញ្ជូន និងឡូជីស្លឹក និង ក្នុងបញ្ចកោណទី៤ “ការអភិវឌ្ឍប្រកបដោយភាពធន់ ចីរភាព និងបរិយាបន្ន” ត្រង់មុំទី៤ ការពង្រឹង ការគ្រប់គ្រង និងការធ្វើទំនើបកម្មនគរូបនីយកម្ម ដែលការណ៍នេះនឹងរួមចំណែកក្នុងការកសាង មូលដ្ឋានគ្រឹះដើម្បីឈានទៅសម្រេចបាននូវចក្ខុវិស័យកម្ពុជាឆ្នាំ២០៥០ ជាប្រទេសមានចំណូលខ្ពស់។

ដោយគោរពយ៉ាងម៉ឺងម៉ាត់ ក្នុងការអនុវត្តយុទ្ធសាស្ត្របញ្ចកោណ-ដំណាក់កាលទី១ ឱ្យមាន ប្រសិទ្ធភាពនិងសម្រេចបានជោគជ័យ ក្រសួងសាធារណការ និងដឹកជញ្ជូន បានកំណត់នូវចក្ខុវិស័យ សំខាន់ៗចំនួន ២ រួមមាន ១) ការលើកកម្ពស់សេវាគ្រប់ប្រភេទ តាមរយៈការអភិវឌ្ឍ និងបន្តធ្វើទំនើបកម្មការប្រើប្រាស់បច្ចេកវិទ្យាឌីជីថលក្នុងការគ្រប់គ្រង និងការផ្តល់សេវាប្រកបដោយភាព លឿន រហ័ស តម្លាភាព ប្រសិទ្ធភាព ងាយស្រួល និងជឿទុកចិត្ត និង ២)ការលើកកម្ពស់ការតភ្ជាប់ ប្រព័ន្ធដឹកជញ្ជូនអន្តរមធ្យោបាយ ឡូជីស្ទីក និងការអភិវឌ្ឍហេដ្ឋារចនាសម្ព័ន្ធដឹកជញ្ជូន ឱ្យមាន គុណភាព សុវត្ថិភាព ចីរភាព ភាពធន់ និងបរិយាបន្ន។ ជាលទ្ធផលក្រសួងបានសម្រេចនូវសមិទ្ធផល ធំៗជាច្រើនជូនប្រទេសជាតិ និងរាជរដ្ឋាភិបាល រួមមានដូចតទៅ៖
1. ការលើកកម្ពស់ការផ្តល់សេវាគ្រប់ប្រភេទ
ទី១.សេវាដឹកជញ្ជូនផ្លូវគោក
• បានចុះបញ្ជីយានយន្តប្រមាណ ៣៧ម៉ឺនគ្រឿង (ក្នុងនោះ ទោចក្រយានយន្តប្រមាណ ៣១ម៉ឺន គ្រឿង និងរថយន្តគ្រប់ប្រភេទប្រមាណ ៥ម៉ឺន ៥ពាន់គ្រឿង), រថយន្តបំពាក់ផ្លាកលេខពិសេស និងផ្លាកលេខពិសេសផ្ទាល់ខ្លួនប្រមាណ ៣ម៉ឺនគ្រឿង និងទទួលបានចំណូលសរុបជាង ១៨លានដុល្លារអាម៉េរិក, និងយានយន្តដើរដោយថាមពលអគ្គិសនីប្រមាណ ៣ពាន់គ្រឿង។

បានចេញបណ្ណបើកបរប្រមាណ ១១ម៉ឺនបណ្ណ ក្នុងនោះទោចក្រយានយន្តប្រមាណ ៩ម៉ឺនបណ្ណ និងរថយន្តប្រមាណជិត ១ម៉ឺន ៤ពាន់បណ្ណ) និងបណ្ណអាជីវកម្មរថយន្តគ្រប់ប្រភេទចំនួន ៧ម៉ឺនបណ្ណ។បានត្រួតពិនិត្យលក្ខណៈបច្ចេកទេសយានយន្ត(ឆៀក) ប្រមាណ ៤៦ម៉ឺនគ្រឿង, ត្រួតពិនិត្យ យានយន្តដឹកជញ្ជូនលើសទម្ងន់កម្រិតកំណត់ប្រមាណ ២លាន ៨៥ម៉ឺនគ្រឿង និងពិន័យ ប្រមាណជាង ១ពាន់គ្រឿង, យានយន្តកែច្នៃខុសលក្ខណៈបច្ចេកទេសប្រមាណ ៥ម៉ឺន ៤ ពាន់គ្រឿង និងរកឃើញយានយន្តខុសលក្ខណៈបច្ចេកទេសប្រមាណ ១ម៉ឺន ៤ពាន់គ្រឿង។

បានរៀបចំកែសម្រួលឡើងវិញមណ្ឌលផ្តល់សេវាសាធារណៈនៅផ្សារទំនើប អ៊ីអនម៉ល ភ្នំពេញ និងពង្រីកមណ្ឌលត្រួតពិនិត្យលក្ខណៈបច្ចេកទេសយានយន្តចំនួន១ ទីតាំងបន្ថែម។ បើគិតមក ទល់បច្ចុប្បន្ន ក្រសួងបានបង្កើតមណ្ឌលផ្តល់សេវាសាធារណៈចំនួន ៦ទីតាំង, មណ្ឌលត្រួត ពិនិត្យលក្ខណៈបច្ចេកទេសយានយន្តចំនួន ២៤ទីតាំង, មជ្ឈមណ្ឌលបណ្តុះបណ្តាលបើកបរ យានយន្តធុនធ្ងន់ចំនួន ១ទីតាំង, រថយន្តត្រួតពិនិត្យលក្ខណៈបច្ចេកទេសយានយន្ត(ឆៀក ចល័ត) ចំនួន ៤គ្រឿង, សាលាបង្រៀនបើកបរយានយន្តទូទាំងប្រទេស ៥៦ទីតាំង និងសាខា បើកបរយានយន្តទូទាំងប្រទេសចំនួន ១៧៥ទីតាំង រួមទាំងបានធ្វើប្រតិភូកម្មផ្ទេរមុខងារ ចំនួន៥ ទៅអង្គភាពចេញចូលតែមួយនៃរដ្ឋបាលរាជធានី-ខេត្តទាំង២៥ និងផ្ទេរមុខងារចំនួន៤ ទៅការិយាល័យច្រកចេញចូលតែមួយនៃរដ្ឋបាលក្រុង ស្រុក ខណ្ឌចំនួន២០៤ ដើម្បីបង្ខិត
ការផ្តល់សេវាឱ្យទៅកៀកប្រជាពលរដ្ឋ។ បានផ្តល់វគ្គបណ្តុះបណ្តាល និងអប់រំផ្សព្វផ្សាយច្បាប់ស្តីពីចរាចរណ៍ផ្លូវគោកជូនវិស័យឯកជន និងប្រជាពលរដ្ឋ ដើម្បីលើកកម្ពស់សុវត្ថិភាពចរាចរណ៍ និងការដឹកជញ្ជូនតាមផ្លូវគោក។
ទី២.សេវាដឹកជញ្ជូនផ្លូវទឹក ផ្លូវសមុទ្រ និងកំពង់ផែ៖ •
បានចុះបញ្ជីនាវាផ្លូវទឹកចំនួន ២៦គ្រឿង និងនាវាផ្លូវសមុទ្រចំនួន ១០គ្រឿង ដោយទទួល បានចំណូលសរុបប្រមាណជាង ២ពាន់លានរៀល។
កំពង់ផែស្វយ័តក្រុងព្រះសីហនុ និងកំពង់ផែស្វយ័តភ្នំពេញ សម្រេចបានការដឹកជញ្ជូនទំនិញ ឆ្លងកាត់មានចំនួនសរុបប្រមាណ ១៤លានតោន និងទទួលបានចំណូលសរុបប្រមាណ ១៥៣លានដុល្លារអាម៉េរិក។
កំពង់ផែស្វយ័តទាំងពីរក៏បានបញ្ចុះតម្លៃលើកដាក់ទំនិញចំនួន ២ដុល្លារអាម៉េរិក ក្នុង១ទូកុងតឺន័រ យោងតាមសំណើរបស់វិស័យឯកជន តាមរយៈក្រុម “ច” នៃវេទិការាជរដ្ឋាភិបាល និងផ្នែកឯកជន។
ទី៣.សេវាពិសោធន៍សំណង់សាធារណការ និងអាជ្ញាបណ្ណផ្លូវថ្នល់៖
បានផ្តល់សេវាពិសោធន៍សំណង់សាធារណការប្រមាណជាង ២ពាន់ករណី និងអាជ្ញាបណ្ណ ផ្លូវថ្នល់ចំនួន២០ សម្រាប់ប្រកបអាជីវកម្មលើវិស័យហេដ្ឋារចនាសម្ព័ន្ធផ្លូវថ្នល់ជូនអង្គភាពរដ្ឋ នឹងក្រុមហ៊ុនឯកជន។ទី៤.

សេវាដឹកជញ្ជូនផ្លូវដែក៖

• បានផ្តល់សេវាដឹកជញ្ជូនតាមផ្លូវដែកទាំងពីរទិសនូវទំនិញប្រមាណជាង ១លានតោន និង អ្នកដំណើរប្រមាណជាង ១០ម៉ឺននាក់។

• បាននិងកំពុងពិភាក្សាលើការរៀបចំផែនការប្រតិបត្តិការនិងថែទាំ (O&M) លើខ្សែផ្លូវដែក ទាំងពីរទិសដែលមានស្រាប់ ជាមួយក្រុមហ៊ុនរ៉ូយ៉ាល់រេលវេ ដើម្បីកែលម្អប្រសិទ្ធភាពនៃការផ្តល់ សេវាដឹកជញ្ជូនតាមផ្លូវដែក ខណៈដែលកំពុងចរចារៀបចំកិច្ចព្រមព្រៀងសម្បទានថ្មី។
II. ការលើកកម្ពស់ការតភ្ជាប់ប្រព័ន្ធដឹកជញ្ជូនអន្តរមធ្យោបាយ ឡូជីស្លឹក និងការ អភិវឌ្ឍហេដ្ឋារចនាសម្ព័ន្ធដឹកជញ្ជូន
ទី១.ការតភ្ជាប់ និងការអភិវឌ្ឍហេដ្ឋារចនាសម្ព័ន្ធផ្លូវថ្នល់ ខ្ញុំបាទសូមគោរពជម្រាបជូន សម្តេចធិបតីនាយករដ្ឋមន្ត្រី និងអង្គពិធីទាំងមូលមេត្តា ជ្រាបដ៏ខ្ពង់ខ្ពស់ថា បច្ចុប្បន្ន ក្រសួងបាននិងកំពុងធ្វើការគ្រប់គ្រង និងស្ថាបនាផ្លូវជាតិ និង ផ្លូវខេត្តសរុបចំនួន ៨៥៤ខ្សែ មានប្រវែងសរុប ២០ ៣០៧គ.ម បានក្រាលកៅស៊ូ និងបេតុង សរុបប្រវែង ១១ ៦៤៩គ.ម ស្មើនឹង ៥៧% នៃប្រវែងផ្លូវសរុប ក្នុងនោះ ផ្លូវជាតិកម្រិត១ មាន ចំនួន ៩ខ្សែ មានប្រវែង ២ ២៥៤គ.ម បានក្រាលកៅស៊ូ និងបេតុងបាន១០០%, ផ្លូវជាតិ កម្រិត២ មានចំនួន ៧១ខ្សែ មានប្រវែង ៥ ១២០គ.ម បានក្រាលកៅស៊ូ និងបេតុង បាន ៤ ០១០គ.ម ស្មើនឹង ៧៨%, និងផ្លូវខេត្ត មានចំនួន ៧៧៤ខ្សែ មានប្រវែង ១២ ៩៣២ គ.ម បានក្រាលកៅស៊ូ និងបេតុងបាន ៥ ៣៨៤គ.ម ស្មើនឹង ៤២%។
• បានរៀបចំពិធីសម្ពោធបើកឱ្យប្រើប្រាស់ជាផ្លូវការ វិថីតេជោសន្តិភាពឆ្នេរអង្គោល នៅខេត្តកែប និងសម្ពោធជានិមិត្តរូបប្រសិទ្ធនាមខ្សែផ្លូវក្រវាត់ក្រុងទី៣ ជា “មហាវិថី ស៊ី ជីនពីង” ក្រោម អធិបតីភាពដ៏ខ្ពង់ខ្ពស់ សម្តេចធិបតីនាយករដ្ឋមន្ត្រី។
បានបញ្ចប់គម្រោងសាងសង់ កំណាត់ផ្លូវជាតិលេខ៧ (ស្រុកស្នួល-ក្រុងក្រចេះ), ផ្លូវជាតិ លេខ៣១, ផ្លូវជាតិលេខ៣៣, ផ្លូវជាតិលេខ៤១, ផ្លូវជាតិលេខ៧១សេ ដែលគម្រោងទាំងអស់នេះ ក្រសួងគ្រោងនឹងគោរពស្នើសុំ សម្តេចធិបតីនាយករដ្ឋមន្ត្រី ដើម្បីរៀបចំពិធីសម្ពោធ បើកឱ្យប្រើប្រាស់ជាផ្លូវការនាពេលវេលាសមស្របខាងមុខ។
បានសាងសង់ ជួសជុល ថែទាំ និងត្រួតពិនិត្យបច្ចេកទេសហេដ្ឋារចនាសម្ព័ន្ធផ្លូវ-ស្ពាន ដោយ ប្រើប្រាស់ថវិកាជាតិ រួមមាន ជួសជុលខួបសម្រាប់ផ្លូវថ្នល់ ប្រវែងសរុប ២៥៧គ.ម, សាងសង់ ផ្លូវថ្មី ប្រវែងសរុប ៣៣៣គ.ម, ថែទាំខួប សម្រាប់ស្ពានប្រវែងសរុប ១ ៥០០ម៉ែត្រ, សាងសង់ស្ពានថ្មី ប្រវែងសរុប ១ ២៤៤ម៉ែត្រ, ថែទាំប្រចាំផ្លូវជាតិ និងផ្លូវខេត្តចំនួន ៥៧៩ខ្សែ ប្រវែងសរុប ១១ ៩២៥គ. ម និងថែទាំប្រចាំស្ពានធំៗចំនួន ១៩ស្ពាន ប្រវែង សរុប ១ម៉ឺន ៤ពាន់ម៉ែត្រ។ • បាននិងកំពុងអនុវត្តគម្រោងសាងសង់ រួមមាន ផ្លូវល្បឿនលឿនភ្នំពេញ-ក្រុងបាវិត, ផ្លូវជាតិ លេខ៤(ភ្នំពេញ-ព្រះសីហនុ), កំណាត់ផ្លូវជាតិលេខ៥ (សិរីសោភ័ណ-ប៉ោយប៉ែត), កំណាត់ ផ្លូវជាតិលេខ៧ (ស្គន់-កំពង់ចាម), ផ្លូវជាតិលេខ១០ (សំឡូត-វាលវែង-កោះកុង), ផ្លូវជាតិ លេខ២៣(ស្រុកកោះធំ-ស្រុកលើកដែក), ផ្លូវជាតិលេខ៤៨(ស្រែអំបិល-កោះកុង), ផ្លូវជាតិលេខ ៧៣(ក្រចេះ-ត្បូងឃ្មុំ), ផ្លូវខេត្តលេខ៣១២(ខេត្តព្រៃវែង-ច្រកព្រំដែនបន្ទាយចក្រី), ផ្លូវខេត្ត លេខ៣៧៧ និងលេខ៣៧៧A ខេត្តក្រចេះ, ស្ពានឆ្លងកាត់ទន្លេមេគង្គ ខេត្តក្រចេះ, ស្ពាន ឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ)។
• បានត្រៀមអនុវត្តគម្រោងអាទិភាព រួមមាន កំណាត់ផ្លូវជាតិលេខ៦(ត្រពាំងធំ-ស្លក្រាម), កំណាត់ ផ្លូវជាតិលេខ៧ (រមាត-ត្រពាំងគ្រៀល), កំណាត់ផ្លូវជាតិលេខ៣ (ត្រពាំងរពៅ-វាលរេញ), ផ្លូវភ្ជាប់ក្រុងសៀមរាបទៅកាន់អាកាសយានដ្ឋានអន្តរជាតិសៀមរាបអង្គរ, ផ្លូវជាតិលេខ៥០សេ (កំពង់ឆ្នាំង-កំពង់ធំ) និងស្ពានឆ្លងកាត់ទន្លេសាប, ផ្លូវខ្សែក្រវាត់ក្រុងទី៣ ត្រើយខាងកើតទន្លេ មេគង្គ, កំណាត់ផ្លូវជាតិលេខ៨ (ព្រែកតាមាក់-ស្វាយអន្ទរ), ផ្លូវជាតិតភ្ជាប់ខេត្តបាត់ដំបង- សៀមរាប, ផ្លូវជាតិលេខ៧៨-៥(រតនគិរី បានលុង-កន្ទុយនាគ ព្រំប្រទល់កម្ពុជា-វៀតណាម), និងស្ពានមិត្តភាពកម្ពុជា-កូរ៉េ (ផ្សារចាស់-ជ្រោយចង្វារ -អរិយក្សត្រ)។
ទី២.ការតភ្ជាប់ និងការអភិវឌ្ឍហេដ្ឋារចនាសម្ព័ន្ធផ្លូវទឹក ផ្លូវសមុទ្រ និងកំពង់ផែ
• បានបញ្ចប់និងសម្ពោធដាក់ឱ្យប្រើប្រាស់ជាផ្លូវការ ចំណតផែកុងតឺន័រ នៃកំពង់ផែស្វយ័តក្រុង ព្រះសីហនុ ប្រវែង ២៥៣ម៉ែត្រ, កំពង់ផែពហុបំណងកំពត, ឃ្លាំងសន្និធិគយបណ្តោះអាសន្ន នៃចំណតផែកុងតឺន័រ LM១៧ ចំណតផែរណបពហុបំណង TS11 UM2 និង LM26 របស់ កំពង់ផែស្វយ័តភ្នំពេញ, ឃ្លាំងលើកដាក់និងស្តុកទំនិញត្រជាក់របស់ក្រុមហ៊ុន ខ្មែរ ខូល ឆេន ស្ថិតក្នុងបរិវេណចំណតផែកុងតឺន័រ LM17 របស់កំពង់ផែស្វយ័តភ្នំពេញ, និងការបើកឱ្យ ដំណើរការបណ្តោះអាសន្នកំពង់ផែទេសចរណ៍អន្តរជាតិខេត្តកំពត ដែលកំពង់ផែនេះគ្រោង នឹងសម្ពោធជាផ្លូវការក្រោមអធិបតីភាពដ៏ខ្ពង់ខ្ពស់ សម្តេចធិបតីនាយករដ្ឋមន្ត្រី នៅថ្ងៃ ទី៣ ខែមេសា ឆ្នាំ២០២៥ ខាងមុខនេះ។

បាននិងកំពុងដំណើរការអនុវត្តគម្រោង រួមមាន គម្រោងព្រែកជីកហ្វូណនតេជោ, គម្រោង អភិវឌ្ឍន៍ចំណតផែកុងតឺន័រទឹកជ្រៅថ្មី ជំហាន១ នៅកំពង់ផែស្វយ័តក្រុងព្រះសីហនុ, គម្រោង ជីកស្តារផ្លូវនាវាចរណ៍បន្ថែមនៅក្នុងខេត្តកោះកុង, គម្រោងសាងសង់នាវាសម្រាប់សិក្សាវាស់ស្ទង់ ផ្លូវទឹក, ការរៀបចំផែនការជាតិ ស្តីពីការកំណត់តំបន់អភិវឌ្ឍន៍កំពង់ផែនៅកម្ពុជា, ការចុះសិក្សា ប្រមូលទិន្នន័យ និងផលិតផែនទីនាវាចរណ៍សម្រាប់ការដឹកជញ្ជូនតាមផ្លូវទឹក និងផ្លូវសមុទ្រ។
គម្រោងត្រៀមអនុវត្ត រួមមាន ការសិក្សាលើគម្រោងអភិវឌ្ឍន៍ផែនការមេសម្រាប់ការដំឡើង សញ្ញាជំនួយនាវាចរណ៍តាមផ្លូវទឹកនៅក្នុងប្រព័ន្ធទន្លេមេគង្គ និងគម្រោងបូមស្តារទន្លេសាប (ភ្នំពេញ-កំពង់ឆ្នាំង) និងផ្លូវទឹកទន្លេសាប (ភ្នំពេញ-សៀមរាប)។ • ដោយឡែក កំពង់ផែស្វយ័តក្រុងព្រះសីហនុ បានត្រៀមអនុវត្តគម្រោងអភិវឌ្ឍន៍ចំណតផែ កុងតឺន័រទឹកជ្រៅថ្មី ជំហាន២ និងជំហាន៣ និងការរៀបចំផែនការមេ ដើម្បីអភិវឌ្ឍន៍ និងប្រែក្លាយ កំពង់ផែស្វយ័តក្រុងព្រះសីហនុទៅជាកំពង់ផែតំបន់ និងមជ្ឈមណ្ឌលឡូជីស្លឹក និងកំពង់ផែ ស្វយ័តភ្នំពេញក៏ត្រៀមអនុវត្តគម្រោងសាងសង់ចំណតផែរណបតាមដងទន្លេចំនួន ៧ទីតាំង បន្ថែមទៀត រួមមាន ទីតាំងព្រែកក្តាម ក្រុងកំពង់ឆ្នាំង កំពង់លែង ចុងឃ្លៀស សុវណ្ណភូមិ បឹងកេត និងស្រុកឆ្លូង ដើម្បីជំរុញការដឹកជញ្ជូនតាមផ្លូវទឹក។
ទី៣.ការតភ្ជាប់ និងការអភិវឌ្ឍហេដ្ឋារចនាសម្ព័ន្ធផ្លូវដែក
• បាននិងកំពុងអនុវត្តការងារអភិវឌ្ឍន៍ហេដ្ឋារចនាសម្ព័ន្ធផ្លូវដែក រួមមាន ការចរចាកិច្ចព្រមព្រៀង សម្បទានផ្លូវដែកថ្មី ជាមួយក្រុមហ៊ុនរ៉ូយ៉ាល់រេលវេ, ការរៀបចំសេចក្តីព្រាងអនុក្រឹត្យ ស្តីពី ការគ្រប់គ្រងផ្លូវឆ្លងកាត់ផ្លូវដែក និងដីចំណីផ្លូវដែក, ការដំឡើងផ្លាកសញ្ញាចរាចរណ៍នៅត្រង់ ចំណុចឆ្លងកាត់ផ្លូវដែកទាំង២ខ្សែចំនួន ៩៧១កន្លែង។
បាននិងកំពុងអនុវត្តអនុស្សរណៈយោគយល់គ្នា ស្តីពីការបង្កើតយន្តការកិច្ចសហប្រតិបត្តិការ ផ្លូវដែកកម្ពុជា-ចិន រវាងក្រសួងសាធារណការ និងដឹកជញ្ជូនកម្ពុជា និងគណៈកម្មាធិការ ជាតិអភិវឌ្ឍន៍និងកែទម្រង់នៃសាធារណរដ្ឋប្រជាមានិតចិន (NDRC) ដើម្បីជំរុញការងារ ចំនួន ៣ គឺ ការរៀបចំផែនការមេអភិវឌ្ឍន៍ផ្លូវដែក, ការពង្រឹងសមត្ថភាពមន្ត្រីបច្ចេកទេស ផ្លូវដែក និងការសិក្សាសមិទ្ធិលទ្ធភាពលើគម្រោងអាទិភាពផ្លូវដែក។
• បាននិងកំពុងសិក្សាគម្រោងត្រៀមអនុវត្ត រួមមាន ការសិក្សាសមិទ្ធិលទ្ធភាពលើគម្រោងផ្លូវ រថភ្លើងធុនស្រាលតភ្ជាប់ពីក្រុងសៀមរាបទៅអាកាសយានដ្ឋានអន្តរជាតិសៀមរាបអង្គរ, គម្រោងផ្លូវរថភ្លើងធុនស្រាលតភ្ជាប់ពីរាជធានីភ្នំពេញទៅអាកាសយានដ្ឋានអន្តរជាតិតេជោ ក្រុងតាខ្មៅ និងគម្រោងផ្លូវរថភ្លើងក្រោមដីរាជធានីភ្នំពេញ។
ទី៤.ការអភិវឌ្ឍហេដ្ឋារចនាសម្ព័ន្ធប្រព័ន្ធទឹកកខ្វក់

• បានបញ្ចប់ការសាងសង់បណ្តាញលូគ្រប់ប្រភេទ ដោយប្រើប្រាសថវិកាជាតិ មានប្រវែងសរុប ៤០ ៤៧៦ម៉ែត្រ ស្ថិតក្នុងខេត្តកំពង់ចាម បាត់ដំបង ពោធិ៍សាត់ ប៉ៃលិន តាកែវ ព្រៃវែង បន្ទាយមានជ័យ ស្វាយរៀង កណ្តាល និងព្រះសីហនុ និងសម្ពោធដាក់ឱ្យប្រើប្រាស់គម្រោង សាងសង់ទីលានចាក់សំរាមក្រុងក្រចេះ ក្រុងស្ទឹងត្រែង និងក្រុងកំពង់ចាម។
បានបញ្ចប់ការរៀបចំចងក្រងគំនូរប្លង់បទដ្ឋានបច្ចេកទេស និងប្រព័ន្ធគ្រប់គ្រងទិន្នន័យវិស័យ ប្រព័ន្ធចម្លោះទឹកកខ្វក់(GIS) នៅក្រុងកំពង់ឆ្នាំង ក្រុងកំពង់ចាម ក្រុងសិរីសោភ័ណ និង ក្រុងប៉ោយប៉ែត និងបានបញ្ចប់ការសិក្សាបុរេសមិទ្ធិលទ្ធភាពបណ្តាញលូទឹកកខ្វក់ចូលស្ថានីយ ប្រព្រឹត្តកម្មទឹកកខ្វក់ ក្នុងក្រុងព្រះសីហនុ។បាននិងកំពុងអនុវត្តគម្រោងវិនិយោគបន្ទាន់ហេដ្ឋារចនាសម្ព័ន្ធលូ និងប្រព័ន្ធរំដោះទឹកសម្រាប់ បញ្ចៀសការជន់លិចក្នុងភូមិសាស្រ្តរាជធានីភ្នំពេញ និងគម្រោងសាងសង់បណ្តាញលូគ្រប់ ប្រភេទ ដោយប្រើប្រាស់ថវិកាជាតិ ប្រវែងសរុបជាង ១១គ.ម ស្ថិតក្នុងខេត្តស្វាយរៀង បាត់ដំបង កណ្តាល តាកែវ និងកំពង់ចាម និងដោយប្រើប្រាស់ថវិកាដៃគូអភិវឌ្ឍន៍ ប្រវែង សរុប ៩៧៣គ.ម ក្នុងក្រុងបាវិត កំពង់ឆ្នាំង ពោធិ៍សាត់ បាត់ដំបង សិរីសោភ័ណ ប៉ោយប៉ែត កំពង់ធំ កំពត កំពង់ចាម ក្រចេះ និងស្ទឹងត្រែង រួមជាមួយនឹងគម្រោងស្តារស្ទឹងសៀមរាប គម្រោងអភិវឌ្ឍន៍ប្រព័ន្ធចម្លោះទឹកកខ្វក់នៅក្នុងក្រុងតាខ្មៅ (ជំហាន១), គម្រោងសាងសង់ ស្ថានីយប្រព្រឹត្តកម្មទឹកកខ្វក់ ចំនួន ១២កន្លែង និងទីលានទុកដាក់សំរាម ចំនួន ១៤កន្លែង នៅតាមបណ្តាខេត្តក្រុងសំខាន់ៗមួយចំនួនទៀត។
បាននិងកំពុងត្រៀមអនុវត្តគម្រោង រួមមាន គម្រោងអភិវឌ្ឍន៍ប្រព័ន្ធទឹកកខ្វក់ និងលូទឹកភ្លៀង បៃតងក្នុងក្រុងសៀមរាប, គម្រោងអភិវឌ្ឍន៍ប្រព័ន្ធចម្លោះទឹកកខ្វក់នៅក្នុងក្រុងតាខ្មៅ (ជំហាន២), គម្រោងអភិវឌ្ឍន៍ប្រព័ន្ធចម្លោះទឹកកខ្វក់ក្រុងច្បារមន ក្រុងព្រះសីហនុ និងក្រុងខេមរភូមិន្ទ និងគម្រោងសាងសង់ប្រព័ន្ធចម្លោះទឹកកខ្វក់ បណ្តាញលូ និងទីលានទុកដាក់សំរាមនៅតាម ក្រុងសំខាន់ៗមួយចំនួនទៀត ដូចជា ក្រុងតាខ្មៅ ច្បារមន ពោធិ៍សាត់ បាត់ដំបង សៀមរាប បាវិត ប៉ោយប៉ែត កំពត កែប និងក្រចេះ។
ទី៥.ការអភិវឌ្ឍហេដ្ឋារចនាសម្ព័ន្ធភស្តុភារកម្ម

• បានបញ្ចប់ការសិក្សា រួមមាន ការសិក្សាសមិទ្ធិលទ្ធភាពគម្រោងអភិវឌ្ឍន៍មជ្ឈមណ្ឌល ភស្តុភារកម្មភ្នំពេញ (PP-LC), ការសិក្សាសមិទ្ធិលទ្ធភាពគម្រោងផែនការគ្រប់ជ្រុងជ្រោយ នៃគម្រោងកែលម្អច្រកទ្វារព្រំដែនអន្តរជាតិត្រពាំងស្រែ, ការសិក្សាបុរេសមិទ្ធិលទ្ធភាពនៃ គម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងប៉ោយប៉ែត ខេត្តបន្ទាយមានជ័យ និងគម្រោង អភិវឌ្ឍន៍មណ្ឌលភស្តុភារកម្មតាមផ្លូវដែកភាគខាងជើង។
• បាននិងកំពុងសិក្សា រួមមាន ការសិក្សាសមិទ្ធិលទ្ធភាពគម្រោងអភិវឌ្ឍន៍មជ្ឈមណ្ឌលភស្តុភារកម្ម ក្រុងព្រះសីហនុ(SHV-LC) ដោយសហការជាមួយស្ថាប័នសាជីវកម្មហិរញ្ញវត្ថុអន្តរជាតិ (IFC), ការសិក្សាគម្រោងអភិវឌ្ឍន៍ហេដ្ឋារចនាសម្ព័ន្ធច្រកទ្វារព្រំដែនចំនួន ៤ ដូចជា ភ្នំដិន-ខេត្ត តាកែវ ត្រពាំងថ្លុង-ខេត្តត្បូងឃ្មុំ ត្រពាំងស្រែ-ខេត្តក្រចេះ និងអូយ៉ាដាវ-ខេត្តរតនគិរី, ការសិក្សា គម្រោងអភិវឌ្ឍន៍ហេដ្ឋារចនាសម្ព័ន្ធទីក្រុង នៅខេត្តគោលដៅចំនួន៤ រួមមាន ខេត្តកំពង់ឆ្នាំង កំពង់ចាម តាកែវ និងព្រៃវែង។
ត្រៀមអនុវត្តការងារអាទិភាព រួមមាន ជំរុញការចុះហត្ថលេខាលើកិច្ចព្រមព្រៀងភាពជាដៃគូ រវាងរដ្ឋ និងឯកជនគម្រោងអភិវឌ្ឍន៍មជ្ឈមណ្ឌលភស្តុភារកម្មភ្នំពេញ (PP-LC) ដើម្បីអាច ឈានទៅបើកការដ្ឋានសាងសង់នាពេលខាងមុខ និងជំរុញការអនុវត្តផែនការមេគ្រប់ជ្រុង ជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣ ដើម្បីកាត់បន្ថយតម្លៃឡូជីស្លឹក និងលើកកម្ពស់សមត្ថភាពប្រកួតប្រជែងរបស់កម្ពុជា។ III. យន្តការគន្លឹះគាំទ្រដល់ចក្ខុវិស័យរបស់ក្រសួង

ខ្ញុំបាទសូមគោរពជម្រាបជូន សម្តេចធិបតីនាយករដ្ឋមន្ត្រី មេត្តាជ្រាបដ៏ខ្ពង់ខ្ពស់បន្ថែមថា ដើម្បីពង្រឹងសមត្ថភាព និងសមិទ្ធកម្មស្ថាប័ន ក្នុងការលើកកម្ពស់គុណភាពការងារប្រកបដោយវិន័យ សីលធម៌ វិជ្ជាជីវៈ ប្រសិទ្ធភាព និងស័ក្តិសិទ្ធិភាព ក្រសួងបានបង្កើតនិងរៀបចំយន្តការសំខាន់ៗ

សម្រាប់គាំទ្រដល់ការអនុវត្តការងាររួមមាន៖

ទី១.ការងារកំណែទម្រង់អភិបាលកិច្ចផ្ទៃក្នុង និងលើកកម្ពស់សមត្ថភាព
ការបង្កើត និងរៀបចំយន្តការអនុវត្តការងារ រួមមាន បានបង្កើតគណៈកម្មការសម្របសម្រួល និងតម្រង់ទិសការគ្រប់គ្រង និងអនុវត្តគម្រោងហេដ្ឋារចនាសម្ព័ន្ធសាធារណការ និងដឹកជញ្ជូន, គណៈកម្មការរៀបចំគោលនយោបាយស្តីពីការអភិវឌ្ឍវិស័យដឹកជញ្ជូនផ្លូវគោក ផ្លូវទឹក ផ្លូវដែក និងឡូជីស្លឹកនៅកម្ពុជា, គណៈកម្មការចំពោះកិច្ចដោះស្រាយបញ្ហាប្រឈមចំពោះមុខពាក់ព័ន្ធ ការងារយានយន្តដឹកជញ្ជូនលើសទម្ងន់កម្រិតកំណត់, ក្រុមការងារកែទម្រង់រដ្ឋបាលសាធារណៈ សម្រាប់ដឹកនាំ និងសម្របសម្រួលក្នុងការពិនិត្យឡើងវិញការវិភាគមុខងារ និងរចនាសម្ព័ន្ធ របស់ក្រសួង, ក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈរបស់ក្រសួង, និងក្រុម ការងារតាមដាន ត្រួតពិនិត្យ និងវាយតម្លៃការអនុវត្តយុទ្ធសាស្ត្រ ផែនការអភិវឌ្ឍន៍ និង គោលនយោបាយនានារបស់ក្រសួងសាធារណការ និងដឹកជញ្ជូន៕

ដោយ៖ គង់ សិរីរ័ត្ន