AKPបន្ទាយមានជ័យថ្ងៃទី២៤ខែតុលាឆ្នាំ២០២៦--- លោក ឃ្លោក នួយ អភិបាលរងខេត្តបន្ទាយមានជ័យ តំណាងឯកឧត្តម អ៊ុ រាត្រី អភិបាល នៃគណៈអភិបាលខេត្ត បានថ្លែងអំណរគុណចំពោះអង្គការទស្សនៈពិភពលោកអន្តរជាតិ (World Vision) ដែលបានចូលរួមឧបត្ថម្ភស្បៀងអាហារជូនប្រជាពលរដ្ឋរងផលប៉ះពាល់ដោយទឹកជំនន់ចំនួន ១៣០ គ្រួសារ នៅស្រុកភ្នំស្រុក ខេត្តបន្ទាយ មានជ័យ ដោយចាត់ទុកថា ការចូលរួមពីអង្គការដៃគូ និងសប្បុរសជននានា រួមជាមួយរាជរដ្ឋាភិបាល និងអាជ្ញាធរមូលដ្ឋាន គឺជាកម្លាំងសំខាន់ក្នុងការជួយសម្រាលការលំបាក និងគាំទ្រជីវភាព រស់នៅរបស់ប្រជាពលរដ្ឋដែលទទួលរងផលប៉ះពាល់ពីគ្រោះធម្មជាតិ។

ការថ្លែងបែបនេះធ្វើឡើងក្នុងឱកាសដែលលោក ឃ្លោក នួយ អភិបាល រងខេត្ត តំណាងឯកឧត្តម អ៊ុ រាត្រី អភិបាលខេត្តបន្ទាយមានជ័យ បានអញ្ជើញជាអធិបតីក្នុងពិធីជួបសំណេះ សំណាល និងចែកស្បៀងអាហារជូនប្រជាពលរដ្ឋរងផលប៉ះពាល់ដោយទឹកជំនន់ចំនួន ១៣០គ្រួសារ ដែលរៀបចំដោយអង្គការទស្សនៈពិភពលោកអន្តរជាតិ (World Vision) នៅសាលា ស្រុកភ្នំស្រុក ខេត្តបន្ទាយមានជ័យ កាលពីរសៀលថ្ងៃទី២៣ ខែតុលា ឆ្នាំ២០២៦។ ពិធីនេះមានការចូលរួមពីលោកស្រី ចំរើន ដាណេ អភិបាលស្រុកភ្នំស្រុក តំណាងមន្ទីរ-អង្គភាពពាក់ព័ន្ធ ក្រុមការងារអង្គការទស្សនៈពិភពលោកអន្តរជាតិ ព្រមទាំងអាជ្ញាធរមូលដ្ឋាន និងអ្នកពាក់ព័ន្ធជាច្រើនរូបទៀត។

លោក ឃ្លោក នួយ បានថ្លែងអំណរគុណចំពោះអង្គការទស្សនៈពិភពលោកអន្តរ ជាតិ ដែលបានយកចិត្តទុកដាក់ និងផ្តល់ជំនួយស្បៀងអាហារដល់ប្រជាពលរដ្ឋដែលរងផលប៉ះពាល់ដោយទឹកជំនន់។ ការផ្តល់ជំនួយនេះបានបង្ហាញពីស្មារតីសាមគ្គីភាព ការចែករំលែក និងការយកចិត្តទុកដាក់ចំពោះសុខទុក្ខរបស់ប្រជាពលរដ្ឋដែលកំពុងជួបប្រទះការលំបាកក្នុងជីវភាពប្រចាំថ្ងៃ។ លោកបានគូសបញ្ជាក់ពីសារៈសំខាន់នៃកិច្ចសហការរវាងរាជរដ្ឋាភិបាល អាជ្ញាធរដែនដី អង្គការដៃគូអភិវឌ្ឍន៍ និងសប្បុ រសជននានា ក្នុងការរួមគ្នាដោះស្រាយបញ្ហាប្រឈមដែលកើតមានឡើងចំពោះប្រជាពលរដ្ឋ ជាពិសេសអ្នកដែលរងផលប៉ះពាល់ដោយគ្រោះធម្មជាតិ។ ការរួមកម្លាំងគ្នារវាងគ្រប់ភាគី មិនត្រឹមតែជួយផ្តល់ស្បៀងអាហារដើម្បីឆ្លើយតបនឹងតម្រូវការចំពោះមុខប៉ុណ្ណោះទេ ប៉ុន្តែក៏ជាការបង្ហាញពីការយកចិត្តទុកដាក់ និងការមិនទុកឱ្យប្រជាពលរដ្ឋដែលជួបការលំបាកប្រឈមមុខនឹងបញ្ហាតែម្នាក់ឯងផងដែរ។

សម្រាប់ប្រជាពលរដ្ឋដែលរងផលប៉ះពាល់ដោយទឹកជំនន់ ការទទួលបានជំនួយស្បៀងអាហារគឺជាការគាំទ្រដ៏មានសារៈសំខាន់មួយ ក្នុងការជួយសម្រាលបន្ទុកចំណាយ និងបំពេញតម្រូវការមូលដ្ឋានរបស់គ្រួសារ ខណៈដែលផល ប៉ះពាល់ពីគ្រោះធម្មជាតិអាចបង្កការលំបាកដល់ការរស់នៅ និងការប្រកបមុខរបរប្រចាំថ្ងៃ។ ការផ្តល់ស្បៀងអាហារដល់ប្រជាពលរដ្ឋចំនួន ១៣០គ្រួសារនាពេលនេះ ក៏បានឆ្លុះបញ្ចាំងពីតួនាទីរបស់អង្គការមនុស្សធម៌ក្នុងការបំពេញបន្ថែមលើកិច្ចខិតខំប្រឹងប្រែងរបស់អាជ្ញាធរមូលដ្ឋាន និងរាជរដ្ឋាភិបាល ក្នុងការឆ្លើយតប ទៅនឹងតម្រូវការរបស់ប្រជាពលរដ្ឋនៅតាមមូលដ្ឋានដែលទទួលរងផលប៉ះពាល់។ ជាមួយគ្នានេះ ការជួបសំណេះសំណាលដោយផ្ទាល់រវាងថ្នាក់ដឹកនាំ អាជ្ញាធរ អង្គការដៃគូ និងប្រជាពលរដ្ឋ ក៏ជាឱកាសមួយសម្រាប់បង្ហាញពីការយកចិត្តទុកដាក់ ស្តាប់ពីការលំបាក និងពង្រឹងទំនាក់ទំនងរវាងអ្នកផ្តល់ជំនួយ និងអ្នកទទួលផល ដើម្បីឱ្យការជួយឧ បត្ថម្ភឆ្លើយតបកាន់តែប្រសើរទៅនឹងតម្រូវការជាក់ស្តែងរបស់ប្រជាពលរដ្ឋ។

សកម្មភាពនេះបានបញ្ជាក់ពីសារៈសំខាន់នៃការរួបរួមកម្លាំង និងការចែករំលែកធនធានរវាងគ្រប់ភាគី ដើម្បីជួយសម្រាលទុក្ខលំបាករបស់ប្រជាពលរដ្ឋក្នុងគ្រាដែលពួកគេជួបប្រទះវិបត្តិ។ ការផ្តល់ជំនួយទាន់ពេលវេលា ការយកចិត្តទុកដាក់ចំពោះតម្រូវការជាក់ស្តែង និងការពង្រឹងកិច្ចសហការរវាងអាជ្ញាធរ និងអង្គការដៃគូ គឺជាកត្តាសំខាន់ក្នុងការគាំទ្រដល់ការស្តារជីវភាព និងការបង្កើនភាពធន់របស់សហគមន៍ចំពោះគ្រោះធម្មជាតិនាពេលអនាគត។ តាមរយៈសកម្មភាពនេះ ការចូលរួមរបស់អង្គការទស្សនៈពិភពលោកអន្តរជាតិ រួមជាមួយការសម្របសម្រួលពីថ្នាក់ដឹកនាំខេត្ត អាជ្ញាធរស្រុក និងមូលដ្ឋាន បានបង្ហាញពីស្មារតីមនុស្សធម៌ និងការយកចិត្តទុកដាក់ចំពោះសុខទុក្ខរបស់ប្រជាពលរដ្ឋ ដែលជាកម្លាំងចាំបាច់ក្នុងការជួយឱ្យគ្រួសាររងគ្រោះអាចឆ្លងកាត់ការលំបាក និងបន្តកសាងជីវភាពរស់នៅរបស់ខ្លួនឡើងវិ ញ៕

ដោយ ៖ឈុនសារ៉ាត