AKP សៀមរាប ថ្ងៃទី០៨ ខែមករា ឆ្នាំ២០២៥-- ឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប បានដាក់ចេញនូវបទបញ្ជាដល់អាជ្ញាធរក្រុង ស្រុក និងកងកម្លាំងសមត្ថកិច្ចទាំងអស់ ជាពិសេសអាជ្ញាធរក្រុង ស្រុកដែលមានភូមិសាស្ត្រជាប់បឹងទន្លេសាប ត្រូវតែអនុវត្តឱ្យខាងតែបាន ចំពោះរាល់បទល្មើសដែលតែងកើតមានឡើងនៅក្នុងមូលដ្ឋានរបស់ខ្លួន ចំពោះបុគ្គលណាដែលបំពានកាប់រានទន្ទ្រាយព្រៃលិចទឹកនៅតំបន់បី បឹងទន្លេសាប និងជម្រកព្រៃឈើនៃតំបន់ឧទ្យានជាតិ ជននោះត្រូវទទួលទោលទៅតាមផ្លូវច្បាប់ ព្រោះថារាជរដ្ឋាភិបាលក៏ត្រូវបានបញ្ចប់នូវការកាត់ឆ្វៀលដីនៅតំបន់បីបឹងទន្លេសាបរួចរាល់ផងដែរ។

ឯកឧត្តម ប្រាក់ សោភ័ណ បានដាក់ចេញនូវបទបញ្ជានេះឡើងក្នុងខណៈពេលដែលឯកឧត្តមបានចូលរួមក្នុងកិច្ចប្រជុំសាមញ្ញលើកទី៨ របស់ក្រុមប្រឹក្សាខេត្ត អាណត្តិទី៤ នៅសាលប្រជុំសាលាខេត្តសៀមរាប នាថ្ងៃទី០៨ ខែមករា ឆ្នាំ២០២៥នេះ ក្រោមអធិបតីភាពរបស់ឯកឧត្តម លី សំរិទ្ធ ប្រធានក្រុមប្រឹក្សាខេត្ត ដោយមានការចូលរួមពីឯកឧត្តម លោកជំទាវ ជាសមាជិកក្រុមប្រឹក្សាខេត្ត អស់លោកលោកស្រីជាគណៈអភិបាលខេត្ត នាយក នាយករងរដ្ឋបាលសាលាខេត្ត ទីចាត់ការ និងអង្គភាពចំណុះសាលាខេត្ត ថ្នាក់ដឹកនាំមន្ទីរ អង្គភាព អាជ្ញាធរក្រុង ស្រុកដែលចំណុះឱ្យខេត្តសៀមរាបផងដែរ។

ក្រៅពីដាក់ចេញនូវបញ្ជាខាងលើ ឯកឧត្តម ប្រាក់ សោភ័ណ ក៏បានក្រើនរំលឹកផងដែរដល់មន្ត្រីថ្នាក់ដឹកនាំ កងកម្លាំងទាំងអស់ ត្រូវធ្វើការណែនាំ អប់រំដល់កូនចៅ បងប្អូនសាច់ញ្ញាតិរបស់ខ្លួន ត្រូវជៀសឱ្យឆ្ងាយពីគ្រឿងញៀន និង ក្រុមក្មេងទំនើង ព្រមទាំងបញ្ហាផ្សេងៗ សំដៅលុប បំបាត់ឱ្យអស់នូវប្រពៃណីអន្តរាគមន៍។ តែឯកឧត្តមបានធ្វើការកោតសរសើរផងដែរ ចំពោះកងកម្លាំងទាំងបី ដែលបានយកចិត្តទុកដាក់ខ្ពស់លើការងារសន្តិសុខសណ្តាប់ធ្នាប់ សុវត្តិភាព និងបរិស្ថាន ក្នុងការលើកកម្ពស់ដល់វិស័យទេសចរណ៍ ក្នុងខេត្តសៀមរាប ដែលធ្វើឱ្យប្រជាពលរដ្ឋ និងភ្ញៀវទេសចរជាតិ អន្តរជាតិមានការជឿជាក់ដល់ការដឹកនាំរបស់រាជរដ្ឋាភិបាល នីតិកាលទី៧នៃរដ្ឋសភា ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ឯកឧត្តម លី សំរិទ្ធ ប្រធានក្រុមប្រឹក្សាខេត្តក៏បានឯកភាពនូវការចេញបទបញ្ជារបស់ឯកឧត្តមអភិបាលខេត្តថា ជាវិធានការដ៏ល្អក្នុងការអនុវត្តច្បាប់នៅថ្នាក់ក្រោមជាតិ។ ហើយបានធ្វើការវាយតម្លៃខ្ពស់ ចំពោះលទ្ធផល ដែលរដ្ឋបាលខេត្តសៀមរាប សម្រេចបានប្រចាំឆ្នាំ២០២៤។ ហើយឯកឧត្តមប្រធានក្រុមប្រឹក្សាខេត្ត ក៏បានធ្វើការណែនាំនិងផ្តល់នូវអនុសាសន៍ល្អៗមួយចំនួន ដល់សមាជិកសមាជិកាក្រុមប្រឹក្សាខេត្ត ក្នុងអាណត្តិទី៤ ត្រូវចូលរួមសហការគ្នាឱ្យបានល្អ ក្នុងការអនុវត្តគោលនយោបាយបញ្ចកោណដំណាកាលទី១ របស់រាជរដ្ឋាភិបាលក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ឱ្យសម្រេចជោគជ័យ ដើមី្បបម្រើដល់ផលប្រយោជន៍របស់ប្រជាពលរដ្ឋ។

ឯកឧត្តម លី សំរិទ្ធ បានឱ្យដឹងថា កំណើនសេដ្ឋកិច្ចរបស់ខេត្តនៅឆ្នាំ២០២៥ និងអាចសម្រេចបាន ដោយសារការរំពឹងទុកនៃការត្រឡប់មករកភាពល្អប្រសើរឡើងវិញនៃតម្រូវការខាងក្រៅ និងទំនុកចិត្តរបស់អ្នកវិនិយោគ ស្របពេលដែលសកម្មភាពសេដ្ឋកិច្ចក្នុងស្រុកនៅបន្តរក្សាបាននូវតុល្យភាព។ ហើយវិស័យទេសចរណ៍នៅខេត្តសៀមរាបបានចាប់ផ្តើមមានកំណើនជាបណ្តើរៗឡើងវិញគួរឱ្យកត់សម្គាល់ និងសំដៅធ្វើការអភិវឌ្ឍខេត្តលើគ្រប់ហេដ្ឋារចនាសម្ព័ន្ត សមស្របជាខេត្តគោលដៅទេសចរណ៍ វប្បធម៌ធម្មជាតិប្រវត្តិសាស្ត្រ៕

ដោយ ហង្ស សៀក