AKP កំពង់ធំថ្ងៃទី២៧ខែតុលាឆ្នាំ២០២៦--ឯកឧត្តម ឈា ប៊ុនរិទ្ធិបានមានប្រសាស​ន៍លើកឡើងថា"អង្គបីដ៏មានសក្តានុពលក្នុងការជ្រើសរើសបេក្ខជនឈរឈ្មោះជាមេឃុំគឺ បេក្ខជន អង្គបោះឆ្នោតនិងក្រុមការងារ"។

ឯកឧត្តមឈា ប៊ុនរិទ្ធិ រដ្ឋលេខាធិការក្រសួងធនធានទឹកនិងឧតុនិយមនិងជាប្រធានក្រុមការងារចុះមូលដ្ឋានឃុំ ម្សាក្រង ស្រុកស្ទោង ខេត្តកំពង់ធំបានលើកឡើងដូច្នេះក្នុងឱកាសបោះឆ្នោតផ្ទៃក្នុងនិងការស្ទាបស្ទង់មតិជាសម្ងាត់ដើម្បីជ្រើសរើសនិងផ្ទៀងផ្ទាត់បញ្ជីឈ្មោះបេក្ខភាពឈរឈ្មោះបោះឆ្នោតក្រុមប្រឹក្សាឃុំ-សង្កាត់ របស់គណបក្ស ប្រជាជនកម្ពុជាក្នុងឃុំ ម្សាក្រង ស្រុកស្ទោង ខេត្តកំពង់ធំកាលពីរសៀលថ្ងៃទី២៦ខែតុលាឆ្នាំ២០២៦នៅស្នាក់ការគណបក្សប្រជាជនកម្ពុជាឃុំម្សាក្រង។

ឯកឧត្តមបានសង្កត់ធ្ងន់ថាបេក្ខជនគ្រប់រូបត្រូវតែជាបុគ្គលដែលសមត្ថភាពនិងគុណធម៌ផ្ទាល់ខ្លួន ភាពស្មោះត្រង់ជាមនុស្សដែលមានការគោរពស្រឡាញ់ពីប្រជាពលរដ្ឋ មានតម្លាភាពគ្មានប្រវត្តិពុករលួយ ឬប្រព្រឹត្តអំពើអាក្រក់ក្នុងសង្គមមានគំនិតផ្តួចផ្តើម ចេះសម្រប​សម្រួលដោះស្រាយវិវាទមូលដ្ឋាននិងមានភាពក្លាហានក្នុងការសម្រេចចិត្តដើម្បីផលប្រយោជន៍រួម យល់ពីតម្រូវការជាក់ស្តែងរបស់ប្រជាពលរដ្ឋក្នុងឃុំ ព្រមទាំងមានចំណេះដឹងទាក់ទងនឹងការគ្រប់គ្រងរដ្ឋបាលឃុំ-សង្កាត់និងត្រៀមខ្លួនជាស្រេចក្នុងការបម្រើប្រជាពលរដ្ឋគ្រប់ពេលវេលា ដោយមិនលំអៀង។

ជាមួយគ្នានេះអង្គបោះឆ្នោតត្រូវមានការពិចារណាប្រកបដោយសុភវិនិច្ឆ៍យក្នុងការជ្រើសរើសបេក្ខជនឈរឈ្មោះជាមេឃុំគឺវាយតម្លៃពីស្នាដៃនិងសកម្មភាពការងារកន្លងមកថាតើបេក្ខជនធ្លាប់ធ្វើការងារសង្គមឬជួយដល់សហគមន៍អ្វីខ្លះកន្លងមក? តើគាត់ជាមនុស្សដែលពូកែស្តាប់ឬជាមនុស្សផ្តាច់ការពិនិត្យមើលទំនាក់ទំនងល្អជាមួយសហគមន៍ឬជិតស្និទ្ធជាមួយប្រជាពលរដ្ឋយល់ពីទុក្ខលំបាក និងចេះរួមសុខរួមទុក្ខជាមួយមូលដ្ឋានពិនិត្យមើលសីលធម៌រស់នៅការប្រកបរបរចិញ្ចឹមជីវិតនិងការផ្ដល់ទំនុកចិត្តពីសំណាក់អ្នកជិតខាងមិនត្រូវជ្រើសរើសដោយសារតែការស្រលាញ់បណ្តោះអាសន្នឬការជះឥទ្ធិពលណាមួយឡើយ ប៉ុន្តែត្រូវមើលលើលទ្ធភាពដែលគាត់អាចអភិវឌ្ឍឃុំឱ្យរីកចម្រើនបានពិតប្រាកដ។

លើសពីនេះគឺការសម្របសម្រួលនិងការសម្រេចរបស់ក្រុមការងារក្នុងការតែងតាំងបេក្ខជនដែលទទួលបានពីការបោះឆ្នោតស្ទាបស្ទង់ ហើយក្រុមការ​ងារបានចុះស្រាវជ្រាវនិងស្តាប់មតិយោប​ល់ពីប្រជាពលរដ្ឋ ឬសមាជិកបក្សនៅមូលដ្ឋានដើម្បីដឹងថា,តើបេក្ខជនរូបណាដែលទទួលបានការគាំទ្រខ្លាំងជាងគេនិងមានប្រជាប្រិយភាពពិតប្រាកដ? ក្រោមការពិភាក្សានិងប្រជុំផ្ទៃក្នុងដើម្បីពិនិត្យបញ្ជីឈ្មោះបេក្ខជនសក្តានុពល ដោយប្រៀបធៀបលើសមត្ថភាព ក្រមសីលធម៌ និងការទទួលយកបានពីមហាជន ដោយឈរលើគោលការណ៍តម្លាភាពនិងលទ្ធិប្រ​ជាធិបតេយ្យ ដោយតម្កល់ផលប្រ​យោជន៍រួម និងការឈ្នះឆ្នោតជាធំមិនត្រូវលំអៀងទៅតាមបក្ខពួកនិយមឡើយ។

សូមបញ្ជាក់ថាឃុំបន្ទាយម្សាក្រងមានសមាជិកក្រុមប្រឹក្សាឃុំសរុបចំនួន៧រូប ហើយអង្គបោះឆ្នោតដែលត្រូវបោះឆ្នោតស្ទាបស្ទង់ថ្ងៃនេះមានចំនួន៣៩៨នាក់ដែលបេក្ខជនឈរឈ្មោះមាន១៧រូបហើយអង្គបោះឆ្នោតត្រូវបោះឆ្នោតជ្រើសរើសយក៧រូប៕

ដោយ៖​ស៊ុម វណ្ណា