AKP ភ្នំពេញ ថ្ងៃទី ២៣ ខែ តុលា ឆ្នាំ ២០២៦– វេទិកា និងពិព័រណ៍កសិកម្ម ២០២៦ ឬហៅថា” CAFE 26” គឺបាននាំមកនូវការជួបជុំគ្នារវាងកសិករ អាជីវករ អ្នកវិនិយោគ ស្ថាប័នហិរញ្ញវត្ថុ អ្នកច្នៃប្រឌិត យុវជន និងដៃគូអភិវឌ្ឍន៍ទាំងក្នុង និងក្រៅប្រទេស ជួបជជែក ពិភាក្សាពីការវិនិយោគ និងភាពជាដៃគូអាជីវកម្ម រហូតដល់បច្ចេកវិទ្យាថ្មីៗ ការច្នៃប្រឌិត និងឱកាសទីផ្សារលើវិស័យកសិកម្ម ។

ព្រឹត្តិការណ៍ វេទិកា និងពិព័រណ៍កសិកម្មកម្ពុជា លើកទី២ (CAFE26) រៀបចំដោយ ក្រសួងកសិកម្ម រុក្ខាប្រមាញ់ និងនេសាទ ចាប់ផ្តើមបើកដំណើរការជាផ្លូវការនៅថ្ងៃនេះ គឺថ្ងៃទី២៣ ដល់ថ្ងៃទី២៥ ខែតុលា ឆ្នាំ២០២៦ នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ។

វេទិកា និងពិព័រណ៍កសិកម្ម «CAFE 26»នេះដែរ បានផ្ដោតលើវេទិកាសំខាន់ៗដូចជាការជជែក អំពី “កសិស្បៀងអាហារ” ជាមួយ វាគ្មិនល្បីៗ ដើម្បីពិនិត្យមើលថា កសិផលកម្ពុជា មានស្តង់ដារអនាម័យល្អកម្រិតណា ហើយធ្វើដូចម្តេចដើម្បីអាចពង្រីកខ្លួន កាន់តែធំនៅលើទីផ្សារជាតិ និងអន្ដរជាតិ។

យោងតាមរបាយការណ៍បានបញ្ជាក់ថាវេទិកា” CAFE 26” ក៏នឹងបង្ហាញពីភូតគាមអនាម័យចំណីអាហារ និងបញ្ហាផ្លុវច្បាប់ ,បញ្ហាខ្សែច្រវ៉ាក់ផ្គត់ផ្គង់ និងក៏ដូចជាការផ្ដល់ឥណទានសម្រាប់ដំណើរការច្រវ៉ាក់ផលិតកម្ម ជាដើម។ក្រៅពីនេះក៏មានការចូលរួមជាគណៈអធិបតី វាគ្មិនពិសេស និងចូលរួមទស្សនាពិព័រណ៍កសិកម្មស្បៀងអាហារ ផលិតផលរាប់រយស្ដង់។

គួរបញ្ជាក់វេទិការ” CAFE 26” នាឆ្នាំនេះមានស្ដង់ប្រមាណ ៤០០ បង្ហាញកសិផលយុទ្ធសាស្ត្រ និងផលិតផលកែច្នៃ ដោយមានគោលបំណងជំរុញពាណិជ្ជកម្ម ទាក់ទាញការវិនិយោគ និងលើកកម្ពស់បច្ចេកវិទ្យាក្នុងវិស័យកសិកម្មនាយុគសម័យថ្មី៕

ដោយ៖ មករា