AKP ភ្នំពេញ ថ្ងៃទី២១ ខែតុលា ឆ្នាំ២០២៦ -- យោងតាមការរាយការណ៍របស់ស្ថានីយទូរទស្សន៍ Channel 12 របស់អ៊ីស្រាអែលកាលពីថ្ងៃអង្គារដោយដកស្រង់ប្រភពដែលដឹងពីបញ្ហាបានឱ្យដឹងថា រដ្ឋមន្ត្រីក្រសួងការពារជាតិសហរដ្ឋអាមេរិក លោក ផេតេ ហេកសេត (Pete Hegseth) បានធ្វើដំណើរទស្សនកិច្ចដោយមិនបានប្រកាសទុកជាមុនទៅកាន់ប្រទេសអ៊ីស្រាអែលកាលពីថ្ងៃចន្ទ ហើយបានជួបជាមួយនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ។

យោងតាមវិទ្យុយោធាអ៊ីស្រាអែល បានឱ្យដឹងថា ការជួបពិភាក្សានេះបានធ្វើឡើងនៅមូលដ្ឋានយោធាមួយក្នុងភាគខាងត្បូងប្រទេសអ៊ីស្រាអែល។ ការិយាល័យរបស់លោក ណេតាន់យ៉ាហ៊ូ មិនបានផ្តល់ការអត្ថាធិប្បាយភ្លាមៗចំពោះសេចក្តីរាយការណ៍នេះទេ។

ក្រសួងការពារជាតិសហរដ្ឋអាមេរិកមិនបានប្រកាសអំពីដំណើរទស្សនកិច្ចនេះទេ ហើយការិយាល័យរបស់លោក ហេកសេត ក៏បានបដិសេធមិនផ្តល់ការអត្ថាធិប្បាយនៅពេលដំបូងឡើយ។

បន្ទាប់ពីមានសេចក្តីរាយការណ៍ទាំងនេះ លោក ហេកសេត បានបង្ហោះសារនៅលើបណ្តាញសង្គមអ៊ិចថា លោកបានទៅជួបកងទ័ពសហរដ្ឋអាមេរិកដែលស្ថិតនៅក្រោមបញ្ជាការកណ្តាលសហរដ្ឋអាមេរិក ព្រមទាំងបានចែករំលែករូបភាពមួយចំនួនពីដំណើរទស្សនកិច្ចនោះ។ លោកបានសរសេរថា៖ «ដូចរាល់ដងដែរ វាពិតជាកិត្តិយសណាស់ដែលបានទៅជួបយុទ្ធជនរបស់យើងនៅបញ្ជាការកណ្តាលថ្ងៃនេះ។ ពួកគេគឺជាធនធានដ៏ល្អបំផុតរបស់ប្រទេសយើង ដែលកំពុងបំពេញបេសកកម្មដ៏មានសារៈសំខាន់ជាប្រវត្តិសាស្ត្រ។ សូមព្រះប្រទានពរឱ្យពួកគេមានសុវត្ថិភាព»។

ដំណើរទស្សនកិច្ចនេះធ្វើឡើង ៨ថ្ងៃមុនការបោះឆ្នោតជាតិរបស់អ៊ីស្រាអែល ដែលក្នុងនោះលោក ណេតាន់យ៉ាហ៊ូ ក៏បានឈរឈ្មោះសម្រាប់ការកាន់តំណែងមួយអាណត្តិទៀតផងដែរ។

លើសពីនេះ ដំណើរទស្សនកិច្ចនេះកើតឡើងចំពេលដែលមានភាពតានតឹងកើនឡើងរវាងទីក្រុងវ៉ាស៊ីនតោន និងទីក្រុងតេអេរ៉ង់ (ប្រទេសអ៊ីរ៉ង់) ព្រមទាំងមានការពិភាក្សារវាងសហរដ្ឋអាមេរិក និងអ៊ីស្រាអែល អំពីលទ្ធភាពនៃការបន្តប្រតិបត្តិការយោធាប្រឆាំងនឹងប្រទេសអ៊ីរ៉ង់៕

ដោយ៖ មូល មិនា (ប្រភព៖ ស៊ីនហួ)