AKP ភ្នំពេញ ថ្ងៃទី៥ ខែតុលា ឆ្នាំ២០២៦--អង្ករខ្មែរចំនួន ២០,០០០តោន តម្លៃជាង១០លានដុល្លារកំពុងដឹកចេញតាមនាវាពីកំពង់ផែពហុបំណងខេត្តកំពត ឆ្ពោះទៅកាន់កំពង់ផែចំនួន៤ នៅប្រទេសហ្វីលីពីន ។បើយោងតាមសេចក្តីប្រកាសព័ត៌មានរបស់ក្រុមហ៊ុន ស៊ីកនេតឈ័រ រាយស៍(Signature Rice )បានឱ្យដឹងថា រយៈពេល៥ថ្ងៃ ចាប់ពីថ្ងៃទី១ ដល់ថ្ងៃទី៥ ខែតុលា ឆ្នាំ២០២៦នេះ អង្កររាប់ម៉ឺនបាវត្រូវបានលើកដាក់ឡើងនាវា ដើម្បីដឹកចេញទៅកាន់កំពង់ផែ Subic, Cagayan de Oro, Zamboanga និង Bataan របស់ហ្វីលីពីន។ ការនាំចេញនេះធ្វើឡើងដោយក្រុមហ៊ុនខ្មែរស៊ីកនេតឈ័រ រាយស៍ ដែលកំពុងពង្រីកការផ្គត់ផ្គង់អង្ករកម្ពុជាទៅកាន់ទីផ្សារហ្វីលីពីនក្នុងបរិមាណកាន់តែធំ ។

លោក ចាន់ ពេជ្រ នាយកគ្រប់គ្រងក្រុមហ៊ុនស៊ីកនេតឈ័រ រាយស៍ បានលើកឡើងថា ៖ « ហ្វីលីពីនជាទីផ្សារដែលមានតម្រូវការអង្ករធំ ហើយយើងមើលឃើញឱកាសសម្រាប់អង្ករកម្ពុជាច្រើនជាងអ្វីដែលយើងកំពុងនាំចេញសព្វថ្ងៃ ។ អ្វីដែលយើងកំពុងធ្វើ គឺបង្កើតផ្លូវផ្គត់ផ្គង់ដែលអាចដឹកបានច្រើន ជាប្រចាំ និងមានភាពប្រកួតប្រជែង ដើម្បីឱ្យអង្ករកម្ពុជាអាចចាប់យកចំណែកទីផ្សារនេះបានកាន់តែធំ » ។

លោកថា សម្រាប់អង្ករ២០,០០០តោននេះ គ្រាន់តែជាមួយភាគបីនៃផែនការរបស់ក្រុមហ៊ុនសម្រាប់ត្រីមាសចុងក្រោយនេះប៉ុណ្ណោះ។ស៊ីកនេតឈ័រ រាយស៍ ដាក់គោលដៅនាំចេញទៅហ្វីលីពីនឱ្យបាន ៦០, ០០០តោនត្រឹមចុងឆ្នាំ២០២៦ ដោយគ្រោងបញ្ជូន ៤០,០០០តោនទៀតក្នុងខែវិច្ឆិកា និងធ្នូ ។ នៅឆ្នាំ២០២៧ ក្រុមហ៊ុនគ្រោងបង្កើនការនាំចេញទៅទីផ្សារនេះដល់ប្រមាណ ១០០,០០០តោន ។

លោក ចាន់ ពេជ្រ បានឱ្យដឹងបន្ថែមថា៖ការដាក់គោលដៅនេះកើតឡើងនៅពេលហ្វីលីពីនកំពុងស្រូបយកអង្ករខ្មែរកាន់តែច្រើន។ទិន្នន័យសហព័ន្ធស្រូវអង្ករកម្ពុជាបង្ហាញថា ការនាំចេញអង្ករកម្ពុជាទៅហ្វីលីពីនបានកើនពីត្រឹម ១,៦២០តោនក្នុងខែមករា ដល់ ៣៥,៤៥០តោនក្នុងខែកញ្ញា ។ ក្នុងរយៈពេល៩ខែដំបូងឆ្នាំ២០២៦ ទីផ្សារនេះទិញអង្ករកម្ពុជាសរុប ១៥៧,៥៥២តោន ស្ទើរតែស្មើនឹងវៀតណាមដែលទិញ ១៥៩,៩៤៦តោនក្នុងរយៈពេលដូចគ្នា។

លោក ចាន់ ពេជ្រ បានមើលឃើញហ្វីលីពីនជាទីផ្សារដែលកម្ពុជា គួរតម្រង់គោលដៅ បង្កើតការផ្គត់ផ្គង់ជាប្រចាំ និងរយៈពេលវែង ដើម្បីឱ្យអង្ករកម្ពុជាមានចំណែកកាន់តែធំនៅក្នុងប្រទេសនេះ។ស៊ីកនេតឈ័រ រាយស៍ បានចាប់ផ្តើមនាំចេញអង្ករកម្ពុជាតាំងពីឆ្នាំ២០០៩ និងបច្ចុប្បន្នមានទីផ្សារនៅ ៣៦ប្រទេសក្នុងទ្វីបចំនួន៤ ។

គួរបញ្ជាក់ផងដែរថា តាមទិន្នន័យសហព័ន្ធស្រូវអង្ករកម្ពុជា ក្រុមហ៊ុន ស៊ីកនេតឈ័រ រាយស៍ បាននាំចេញអង្ករ ៤៣,៥៤០តោនក្នុងរយៈពេល៩ខែដំបូងឆ្នាំ២០២៦ ឈរលំដាប់ទី៥ ក្នុងចំណោមក្រុមហ៊ុននាំចេញអង្ករកម្ពុជា ។

ការពង្រីកទីផ្សារទៅហ្វីលីពីនបានកើតឡើងក្រោយកម្ពុជា និងហ្វីលីពីនបានចុះអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការកសិកម្មនៅទីក្រុងម៉ានីល កាលពីខែកុម្ភៈ ឆ្នាំ២០២៥ ដែលបានបង្កើតមូលដ្ឋានសម្រាប់ការពង្រីកពាណិជ្ជកម្មកសិកម្មរវាងប្រទេសទាំងពីរ ៕

ដោយ មករា