AKP ភ្នំពេញ ថ្ងៃទី២៨ ខែកញ្ញា ឆ្នាំ២០២៦

ក្នុងឱកាសចូលរួមអបអរសាទរ ទិវាទេសចរណ៍ពិភពលោក (World Tourism Day) នៅទីក្រុងវ៉ារណា សាធារណរដ្ឋប៊ុលហ្គារី ឯកឧត្តម ជា ច័ន្ទបរិបូរណ៍ ឯកអគ្គរាជទូតនៃព្រះរាជាណាចក្រកម្ពុជា ប្រចាំសាធារណរដ្ឋប៊ុលហ្គារី បានបន្តខិតខំប្រឹងប្រែងយ៉ាងសកម្ម ក្នុងការពង្រឹងទំនាក់ទំនង និងជំរុញកិច្ចសហប្រតិបត្តិការរវាងកម្ពុជា និងប៊ុលហ្គារី តាមរយៈការជួបពិភាក្សា និងផ្លាស់ប្តូរយោបល់ជាមួយ ឯកឧត្តម បណ្ឌិត Ilin Dimitrov ស្តីពីការអភិវឌ្ឍវិស័យទេសចរណ៍ និងកិច្ចសហប្រតិបត្តិការរវាងប្រទេសទាំងពីរ។

ក្នុងជំនួបនេះ ឯកឧត្ដម ជា ច័ន្ទបរិបូរណ៍ បានពាំនាំការសាកសួរសុខទុក្ខ និងសេចក្តីរាប់អានដ៏កក់ក្តៅពី ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ នៃព្រះរាជាណាចក្រកម្ពុជា ជូនចំពោះ ឯកឧត្តម បណ្ឌិត Ilin Dimitrov។ តាមរយៈឯកឧត្ដមឯកអគ្គរាជទូតចំពោះការពាំនាំសារនេះបានបង្ហាញពីការយកចិត្តទុកដាក់របស់ភាគីកម្ពុជា ក្នុងការរក្សា និងពង្រឹងទំនាក់ទំនងជាមួយភាគីប៊ុលហ្គារី។

ក្នុងឱកាសនោះដែរឯកឧត្តមឯកអគ្គរាជទូត ក៏បានជួបពិភាក្សាជាមួយតំណាង សមាគមទេសចរណ៍ប៊ុលហ្គារី ដើម្បីស្វែងរកលទ្ធភាពថ្មីៗ និងជំរុញការអនុវត្តកិច្ចសហប្រតិបត្តិការទេសចរណ៍ឱ្យកាន់តែមានប្រសិទ្ធភាព។ ក្នុងជំនួបនោះ ភាគីទាំងពីរបានបញ្ជាក់ពីបំណងបន្ត និងពង្រឹងកិច្ចសហប្រតិបត្តិការ ក្នុងការផ្សព្វផ្សាយគោលដៅទេសចរណ៍កម្ពុជា និងរៀបចំកញ្ចប់ទេសចរណ៍ទៅកាន់ព្រះរាជាណាចក្រកម្ពុជា សម្រាប់ទីផ្សារទេសចរណ៍ប៊ុលហ្គារី។

តាមរយៈការខិតខំប្រឹងប្រែង និងការចូលរួមយ៉ាងសកម្មរបស់ឯកឧត្តម ឯកអគ្គរាជទូត និងស្ថានឯកអគ្គរាជទូតកម្ពុជា ក្នុងការផ្សព្វផ្សាយសក្តានុពលទេសចរណ៍កម្ពុជា ការផ្សព្វផ្សាយ និងការរៀបចំកញ្ចប់ទេសចរណ៍ទៅកាន់ព្រះរាជាណាចក្រកម្ពុជា នៅទីផ្សារទេសចរណ៍ប៊ុលហ្គារី ក្នុងរយៈពេលឆ្នាំ២០២៥ និងឆ្នាំ២០២៦ បានកើនឡើងជាលំដាប់។

ឯកឧត្ដម ជា ច័ន្ទបរិបូរណ៍ បានកត់សម្គាល់ឃើញថា និន្នាការនេះបង្ហាញពីការចាប់អារម្មណ៍កាន់តែខ្លាំងរបស់ភ្ញៀវទេសចរប៊ុលហ្គារី ចំពោះគោលដៅទេសចរណ៍កម្ពុជា និងជាលទ្ធផលនៃកិច្ចខិតខំប្រឹងប្រែងជាបន្តបន្ទាប់ ក្នុងការលើកកម្ពស់ការយល់ដឹងអំពីសក្តានុពលទេសចរណ៍ វប្បធម៌ បេតិកភណ្ឌ ប្រវត្តិសាស្ត្រ និងភាពសម្បូរបែបរបស់ព្រះរាជាណាចក្រកម្ពុជា។ បន្ថែមពីនេះទៀត តំណាងស្ថាប័នឧត្តមសិក្សាផ្នែកទេសចរណ៍នៅប៊ុលហ្គារី បានសម្តែងបំណងអញ្ជើញ ឯកឧត្តម ឯកអគ្គរាជទូត ឱ្យធ្វើបទបង្ហាញជូននិស្សិត ស្តីពី ប្រវត្តិសាស្ត្រ វប្បធម៌ អរិយធម៌ បេតិកភណ្ឌ និងសក្តានុពលទេសចរណ៍របស់កម្ពុជា។

ឯកឧត្ដមឯកអគ្គរាជទូតបានគូសបញ្ជាក់ថា ការអញ្ជើញនេះបានឆ្លុះបញ្ចាំងពីការទទួលស្គាល់ចំពោះតួនាទី និងការខិតខំប្រឹងប្រែងរបស់ឯកឧត្តម ឯកអគ្គរាជទូត ក្នុងការផ្សព្វផ្សាយអំពីកម្ពុជា និងជំរុញការផ្លាស់ប្តូរចំណេះដឹងរវាងប្រជាជននៃប្រទេសទាំងពីរ។ លើសពីនេះទៀត គំនិតផ្តួចផ្តើមនេះ នឹងរួមចំណែកផ្សព្វផ្សាយចំណេះដឹងអំពីកម្ពុជា ទៅកាន់យុវជន និងនិស្សិតប៊ុលហ្គារី ព្រមទាំងពង្រឹងទំនាក់ទំនងរវាងប្រជាជននិងប្រជាជន។

ឯកឧត្ដមឯកអគ្គរាជទូត ជា ច័ន្ទបរិបូរណ៍ បានបន្ថែមថា សកម្មភាពខាងលើជាផ្នែកមួយនៃកិច្ចខិតខំប្រឹងប្រែងជាបន្តបន្ទាប់របស់ ឯកឧត្តម បាននិងស្ថានឯកអគ្គរាជទូតកម្ពុជា ក្នុងការជំរុញការទូតទេសចរណ៍ ការទូតវប្បធម៌ និងទំនាក់ទំនងរវាងប្រជាជននិងប្រជាជន ដើម្បីលើកកម្ពស់ការយល់ដឹងអំពីកម្ពុជា នៅសាធារណរដ្ឋប៊ុលហ្គារី ពង្រីកការផ្សព្វផ្សាយគោលដៅទេសចរណ៍កម្ពុជា និងបង្កើតឱកាសថ្មីៗសម្រាប់កិច្ចសហប្រតិបត្តិការរវាងប្រទេសទាំងពីរ៕

ដោយ៖ រិទ្ធី, ប្រភព៖ ឯកអគ្គរាជទូតកម្ពុជា ប្រចាំសាធារណរដ្ឋប៊ុលហ្គារី