AKP ភ្នំពេញ ថ្ងៃទី២៧ ខែកញ្ញា ឆ្នាំ២០២៦ -- ឯកឧត្តម ចាន់ ស៊ីណាត រដ្ឋលេខាធិការ ក្រសួងធនធានទឹក និងឧតុនិយម កាលពីថ្ងៃទី ២៦ ខែកញ្ញា ឆ្នាំ២០២៦ បានអញ្ជើញចុះពិនិត្យដោយផ្ទាល់នូវស្ថានភាព និងការគ្រប់គ្រងទឹក ស្ថិតក្នុងភូមិសាស្ត្រទំនប់អូរប៉ាម ក្នុងស្រុកកែវសីមា ខេត្តមណ្ឌលគិរី។

នាឱកាសនោះ ឯកឧត្តមរដ្ឋលេខាធិការ បានគូសបញ្ជាក់ថា បេសកកម្មនេះធ្វើឡើងក្នុងគោលបំណងពិនិត្យ សិក្សាលម្អិត វាយតម្លៃ និងគិតគូររៀបចំផែនការគ្រប់គ្រងទឹកនៅទំនប់អូរប៉ាមក្នុងរដូវវស្សា ឱ្យកាន់តែមានប្រសិទ្ធភាពខ្ពស់។ ជាពិសេស គឺសំដៅស្ទាក់ និងរក្សាទុកទឹកសម្រាប់ប្រើប្រាស់ពហុបំណង ដើម្បីឆ្លើយតបទៅនឹងតម្រូវការប្រើប្រាស់ប្រចាំថ្ងៃរបស់ប្រជាពលរដ្ឋក្នុងខេត្តមណ្ឌលគិរី និងតំបន់ភូមិភាគឥសានទាំងមូល ព្រមទាំងចូលរួមចំណែកយ៉ាងសំខាន់ក្នុងការអភិវឌ្ឍប៉ូលសេដ្ឋកិច្ចជាតិនៅតំបន់នេះឱ្យកាន់តែរីកចម្រើន។

ឯកឧត្តមរដ្ឋលេខាធិការ បានណែនាំដល់ក្រុមការងារបច្ចេកទេស វិស្វករ និងទីប្រឹក្សាទាំងអស់ ត្រូវខិតខំសិក្សាស្រាវជ្រាវឱ្យបានច្បាស់លាស់ និងរិះរកគ្រប់មធ្យោបាយក្នុងការរៀបចំផែនការ ក៏ដូចជាគម្រោងស្ថាបនាផ្សេងៗឱ្យមានគុណភាព និងគណនេយ្យភាព ឆ្លើយតបទៅនឹងបរិបទនៃការអភិវឌ្ឍសង្គម-សេដ្ឋកិច្ចកម្ពុជានាពេលបច្ចុប្បន្ន៕

ដោយ៖ ពេជ្រ សំអឿន(ប្រភព.ក្រសួងធនធានទឹកនិងឧតុនិយម)