AKP បន្ទាយមានជ័យ ថ្ងៃទី២៥ ខែកញ្ញា ឆ្នាំ២០២៦ -- ក្នុងកាលៈទេសៈដែលទឹកជំនន់បានបង្កឱ្យមានផលប៉ះពាល់ដល់ការរស់នៅរបស់ប្រជាពលរដ្ឋនៅតាមតំបន់មួយ ចំនួនក្នុងក្រុងប៉ោយប៉ែត ការយកចិត្តទុកដាក់ចំពោះសុវត្ថិភាព និងសុខភាពរបស់ប្រជាពលរដ្ឋដែលត្រូវបានជម្លៀសចេញពីតំបន់រងគ្រោះ ត្រូវបានចាត់ទុក ជាកិច្ចការអាទិភាព ដោយអាជ្ញាធរមូលដ្ឋាន និងក្រុមការងាររាជរដ្ឋាភិបាលចុះជួយក្រុងប៉ោយប៉ែត បានចុះពិនិត្យ សួរសុខទុក្ខ និងត្រៀមអន្តរាគមន៍ជួយប្រជាពលរដ្ឋជាប្រចាំ។

ជាក់ស្តែង កាលពីយប់ថ្ងៃទី២៤ ខែកញ្ញា ឆ្នាំ២០២៦ បន្ទាប់ពីចុះពិនិត្យស្ថានភាពទឹកជំនន់តាមខ្នងផ្ទះប្រជាពលរដ្ឋក្នុងក្រុងប៉ោយប៉ែត តាំងពីព្រឹកព្រលឹមរហូតដល់ម៉ោងប្រមាណ ១០យប់ ឯកឧត្តមបណ្ឌិត ប៉ាន់ខែម ប៊ុនថន នាយរងខុទ្ទកាល័យសម្តេចធិបតីនាយករដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះជួយក្រុងប៉ោយប៉ែត បានអញ្ជើញចុះសាកសួរសុខទុក្ខប្រជាពលរដ្ឋ ដែលអាជ្ញាធរបានជម្លៀសមកកាន់ទីទួលសុវត្ថិភាព ស្ថិតនៅសាលារៀនក្នុងវត្តប៉ាលេលេយ្យ សង្កាត់អូរជ្រៅ ក្រុងប៉ោយប៉ែត។

ទីទួលសុវត្ថិភាពនេះ កំពុងទទួលប្រជា ពលរដ្ឋសរុប ២៨គ្រួសារ ស្មើនឹង ១២៣នាក់ ក្នុងនោះស្ត្រី ៦៥នាក់ ដែលក្នុងនោះមានប្រជាពលរដ្ឋចំនួន ២៥គ្រួ សារ មកពីភូមិក្បាលកោះ និង ៣គ្រួសារ មកពីភូមិប៉ោយប៉ែត។ អាជ្ញាធរបានរៀបចំទីកន្លែងសមរម្យសម្រាប់ពួកគាត់សម្រាក និងស្នាក់នៅជាបណ្តោះអាសន្ន ដោយផ្តល់ភាពងាយស្រួល និងសុវត្ថិភាពក្នុងអំឡុងពេលស្ថានភាពទឹកជំនន់។

ក្នុងឱកាសនោះ ឯកឧត្តមបណ្ឌិត ប៉ាន់ខែម ប៊ុនថន បានសាកសួរសុខទុក្ខ និងពិនិត្យមើលស្ថានភាពរស់នៅរបស់បងប្អូនប្រជាពលរដ្ឋ ព្រមទាំងណែនាំឱ្យមានការប្រុងប្រយ័ត្នខ្ពស់ចំពោះកុមារតូចៗ ជាពិសេសក្នុងបរិបទដែលតំបន់ជុំវិញអាចមានទឹកជំនន់ និងស្ថានភាពហានិភ័យផ្សេងៗ។

ឯកឧត្តមបណ្ឌិត ក៏បានណែនាំឱ្យប្រជាពលរដ្ឋយកចិត្តទុកដាក់ថែរក្សាសុខភាព អនាម័យ និងសុវត្ថិភាពរបស់សមាជិកគ្រួសារ ក្នុងអំឡុងពេលស្នាក់នៅទីទួលសុវត្ថិភាព។ ជាមួយគ្នានេះ ប្រសិនបើមានតម្រូវការចាំបាច់ ឬជួបបញ្ហាណាមួយ សូមទាក់ទងទៅកាន់អាជ្ញាធរ និងកម្លាំងដែលកំពុងប្រចាំការនៅជិត ដើម្បីទទួលបានការជួយអន្តរាគមន៍ទាន់ពេលវេលា។

ឯកឧត្តមបណ្ឌិត ប៉ាន់ខែម ប៊ុនថន បានបញ្ជាក់ពីការយកចិត្តទុកដាក់ និងការត្រៀមលក្ខណៈជាប្រចាំរបស់ក្រុមការងារ និងអាជ្ញាធរក្រុងប៉ោយប៉ែត ក្នុងការជួយសង្គ្រោះ និងការពារសុវត្ថិភាពប្រជាពលរដ្ឋនៅក្នុងស្ថានភាពទឹកជំនន់។ ការចុះជួបប្រជាពលរដ្ឋដោយផ្ទាល់នេះ ក៏ជាផ្នែកមួយនៃការត្រៀមបង្ការ និងអន្តរាគមន៍ជាមុន ដើម្បីធានាថាប្រជាពលរដ្ឋដែលត្រូវបានជម្លៀសមកកាន់ទីទួលសុវត្ថិភាព អាចទទួលបានការយកចិត្តទុកដាក់ និងការជួយឧបត្ថម្ភតាមតម្រូវការជាក់ស្តែង។

ជាមួយគ្នានេះ ក្រុមការងាររាជរដ្ឋាភិបា លចុះជួយក្រុងប៉ោយប៉ែត និងអាជ្ញាធរក្រុង បានបន្តប្រចាំការជាប់ជាប្រចាំ ដើម្បីត្រៀមចាត់វិធានការអន្តរាគមន៍ជួយប្រជាពលរដ្ឋឱ្យបានទាន់ពេលវេលា ក្នុងករណីមានស្ថានភាពបន្ទាន់ ឬតម្រូវការចាំបាច់ណាមួយកើតឡើង។

សកម្មភាពចុះពិនិត្យតាមខ្នងផ្ទះ និងចុះសាកសួរសុខទុក្ខប្រជាពលរដ្ឋដែលបានជម្លៀសមកកាន់ទីទួលសុវត្ថិភាពនេះ បានបង្ហាញពីការផ្តោតអាទិភាពលើសុវត្ថិភាព និងការរស់នៅរបស់ប្រជាពលរដ្ឋក្នុងអំឡុងពេលប្រឈមនឹងទឹកជំនន់ ព្រមទាំងការត្រៀមខ្លួនរបស់អាជ្ញាធរ ដើម្បីឆ្លើយតបចំពោះស្ថានភាពដែលអាចកើតមានជាបន្តបន្ទាប់៕

ដោយ ៖ឈុនសារ៉ាត