AKP ភ្នំពេញ ថ្ងៃទី២៣ ខែកញ្ញា ឆ្នាំ២០២៦

ឯកឧត្តម ជឺ ចំណាន អនុប្រធានគណៈកម្មាធិការជាតិរៀបចំការបោះឆ្នោត(គ.ជ.ប) បានបញ្ជាក់ថា ផ្តើមចេញពីកិច្ច​សហប្រ​តិ​ប​ត្តិ​ការ​ល្អជាមួយអាជ្ញាធរ និងក្រសួង ស្ថាប័នពាក់ព័ន្ធ និងដោយមានកិច្ចខិតខំប្រឹង​ប្រែងពី​មន្រ្តី​លេ​ខាធិការដ្ឋានរាជធានី ខេត្តរៀបចំការបោះឆ្នោត និងក្រុមប្រឹក្សាឃុំ សង្កាត់នៅ​ទូទាំង​ប្រ​ទេ​ស គ.ជ.ប បានទទួលលទ្ធផលល្អក្នុងការស្រង់ស្ថិតិប្រជាពលរដ្ឋប៉ាន់ស្មាន សម្រាប់​ការ​ពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦ នេះ ដែលក្នុងនោះ  ប្រជាពល​រដ្ឋ​មាន​អាយុ ១៨ឆ្នាំឡើង មានចំនួន ១១ ៣៧៤ ៩៥៣ នាក់ ក្នុងនោះ ស្រ្តីមានចំនួន ៥ ៩៥៤ ៧៨​១​នាក់​។

ក្នុងកិច្ចប្រជុំជាមួយភាគីពាក់ព័ន្ធ នាព្រឹកថ្ងៃទី ២៣ ខែកញ្ញា ឆ្នាំ២០២៦ នៅទីស្ដីការ គ.ជ.ប ឯកឧត្ដម​អនុ​ប្រ​​​ធាន គ.ជ.ប បានឱ្យដឹងថា ចំនួនប្រជាពលរដ្ឋទើបដល់អាយុ ១៨ឆ្នាំ មានចំនួន ១៩៤​​៨២៣ នាក់។ ចំនួនប្រជាពលរដ្ឋប៉ាន់ស្មានដែលអាចមក​ចុះឈ្មោះបោះឆ្នោតនៅឆ្នាំ​២០២​៦​ មានចំនួ​ន ៤១២ ៣៤​៥​ នាក់ និងចំនួនការិយាល័យបោះឆ្នោតប៉ាន់ស្មានឆ្នាំ២០២៦ មាន​ចំនួ​ន​ ២៤ ៣៥៣ ការិយាល័យ។

ឯកឧត្ដមបានគូសបញ្ជាក់ថា ស្ថិតិប្រជាពលរដ្ឋ ​ចំនួន​កា​រិ​យាល័​យ​បោះ​ឆ្នោតប៉ាន់ស្មាន និង​ប​ញ្ជី​​ឈ្មោះ​ទីតាំងការិយាល័យចុះឈ្មោះបោះឆ្នោត និងការិ​យា​ល័​យ​បោះ​ឆ្នោត នឹងត្រូវធ្វើការផ្សព្វផ្សាយជាសាធារណៈ នៅថ្ងៃទី២៦ខាងមុខនេះ នៅលើអាសយ​ដ្ឋា​​ន​វេបគ.ជ.បwww.nec.gov.khនិងកម្មវិធីទូរសព្ទឆ្លាត (Mobile App) NEC KH។ លើសពីនេះ គ.​ជ.ប ក៏បានចាត់ លធ.ខប និងកបឃ.ស ឱ្យថតចម្លង និងបិទផ្សាយព្រមគ្នា​ជាសាធារណៈ​នូវ​​​បញ្ជីទាំងនេះ នៅសាលាឃុំសង្កាត់និង​នៅ​​ទីប្រជុំជនមួយចំនួនក្នុងឃុំសង្កាត់ផងដែរ។ ចំពោះ​គ​ណ​បក្សនយោបាយ សមាគម និងអង្គការមិនមែនរដ្ឋាភិបាល អ្នកសង្កេតការណ៍បោះឆ្នោតនិង​ប្រ​ព័​ន្ធ​​ផ្សព្វផ្សាយព័ត៌មាន មានសិទ្ធិស្នើសុំពី គ.ជ.ប នូវបញ្ជីឈ្មោះទីតាំងការិយាល័យចុះ​ឈ្មោះ​​​បោះឆ្នោតនិងការិយាល័យបោះឆ្នោត នៃឃុំសង្កាត់មួយឬច្រើនដោយ​ត្រូវបង់ថ្លៃត្រឹម​ត​ម្លៃ​​​​ផលិតបន្ទាប់ពីពេលដែលបញ្ជីនេះត្រូវបានបោះពុម្ពផ្សាយ។

សូមរម្លឹកដែរថា​​​​​​​ ចំនួនប្រជាពលរដ្ឋមានឈ្មោះ​ក្នុងបញ្ជីបោះឆ្នោត​ផ្លូវការ​​ឆ្នាំ​២០​២៥​​ ​មាន​ចំនួ​ន ១០ ១៦២ ២៣២ នាក់៕

ដោយ៖ ជឹម ណារី