‎AKP កំពង់ធំ ថ្ងៃទី២៣ ខែកញ្ញា ឆ្នាំ២០២៦--ឧត្តមសេនីយ៍ទោ សោម ស៊ុន អមដំណើរដោយលោក ម៉ុក ណារិន្ទ នាយផ្នែករដ្ឋបាលព្រៃឈើ ស្រុកសណ្ដាន់នាព្រឹកថ្ងៃទី២៣ ខែកញ្ញា ឆ្នាំ២០២៦នេះបានដឹកនាំសហការី រួមជាមួយអនុប្រធាន និងក្រុមសហគមន៍អូរដាស់ស្គរ ទៅត្រួតពិនិត្យការកាយប្រឡាយក្រវាត់ព្រំដី ដើម្បីការពារការលួចកាប់ព្រៃឈើយកដីរបស់រដ្ឋធ្វើជាកម្មសិទ្ធនៅតំបន់អូរដាស់ស្គរ ស្រុកសណ្តាន់ ខេត្តកំពង់ធំ។
‎

លោក ម៉ុក ណារិន្ទ នាយផ្នែករដ្ឋបាលព្រៃឈើ ស្រុកសណ្ដាន់ បានរាយការណ៍បញ្ជាក់ថា ព្រៃសហគមន៍អូរដាស់ស្គរ មុនឆ្នាំ២០២៤ មានទំហំ ១១៣៥ហិកតា លុះដល់ឆ្នាំ២០២៤ បានចុះបញ្ជីជាក់ស្ដែងឃើញកើនប្រមាណជា ៦១៩ហិកតា ។

បច្ចុប្បន្ននេះ មានផ្ទៃដីដែលកំពុងធ្វើការគ្រប់គ្រងចំនួន ១៧៥៤ហិកតា ហើយតាមបទបញ្ជារបស់រដ្ឋបាលខេត្តកំពង់ធំ តម្រូវឲ្យចាត់វិធានការការពារតំបន់ព្រៃសហគមន៍នេះ ឲ្យបាន ។ ដូចច្នេះ មន្ទីរកសិកម្មរុក្ខាប្រមាញ់ និងនេសាទខេត្ត សហការជាមួយសហគមន៍បានចាត់វិធានការកាយប្រឡាយក្រវ៉ាត់ព្រំដី ដើម្បីងាយស្រួលក្នុងការគ្រប់គ្រង ដែលកន្លងមកតែងតែមានការលបលួចកាប់ទន្ទ្រានពីជនខិលខូចមួយចំនួន។ ចំពោះផែនការត្រូវកាយប្រឡាយក្រវាត់ព្រំដីមានប្រវែង ៨០០០ម៉ែត្រ ។ បច្ចុប្បន្នធ្វើបានចំនួន ៤៥៧០ម៉ែត្រហើយ នៅសេសសល់ ៣៤៣០ម៉ែត្រទៀត ដែលត្រូវធ្វើបន្ត ប៉ុន្តែដោយបច្ចុប្បន្ននេះ ធាតុអាកាសមានភ្លៀងធ្លាក់មិនអំណោយផល ក្នុងការកាយប្រឡាយក្រវាត់ព្រំដី ត្រូវបានផ្អាកជាបណ្ដោះអាសន្ន និងបន្តធ្វើការកាយប្រឡាយក្រវាត់ព្រំដីនៅពេលខាងមុខបន្តទៅទៀត ដើម្បីធានាក្នុងការការពារព្រៃសហគមន៍អូរដាស់ស្គរនេះឲ្យបាន កុំឲ្យមានការបាត់បង់ ។

‎ឧត្តមសេនីយ៍ទោ សោម ស៊ុន បានថ្លែងអំណរគុណយ៉ាងជ្រាលជ្រៅចំពោះឯកឧត្តម នួន ផារ័ត្ន អភិបាលខេត្តកំពង់ធំ ដែលបានយកចិត្តទុកដាក់ក្នុងវិធានការការពារ ទប់ស្កាត់បទល្មើសធនធានធម្មជាតិ យ៉ាងម៉ឺងម៉ាត់ ពិសេស ការគ្រប់គ្រងដីព្រៃរបស់រដ្ឋ ដែលកន្លងទៅនេះ រដ្ឋបាលខេត្តបានកាយប្រឡាយក្រវាត់ព្រំដីរបស់រដ្ឋ បានជាង ៦០គីឡូម៉ែត្ររួចមកហើយ នៅតំបន់ឃុំបឹងល្វា ស្រុកសន្ទុក ខេត្តកំពង់ធំ ។

ឧត្តមសេនីយ៍ទោ សោម ស៊ុន បានណែនាំដល់កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំទាំងអស់ ដែលកំពុងបំពេញភារកិច្ចនៅទីនេះ ត្រូវរួមសហការជាមួយកម្លាំងជំនាញរដ្ឋបាលព្រៃឈើ និងក្រុមសហគមន៍ព្រៃឈើ ត្រូវចាត់វិធានការឲ្យបានម៉ឺងម៉ាត់បំផុត ក្នុងការការពារតំបន់ព្រៃសហគមន៍អូរដាស់ស្គរនេះ មិនឲ្យមានការកាប់ទន្ទ្រានយកដីព្រៃរបស់រដ្ឋធ្វើជាកម្មសិទ្ធិបានជាដាច់ខាត ។ ក្នុងករណីជនណា ប្រព្រឹត្តបទល្មើសកាប់ទន្ទ្រានយកដីព្រៃរបស់រដ្ឋនៅក្នុងតំបន់នេះ ត្រូវតែចាប់ឃាត់ខ្លួន និងមធ្យោបាយប្រព្រឹត្តទល្មើសជាក់ស្ដែង ប្រគល់ឲ្យស្ថាប័នជំនាញ កសាងសំណុំរឿងបញ្ជូនទៅតុលាការ ផ្តន្ទាទោសតាមច្បាប់ជាដាច់ខាត។

‌‎នៅក្នុងឱកាសនោះផងដែរ ឧត្តមសេនីយ៍ទោ សោម ស៊ុន បានប្រគល់ស្បៀងអាហារ គ្រឿងឧបភោគបរិភោគ ប្រេងឥន្ធនៈ សម្រាប់កងកម្លាំងធ្វើសកម្មភាពល្បាតការពារ ក្នុងតំបន់ព្រៃសហគមន៍អូរដាស់ស្គរ និងដីព្រៃឈើបម្រុងទុករបស់រដ្ឋមួយចំនួនទៀត ក្នុងភូមិសាស្ត្រស្រុកសណ្តាន់ ឲ្យបានជាដាច់ខាត ។

ជាមួយនោះដែរ ឧត្ដមសេនីយ៍ទោ សោម ស៊ុន ក៏បានក្រើនរំលឹក និងពង្រឹងវិធានការ ចំពោះការលួចកាប់ និងដឹកជញ្ជូនឈើខុសច្បាប់ ត្រូវរួមគ្នាការពារ ទប់ស្កាត់ និងបង្ក្រាបឲ្យបាន ទាំងមនុស្ស និងមធ្យោបាយប្រព្រឹត្តិបទល្មើស ដើម្បីអនុវត្តន៍តាមវិធានការច្បាប់ដោយគ្មានការលើកលែងឡើយ៕

ដោយ ស៊ុម វណ្ណា