AKP បន្ទាយមានជ័យ ថ្ងៃទី១៩ ខែកញ្ញា ឆ្នាំ២០២៦-- ពីការរស់នៅក្នុងទីតាំងស្នាក់នៅបណ្តោះអាសន្នទៅជាការចាប់ផ្តើមគិតគូរពីការបង្កើតមុខរបរ និងប្រភពចំណូលបន្ថែម គឺជាទិសដៅមួយដែលរដ្ឋបាលខេត្តបន្ទាយមានជ័យកំពុងជំរុញ ដើម្បីឱ្យប្រជាពលរដ្ឋដែលកំពុងរស់នៅក្នុង «ភូមិរង់ចាំ» អាចប្រើប្រាស់សក្តានុពល និងធនធានដែលខ្លួនមាន សម្រាប់កែលម្អជីវភាពរស់នៅរបស់គ្រួសារ។

ក្នុងន័យនេះ ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានលើកទឹកចិត្តដល់បងប្អូនប្រជាពលរដ្ឋដែលកំពុងរស់នៅក្នុងភូមិរង់ចាំទាំង៦ភូមិ ឱ្យចាប់យកឱកាសពីស្ថានភាពរស់នៅបច្ចុប្បន្ន ដោយចូលរួមរៀបចំ ផ្ទះស្នាក់អាស្រ័យ (Home Stay) សម្រាប់ទទួលភ្ញៀវដែលមានបំណងមកស្នាក់នៅរយៈពេលខ្លី ដើម្បីបង្កើតប្រភពចំណូលបន្ថែម និងពង្រឹងជីវភាពគ្រួសារ។

ការលើកទឹកចិត្តនេះធ្វើឡើងក្នុងឱកាសឯកឧត្តម អ៊ុ រាត្រី ដឹកនាំក្រុមការងារចុះជួបសំណេះសំណាល និងសួរសុខទុក្ខប្រជាពលរដ្ឋដែលកំពុងស្នាក់នៅក្នុងភូមិរង់ចាំ នាថ្ងៃទី១៨ ខែកញ្ញា ឆ្នាំ២០២៦។ ក្នុងឱកាសនោះ ឯកឧត្តមអភិបាលខេត្តបានយកចិត្តទុកដាក់មិនត្រឹមតែទៅលើការរស់នៅប្រចាំថ្ងៃ និងតម្រូវការចាំបាច់របស់ប្រជាពលរដ្ឋប៉ុណ្ណោះទេ ប៉ុន្តែថែមទាំងលើកឡើងពីលទ្ធភាពបង្កើតមុខរបរ និងប្រភពចំណូល ដែលអាចជួយឱ្យគ្រួសារមានភាពធន់ និងអាចពឹងផ្អែកលើសមត្ថភាពរបស់ខ្លួនបានកាន់តែប្រសើរ។

ឯកឧត្តម អ៊ុ រាត្រី បានមានប្រសាសន៍ថា ការរៀបចំផ្ទះស្នាក់អាស្រ័យ មិនមែនមានន័យថាប្រជាពលរដ្ឋត្រូវចំណាយទុនធំ ឬបង្កើតអាជីវកម្មស្មុគស្មាញនោះទេ ប៉ុន្តែអាចចាប់ផ្តើមពីលទ្ធភាពដែលមានស្រាប់ ដោយរៀបចំកន្លែងស្នាក់នៅឱ្យមានភាពសមរម្យ អនាម័យ សុវត្ថិភាព និងមានបរិយាកាសល្អ ដើម្បីបម្រើភ្ញៀវដែលមានតម្រូវការស្នាក់នៅក្នុងតំបន់។

ឯកឧត្តមអភិបាលខេត្តបានបញ្ជាក់ថា ចំពោះបងប្អូនប្រជាពលរដ្ឋដែលមានបំណងចង់បង្កើតផ្ទះស្នាក់អាស្រ័យ (Home Stay) សូមបំពេញបែបបទដែលក្រុមការងារបានរៀបចំជូន ដោយផ្តល់ព័ត៌មានឱ្យបានច្បាស់លាស់ ដូចជា លេខផ្ទះ ភូមិ លេខទូរស័ព្ទសម្រាប់ទំនាក់ទំនង និងព័ត៌មានចាំបាច់ផ្សេងៗ ដើម្បីឱ្យក្រុមការងារមានមូលដ្ឋានក្នុងការរៀបចំ និងសម្របសម្រួលការងារបន្ត។

ជាមួយគ្នានេះ គំនិតនៃការរៀបចំ Home Stay ក៏អាចបង្កើតផលប្រយោជន៍ជាច្រើនជាន់សម្រាប់សហគមន៍ ព្រោះនៅពេលមានភ្ញៀវមកស្នាក់នៅ វាអាចជំរុញឱ្យមានតម្រូវការលើសេវាកម្ម និងផលិតផលផ្សេងៗទៀត ដូចជា ម្ហូបអាហារ ភេសជ្ជៈ ផលិតផលក្នុងស្រុក សេវាដឹកជញ្ជូន និងសេវាកម្មផ្សេងៗ ដែលអាចផ្តល់ឱកាសរកចំណូលដល់គ្រួសារជាច្រើន មិនមែនត្រឹមតែម្ចាស់ផ្ទះស្នាក់អាស្រ័យប៉ុណ្ណោះទេ។ ទស្សនៈនេះក៏បង្ហាញពីការយកចិត្តទុកដាក់របស់រដ្ឋបាលខេត្ត ក្នុងការជំរុញឱ្យប្រជាពលរដ្ឋមានសមត្ថភាពពឹងផ្អែកលើខ្លួនឯង តាមរយៈការប្រើប្រាស់ធនធាន និងលទ្ធភាពដែលមានស្រាប់។ ជំនួសឱ្យការពឹងផ្អែកលើជំនួយតែមួយមុខ ការបង្កើតមុខរបរតូចៗដែលអាចបន្តបាន គឺជាមូលដ្ឋានមួយសម្រាប់ជួយឱ្យគ្រួសារមានចំណូល និងមានភាពម្ចាស់ការលើជីវភាពរបស់ខ្លួន។ ប្រសិនបើការអភិវឌ្ឍ Home Stay មានការរៀបចំ និងគ្រប់គ្រងបានល្អ ព្រមទាំងធានាបាននូវអនាម័យ សុវត្ថិភាព និងគុណភាពសេវាកម្ម វាអាចក្លាយជាចំណុចចាប់ផ្តើមនៃសកម្មភាពសេដ្ឋកិច្ចមួយចំនួននៅក្នុងសហគមន៍។ ប្រជាពលរដ្ឋអាចបន្តអភិវឌ្ឍសេវាកម្ម និងផលិតផលរបស់ខ្លួនទៅតាមតម្រូវការរបស់ភ្ញៀវ និងលទ្ធភាពរបស់គ្រួសារ។

សម្រាប់ប្រជាពលរដ្ឋដែលកំពុងរស់នៅក្នុង «ភូមិរង់ចាំ» ការជំរុញឱ្យរៀបចំ Home Stay ដូច្នេះ មិនត្រឹមតែជាការផ្តល់គំនិតអំពីមុខរបរថ្មីមួយប៉ុណ្ណោះទេ ប៉ុន្តែជាការបើកលទ្ធភាពឱ្យពួកគាត់ចាប់ផ្តើមប្រើប្រាស់អ្វីដែលមានស្រាប់ ដើម្បីបង្កើតចំណូល បង្កើនភាពម្ចាស់ការ និងពង្រឹងជីវភាពគ្រួសារ តាមស្ថានភាព និងលទ្ធភាពជាក់ស្តែងរបស់ខ្លួន។ តាមរយៈការចូលរួមរបស់ប្រជាពលរដ្ឋ និងការសម្របសម្រួលពីអាជ្ញាធរមូលដ្ឋាន ការរៀបចំ Home Stay អាចក្លាយជាផ្នែកមួយនៃការបង្កើតសកម្មភាពសេដ្ឋកិច្ចនៅក្នុងសហគមន៍ និងជួយឱ្យ «ភូមិរង់ចាំ» មានឱកាសថ្មីៗសម្រាប់ការរស់នៅ និងការកសាងជីវភាពឱ្យកាន់តែប្រសើរឡើង៕

ដោយ ឈុន សារ៉ាត