AKPបន្ទាយមានជ័យថ្ងៃទី១៨ខែកញ្ញាឆ្នាំ២០២៦ -- ការជំរុញជីវភាពប្រជាពលរដ្ឋឱ្យកាន់តែមានប្រសិទ្ធភាពផ្នែកសេដ្ឋកិច្ច និងមានសមត្ថភាព  ទប់ទល់នឹងភាពងាយរងគ្រោះ គឺជាកត្តាសំខាន់មួយសម្រាប់ការអភិវឌ្ឍជនបទប្រកបដោយចីរភាព។

ក្នុងទិសដៅនេះ កិច្ចប្រជុំពិនិត្យវឌ្ឍនភា ព និងកំណត់ទិសដៅការងារបន្តរបស់គម្រោង «លើកកម្ពស់ជីវភាពប្រកប ដោយប្រសិទ្ធភាពសេដ្ឋកិច្ច ដើម្បីកាត់បន្ថយភាពងាយរងគ្រោះ និងពង្រឹងភាពធន់» (Empower) ត្រូវបានរៀបចំ ឡើងនៅស្រុកភ្នំស្រុក ដោយផ្តោតលើការពិនិត្យលទ្ធផលការងារ ការកែលម្អការអនុវត្ត និងការចូលរួមរបស់មូលដ្ឋាន ។

កាលពីថ្ងៃទី ១៧ ខែកញ្ញា ឆ្នាំ២០២៦ លោក សាន វួន អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានដឹកនាំកិច្ចប្រជុំវឌ្ឍនភាពនៃការអនុវត្តការងារ និងទិសដៅការងារបន្តរបស់គម្រោង Empower នៅស្រុកភ្នំស្រុក។

កិច្ចប្រជុំនេះមានការអញ្ជើញចូលរួមពីលោកស្រី ព្រិញ សាវង់ អភិបាលរងនៃគណៈអភិបាលស្រុកភ្នំស្រុក ព្រមទាំងមន្ត្រីការិយាល័យក្សេត្រសាស្ត្រ និងផលិតភាពកសិកម្ម មន្ត្រីកសិកម្មស្រុក និងមន្ត្រីកសិកម្មឃុំ សរុបចំនួន ១១នាក់ ក្នុងនោះមានស្ត្រី ៣នាក់។

ក្នុងកិច្ចប្រជុំ លោក សាន វួន បានដឹកនាំការពិភាក្សាដោយផ្តោតលើការតាមដានវឌ្ឍនភាពនៃការអនុវត្តការងារ ការកំ ណត់បញ្ហាប្រឈម និងការរៀបចំទិសដៅសម្រាប់ការងារបន្ត ដើម្បីធានាថាសកម្មភាពរបស់គម្រោងអាចឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋនៅមូលដ្ឋាន។

លោកបានលើកឡើងថា ការអនុវត្តគម្រោងមិនគួរត្រឹមតែផ្តោតលើការផ្តល់ជំនួយ ឬសកម្មភាពរយៈពេលខ្លីនោះទេ ប៉ុន្តែត្រូវផ្តោតលើការបង្កើនសមត្ថភាពរបស់ប្រជាពលរដ្ឋ ជាពិសេសកសិករ ឱ្យអាចបង្កើនផលិតភាព កែលម្អប្រសិទ្ធ ភាពសេដ្ឋកិច្ច និងបង្កើតសមត្ថភាពក្នុងការទប់ទល់នឹងហានិភ័យនានាដែលអាចកើតមានចំពោះជីវភាពរស់នៅ។

ជាមួយគ្នានេះ លោក សាន វួន បានសង្កត់ធ្ងន់លើសារៈសំខាន់នៃការសហ ការរវាងមន្ត្រីជំនាញ អាជ្ញាធរមូលដ្ឋាន មេឃុំ មេភូមិ និងប្រជាពលរដ្ឋ។ ការផ្សព្វផ្សាយព័ត៌មានអំពីលទ្ធផលការងារ និងលទ្ធផលវាយតម្លៃតាមរយៈមេឃុំ និងមេភូមិ ត្រូវបានចាត់ទុកថាជាមធ្យោបាយមួយក្នុងការធានាឱ្យប្រជាពលរដ្ឋទទួលបានព័ត៌មានច្បាស់លាស់ និងយល់ដឹងពីអត្ថប្រយោជន៍ ព្រមទាំងទិសដៅនៃការអនុវត្តគម្រោង។

លោកបានជំរុញឱ្យមន្ត្រីអនុវត្តគម្រោងយកចិត្តទុកដាក់លើការរៀបចំផែនការការងារបន្តឱ្យមានភាពច្បាស់លាស់ ស្របតាមស្ថានភាពជាក់ស្តែងនៅមូលដ្ឋាន និងត្រូវបន្តពង្រឹងការសម្របសម្រួលជាមួយភាគីពាក់ព័ន្ធ ដើម្បីឱ្យការអនុវត្តសកម្មភាពនានាមានប្រ សិទ្ធភាព និងអាចបង្កើតផលប្រយោជន៍ជាក់ស្តែងសម្រាប់ក្រុមគោលដៅ។

ដោយឡែក លោកស្រី ព្រិញ សាវង់ អភិបាលរងនៃគណៈអភិបាលស្រុកភ្នំស្រុក បានបង្ហាញការថ្លែងអំណរគុណចំពោះរាជរដ្ឋាភិបាល ដែលបានយកចិត្តទុកដាក់លើការលើកកម្ពស់ជីវភាពប្រជាពលរដ្ឋ និងជំរុញការអភិវឌ្ឍនៅតាមមូលដ្ឋាន តាមរយៈការគាំទ្រនិងអនុវត្តគម្រោងដែលមានគោលដៅកាត់បន្ថយភាពងាយរងគ្រោះ និងពង្រឹងភាពធន់របស់ប្រជាពលរដ្ឋ។

លោកស្រីបានចាត់ទុកគម្រោង Empower ថា ជាផ្នែកមួយដែលអាចចូលរួមគាំទ្រដល់ការលើកកម្ពស់សមត្ថ ភាពប្រជាពលរដ្ឋ ជាពិសេសប្រជាពល រដ្ឋដែលពឹងផ្អែកលើវិស័យកសិកម្ម និងជីវភាពនៅជនបទ។  

លោកស្រីក៏បានលើកទឹកចិត្តដល់មន្ត្រីជំនាញ និងអាជ្ញាធរមូលដ្ឋានឱ្យបន្តសហការគ្នាឱ្យបានជិតស្និទ្ធ ដើម្បីឱ្យការអនុវត្តគម្រោងសម្រេចបានតាមគោលដៅដែលបានកំណត់។

តាមរយៈកិច្ចប្រជុំនេះ អ្នកចូលរួមក៏បានពិភាក្សាអំពីការជ្រើសរើស កសិករជាជនបង្គោលតាមភូមិ ដើម្បីចូលរួមគាំទ្រការអនុវត្តការងារបន្ត។ ការរៀបចំឱ្យមានកសិករជាជនបង្គោល ត្រូវបានផ្តោតលើការពង្រឹងការផ្សព្វផ្សាយចំណេះដឹង បទពិសោធន៍ និងព័ត៌មានពាក់ព័ន្ធនឹងការអនុវត្តសកម្មភាពគម្រោងនៅកម្រិតសហគមន៍។

កិច្ចប្រជុំបានផ្តោតលើគោលបំណងសំខាន់ៗចំនួនជាច្រើន រួមមាន ការរាយកា រណ៍ពីវឌ្ឍនភាពនៃការអនុវត្តគម្រោង ការផ្សព្វផ្សាយព័ត៌មានអំពីលទ្ធផលការងារ និងលទ្ធផលវាយតម្លៃទៅកាន់ប្រជាពលរដ្ឋតាមរយៈមេឃុំ និងមេភូមិ ការតម្រង់ទិសការងារដល់មន្ត្រីអនុវត្តគម្រោង ព្រមទាំងការពិភាក្សារៀបចំផែនការអនុវត្ត និងផែនការការងារបន្ត។

សារសំខាន់ដែលបានបង្ហាញតាមរយៈកិច្ចប្រជុំនេះ គឺការអនុវត្តគម្រោង Empower ត្រូវការការចូលរួមពីគ្រប់ភាគី មិនមែនជាកិច្ចការរបស់មន្ត្រីជំនាញតែម្នាក់ឯងឡើយ។ ចាប់ពីការរៀបចំផែនការ ការអនុវត្ត ការតាមដានវឌ្ឍនភាព រហូតដល់ការផ្សព្វផ្សាយលទ្ធផល ការសហការរវាងអាជ្ញាធរ មន្ត្រីជំនាញ អ្នកដឹកនាំមូលដ្ឋាន និងកសិករ គឺជាធាតុសំខាន់សម្រាប់ធានាឱ្យសកម្មភាពឆ្លើយតបនឹងតម្រូវការពិតប្រាកដ។

កិច្ចប្រជុំវឌ្ឍនភាពនៃគម្រោង Empower នៅស្រុកភ្នំស្រុកខេត្តបន្ទាយមានជ័យ មិនត្រឹមតែជាវេទិកាសម្រាប់រាយការណ៍លទ្ធផលការងារដែលបានអនុវត្តកន្លងមកប៉ុណ្ណោះទេ ប៉ុន្តែជាវេទិកាសម្រាប់កំណត់ទិសដៅការងារថ្មី ពង្រឹងការសម្របសម្រួល និងបង្កើនការចូលរួមពីមូលដ្ឋាន។ ការផ្តោតលើការលើកកម្ពស់ជីវភាព កាត់បន្ថយភាពងាយរងគ្រោះ និងពង្រឹងភាពធន់

ត្រូវបានដាក់ជាចំណុចសំខាន់ក្នុងការរៀបចំផែនការអនុវត្តការងារបន្តរបស់គម្រោងនៅក្នុងមូលដ្ឋាន៕

ដោយ ៖ឈុនសារ៉ាត