AKP បន្ទាយមានជ័យ ថ្ងៃទី១៧ ខែកញ្ញា ឆ្នាំ២០២៦--ដោយមើលឃើញថា វត្តអារាមមិនត្រឹមតែជាទីសក្ការៈបូជា និងជាទីប្រតិបត្តិធម៌ប៉ុណ្ណោះទេ ប៉ុន្តែក៏ជាទីកន្លែងដែលប្រជាពលរដ្ឋជួបជុំគ្នាក្នុងពិធីបុណ្យប្រពៃណី និងសកម្មភាពសាសនាផ្សេងៗជាប្រចាំ ការរក្សាអនាម័យ សណ្តាប់ធ្នាប់ និងបរិស្ថានស្អាតនៅតាមទីវត្តអារាម ក៏ជាកត្តាសំខាន់មួយក្នុងការលើកកម្ពស់សុខុមាលភាពសហគមន៍ និងសោភណភាពមូលដ្ឋានផងដែរ។

ក្នុងន័យនេះ មន្ទីរធម្មការ និងសាសនា សហការជាមួយមន្ទីរបរិស្ថានខេត្តបន្ទាយមានជ័យ បានរៀបចំពិធីប្រគល់ និងទទួលធុងសំរាមជ័រសរុបចំនួន ៧៦៥ធុង ដែលជាអំណោយដ៏ថ្លៃថ្លារបស់ក្រសួងបរិស្ថាន ជូនដល់គ្រប់វត្តអារាមទាំងអស់នៅទូទាំងខេត្ត ដើម្បីរួមចំណែកពង្រឹងការគ្រប់គ្រងសំរាម និងលើកកម្ពស់បរិស្ថានស្អាតនៅតាមទីវត្តអារាម។

ពិធីនេះបានប្រារព្ធធ្វើឡើងនៅព្រឹកថ្ងៃព្រហស្បតិ៍ ទី១៧ ខែកញ្ញា ឆ្នាំ២០២៦ នៅបរិវេណវត្តចមសុទ្ធាវាស(ស្វាយចាស់) ស្ថិតក្នុងសង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ក្រោមវត្តមានលោក បៀវ ថាន ប្រធានមន្ទីរធម្មការ និងសាសនាខេត្ត លោក ផៃ សុភី អនុប្រធានមន្ទីរបរិស្ថានខេត្ត ព្រមទាំងមន្ត្រីរាជការ និងព្រះសង្ឃជាច្រើនអង្គ។

ថ្លែងក្នុងឱកាសនេះ លោក បៀវ ថាន បានបង្ហាញថា ការទទួលបានធុងសំរាមសម្រាប់ចែកជូនតាមវត្តអារាមទូទាំងខេត្ត គឺជាការយកចិត្តទុកដាក់របស់ក្រសួងបរិស្ថានក្នុងការជំរុញឱ្យទីវត្តអារាមមានអនាម័យល្អ មានសណ្តាប់ធ្នាប់ និងបរិស្ថានស្អាត។ លោកបានបញ្ជាក់ថា វត្តអារាមជាទីកន្លែងដែលមានព្រះសង្ឃគង់នៅ និងមានពុទ្ធបរិស័ទចូលរួមសកម្មភាពសាសនាជាប្រចាំ ដូច្នេះការរៀបចំទីតាំងសម្រាប់ដាក់សំរាមឱ្យបានត្រឹមត្រូវ គឺជាផ្នែកមួយនៃការរួមចំណែកថែរក្សាសោភណភាព និងបរិស្ថាន។
លោកប្រធានមន្ទីរធម្មការ និងសាសនាខេត្ត ក៏បានលើកឡើងពីសារៈសំខាន់នៃការចូលរួមរបស់ព្រះសង្ឃ និងពុទ្ធបរិស័ទ ក្នុងការប្រើប្រាស់ធុងសំរាមឱ្យបានត្រឹមត្រូវ និងចូលរួមផ្សព្វផ្សាយអប់រំដល់ប្រជាពលរដ្ឋឱ្យមានទម្លាប់ល្អក្នុងការទុកដាក់សំរាម ជាពិសេសនៅពេលមានពិធីបុណ្យ ឬសកម្មភាពសាសនាដែលមានមនុស្សចូលរួមច្រើន។

ជាមួយគ្នានេះ លោក ផៃ សុភី អនុប្រធានមន្ទីរបរិស្ថានខេត្តបន្ទាយមានជ័យ បានលើកឡើងថា ការផ្តល់ធុងសំរាមដល់វត្តអារាមទូទាំងខេត្ត គឺជាសកម្មភាពជាក់ស្តែងមួយដែលចូលរួមពង្រឹងការគ្រប់គ្រងសំរាមនៅប្រភពដើម និងជំរុញឱ្យមានការទុកដាក់សំរាមឱ្យបានត្រឹមត្រូវ មិនបោះចោលរាយប៉ាយតាមទីសាធារណៈ ឬនៅក្នុងបរិវេណវត្តអារាម។
លោកបានបញ្ជាក់ថា ធុងសំរាមមួយធុង មិនមែនជាដំណោះស្រាយទាំងមូលចំពោះបញ្ហាសំរាមនោះទេ ប៉ុន្តែវាជាឧបករណ៍សំខាន់ដែលជួយឱ្យមនុស្សមានទីតាំងច្បាស់លាស់សម្រាប់ទុកដាក់សំរាម និងជំរុញការផ្លាស់ប្តូរទម្លាប់ពីការបោះសំរាមមិនមានសណ្តាប់ធ្នាប់ មកជាការទុកដាក់ និងគ្រប់គ្រងឱ្យបានត្រឹមត្រូវ។

លោក ផៃ សុភី បានបន្ថែមថា ការថែរក្សាបរិស្ថានឱ្យបានស្អាត ត្រូវការការចូលរួមពីគ្រប់ភាគី មិនអាចពឹងផ្អែកតែលើមន្ទីរជំនាញ ឬអាជ្ញាធរមូលដ្ឋានតែមួយមុខបានឡើយ។ ជាពិសេស វត្តអារាមអាចដើរតួនាទីយ៉ាងសំខាន់ក្នុងការផ្សព្វផ្សាយសារអប់រំបរិស្ថានទៅកាន់ពុទ្ធបរិស័ទ និងសហគមន៍ ព្រោះវត្តជាទីកន្លែងដែលប្រជាពលរដ្ឋមានការជឿទុកចិត្ត និងមកជួបជុំជាប្រចាំ។ ការប្រគល់ធុងសំរាមទាំង ៧៦៥ធុង ទៅកាន់គ្រប់វត្តអារាមនៅទូទាំងខេត្តបន្ទាយមានជ័យដូច្នេះ មិនត្រឹមតែជាការផ្តល់សម្ភារប្រើប្រាស់ប៉ុណ្ណោះទេ ប៉ុន្តែថែមទាំងជាសាររំលឹក និងជំរុញឱ្យមានការចូលរួមពីព្រះសង្ឃ ពុទ្ធបរិស័ទ និងប្រជាពលរដ្ឋ ក្នុងការថែរក្សាអនាម័យ និងបរិស្ថានជុំវិញខ្លួន។

តាមរយៈសកម្មភាពនេះ ទីវត្តអារាមនានានៅទូទាំងខេត្ត អាចកាន់តែមានសណ្តាប់ធ្នាប់ ស្អាត និងមានសោភណភាព ស្របតាមស្មារតីចូលរួមថែរក្សាបរិស្ថាន និងការកសាងសហគមន៍ដែលមានអនាម័យល្អ។ ជាពិសេស ការចូលរួមរបស់ព្រះសង្ឃ និងពុទ្ធបរិស័ទ នឹងក្លាយជាកម្លាំងសំខាន់ក្នុងការបង្កើតទម្លាប់ល្អ និងវប្បធម៌ទុកដាក់សំរាមឱ្យបានត្រឹមត្រូវនៅក្នុងសហគមន៍។
អនាម័យល្អ ចាប់ផ្តើមពីការទទួលខុសត្រូវរបស់មនុស្សម្នាក់ៗ ហើយបរិស្ថានស្អាតត្រូវការការចូលរួមរបស់សហគមន៍ទាំងមូល។ ការផ្តល់ធុងសំរាមដល់វត្តអារាមទូទាំងខេត្ត គឺជាជំហានមួយក្នុងការបន្តជំរុញស្មារតីនេះឱ្យកាន់តែទូលំទូលាយ ដើម្បីឱ្យវត្តអារាមក្លាយជាទីកន្លែងស្អាត ស្រស់បំព្រង និងជាគំរូល្អសម្រាប់សហគមន៍ក្នុងការរួមគ្នាថែរក្សាបរិស្ថាន៕

ដោយ ឈុន សារ៉ាត