AKP កំពង់ធំ ថ្ងៃទី១៥ ខែកញ្ញា ឆ្នាំ២០២៦--លោក គៀង សេងគី ប្រធានសមាគមក្រុមប្រឹក្សាថ្នាក់មូលដ្ឋានខេត្តកំពង់ធំ សហការជាមួយសាខាស្រុក និងរតនាគារខេត្តកំពង់ធំ បានរៀបចំកិច្ចប្រជុំសាខា និងបើកវគ្គបណ្តុះបណ្តាលដល់ក្រុមប្រឹក្សាស្រុក/ឃុំ ស្តីពីតួនាទី ភារកិច្ចរបស់គណៈកម្មការសាខា និងការប្រើប្រាស់ថវិកាសេវាសង្គម និងអនាម័យបរិស្ថាននៅសាលប្រជុំស្រុកសណ្តាន់ ខេត្តកំពង់ធំ នាព្រឹកថ្ងៃទី១៥ ខែកញ្ញា ឆ្នាំ២០២៦ ដោយមានការអញ្ជើញចូលរួមពីលោក ស៊ឹម វណ្ណា ប្រធានសាខាសមាគមក្រុមប្រឹក្សាថ្នាក់មូលដ្ឋានស្រុក លោក ឃាន់ សុខន អភិបាលរងស្រុក តំណាងលោក ស៊ិន វណ្ណវុឌ្ឍ អភិបាល នៃគណៈអភិបាលស្រុកសណ្ដាន់ ក្រុមការងាររតនាគារខេត្តកំពង់ធំ លោក-លោកស្រីមេឃុំ សមាជិកក្រុមប្រឹក្សាឃុំ និងស្មៀនឃុំ ជំនួយការហិរញ្ញវត្ថុឃុំ និងប្រធានការិយាល័យជុំវិញស្រុកសរុបចំនួន១០០នាក់។

លោក ស៊ឹម វណ្ណា បានលើកឡើងពីគោលបំណង កិច្ចប្រជុំសាខា និងវគ្គបណ្តុះបណ្តាលដល់ក្រុមប្រឹក្សាស្រុក/ឃុំ ស្តីពីការប្រើប្រាស់ថវិកាសេវាសង្គម និងអនាម័យបរិស្ថានរួមមាន៖ ១.ពង្រឹងការយល់ដឹង និងចំណេះដឹង របស់ក្រុមប្រឹក្សាស្រុក/ឃុំ អំពីគោលការណ៍ នីតិវិធី និងការគ្រប់គ្រងការប្រើប្រាស់ថវិកាសេវាសង្គម និងអនាម័យបរិស្ថានឱ្យបានត្រឹមត្រូវ និងមានប្រសិទ្ធភាព។ ២.ពង្រឹងសមត្ថភាពក្នុងការរៀបចំផែនការ និងថវិកា ដោយផ្តោតលើតម្រូវការជាក់ស្តែងរបស់ប្រជាពលរដ្ឋ ជាពិសេសក្រុមងាយរងគ្រោះនិងការលើកកម្ពស់សុខុមាលភាពសហគមន៍។ ៣.បង្កើនប្រសិទ្ធភាព និងតម្លាភាពនៃការប្រើប្រាស់ថវិកាឱ្យស្របតាមផែនការ គោលការណ៍ និងនីតិវិធីពាក់ព័ន្ធ ព្រមទាំងធានាឱ្យការចំណាយមានគណនេយ្យភាព និងអាចត្រួតពិនិត្យបាន។

លោក ឃាន់ សុខន អភិបាលរងស្រុកសណ្តាន់ បានគូសបញ្ជាក់ថា ដើម្បីលើកកម្ពស់ការអនុវត្តសកម្មភាពអនាម័យបរិស្ថាននៅតាមមូលដ្ឋាន កាត់បន្ថយបញ្ហាសំរាម ការបំពុលបរិស្ថាន និងរួមចំណែកការពារសុខភាពប្រជាពលរដ្ឋ។ កិច្ចសហការរវាងស្រុក/ឃុំ និងភាគីពាក់ព័ន្ធ ក្នុងការរៀបចំ អនុវត្ត តាមដាន និងវាយតម្លៃសកម្មភាពដែលទទួលបានការគាំទ្រពីថវិកាសេវាសង្គម និងអនាម័យបរិស្ថាន។ ចែករំលែកបទពិសោធន៍ និងបញ្ហាប្រឈម ក្នុងការអនុវត្តការងារនៅមូលដ្ឋាន ដើម្បីស្វែងរកដំណោះស្រាយសមស្រប និងកែលម្អការអនុវត្តឱ្យកាន់តែមានប្រសិទ្ធភាព។ ធានាឱ្យថវិកាត្រូវបានប្រើប្រាស់ចំគោលដៅ និងផ្តល់ផលប្រយោជន៍ជាក់ស្តែងដល់ប្រជាពលរដ្ឋ តាមរយៈការផ្តល់សេវាសង្គម និងការកែលម្អអនាម័យបរិស្ថាននៅមូលដ្ឋាន។

លោកស្រី ហុង ស៊ីចាន់ មន្រ្តីការិយាល័យគណនេយ្យថវិកាថ្នាក់ក្រោមជាតិបានធ្វើបទបង្ហាញស្តីពីការគ្រប់គ្រង ការចាត់ចែង និងការកំណត់មុខសញ្ញាចំណាយថវិកាសេវាសង្គម និងអនាម័យបរិស្ថាន នៃមូលនិធិក្រុង/ស្រុក និងមូលនិធិឃុំ/សង្កាត់។ សារៈសំខាន់នៃថវិកាសេវាសង្គម និងអនាម័យបរិស្ថាន តួនាទីរបស់ក្រុង/ស្រុក និងឃុំ/សង្កាត់ ក្នុងការផ្តល់សេវាសាធារណៈជូនប្រជាពលរដ្ឋ គោលបំណងនៃការគ្រប់គ្រង និងចាត់ចែងចំណាយឱ្យមានប្រសិទ្ធភាព តម្លាភាព និងគណនេយ្យភាព។ ត្រូវយល់ដឹងពីគោលការណ៍គ្រប់គ្រងថវិកា កំណត់ឱ្យបានច្បាស់នូវមុខសញ្ញាចំណាយ ដែលអាចប្រើប្រាស់មូលនិធិ បានបែងចែកតួនាទី និងការទទួលខុសត្រូវរបស់អ្នកពាក់ព័ន្ធ បង្កើនប្រសិទ្ធភាពក្នុងការប្រើប្រាស់ថវិកាសម្រាប់សេវាសង្គម និងបរិស្ថាន។

លោក គៀង សេងគី ប្រធានសមាគមក្រុមប្រឹក្សាថ្នាក់មូលដ្ឋានខេត្តកំពង់ធំ បានមានប្រសាសន៍ថា ក្រោយពីវគ្គបណ្ដុះបណ្ដាលនេះចប់ សំណូមពរដល់រដ្ឋបាលឃុំទាំងអស់ត្រូវតែមើលអនុក្រឹត្យ សារាចរណែនាំរបស់ក្រួងមហាផ្ទៃ និងឯកសារដែបានចែកជូនក្នុងវគ្គបណ្តុះបណ្តាល ដើម្បីឱ្យដឹងពីការចំណូលចំណាយក្នុងការប្រើប្រាស់ថវិកានៅក្នុងរដ្ឋបាលឃុំរបស់ខ្លួន។ ការអនុវត្តតួនាទី/ភារកិច្ច អនុវត្តន៍ឱ្យបានល្អប្រសើរ ត្រូវអនុវត្តន៍ឱ្យត្រូវគោលការណ៍របស់សមាគម ហើយសមាគមខិតខំព្យាយាមរកមេរៀនណាល្អៗ ដើម្បីឱ្យរដ្ឋបាលឃុំមានការវត្តបន្ថែមទៀត។ សូមរក្សាភាពផ្ទៃក្នុងនៅក្នុងរដ្ឋបាលឃុំរបស់ខ្លួន ហើយចេះទំនាក់ទំនងល្អរវាងក្រុមការងារ និងអង្គការដៃគូនានា ដើម្បីឱ្យការងារនៅក្នុងអង្គភាពរបស់ខ្លួនទទួលបានភាពជោគជ័យ៕

ដោយ ស៊ុម វណ្ណា