AKP កំពង់ធំ ថ្ងៃទី១៥ ខែកញ្ញា ឆ្នាំ២០២៦--រដ្ឋបាលខេត្តកំពង់ធំនាព្រឹកថ្ងៃទី១៥ ខែកញ្ញា ឆ្នាំ២០២៦ បានរៀបចំកិច្ចប្រជុំផ្សព្វផ្សាយអំពីទម្រង់របាយការណ៍ ស្តីពីវឌ្ឍនភាព និងសមិទ្ធផលសំខាន់ៗរបស់រដ្ឋបាលខេត្ត ដែលសម្រេចបានចាប់ពីឆ្នាំ២០២៣ ដល់ឆ្នាំ២០២៦ ក្រោមអធិបតីភាពលោក លី វេត អភិបាលរងខេត្តកំពង់ធំ ដោយមានការចូលរួមពីថ្នាក់ដឹកនាំ តំណាងមន្ទីរអង្គភាពពាក់ព័ន្ធអភិបាលរងក្រុង ស្រុក និងមន្ត្រីរាជការ នៃរដ្ឋបាលខេត្តកំពង់ធំជាច្រើនរូប។

លោក លី វេត បានមានប្រសាសន៍ថា កិច្ចប្រជុំនេះ មានគោលបំណងផ្សព្វផ្សាយនិងណែនាំអំពីទម្រង់ ព្រមទាំងវិធីសាស្ត្រក្នុងការរៀបចំរបាយការណ៍ស្តីពីវឌ្ឍនភាព និងសមិទ្ធផលសំខាន់ៗ ដែលរដ្ឋបាលខេត្ត និងមន្ទីរអង្គភាពពាក់ព័ន្ធសម្រេចបានចាប់ពីឆ្នាំ២០២៣ ដល់ឆ្នាំ២០២៦ ហើយការរៀបចំរបាយការណ៍ត្រូវធ្វើឱ្យបានច្បាស់លាស់ ត្រឹមត្រូវ និងមានប្រភពទិន្នន័យច្បាស់លាស់ ដោយត្រូវឆ្លុះបញ្ចាំងឱ្យបានគ្រប់ជ្រុងជ្រោយអំពីលទ្ធផលការងារ វឌ្ឍនភាព និងសមិទ្ធផលសំខាន់ៗ ដែលសម្រេចបានក្នុងមូលដ្ឋាន។

លោកអភិបាលរងខេត្តបានបញ្ជាក់ថា ទីស្តីការគណៈរដ្ឋមន្ត្រី និងរៀបចំចងក្រងរបាយការណ៍សង្ខេបស្តីពីវឌ្ឍនភាព និងសមិទ្ធផលសំខាន់ៗរបស់រាជរដ្ឋាភិបាលនៃព្រះរាជាណាចក្រកម្ពុជាដែលសម្រេចបាន ដើម្បីចែកជូនគ្រប់ក្រសួង ស្ថាប័ន អង្គភាព គណៈកម្មាធិការ ក្រុមប្រឹក្សា អាជ្ញាធរ រដ្ឋបាលរាជធានី ខេត្ត ក្រុង ស្រុក និងឃុំ សង្កាត់ សម្រាប់ផ្សព្វផ្សាយជូនដល់ប្រជាពលរដ្ឋ និងមហាជនឱ្យបានជ្រួតជ្រាបអំពីសកម្មភាពការងារការរីកចម្រើន និងសមិទ្ធផលនានាដែលរាជរដ្ឋាភិបាលនីតិកាលទី៧នៃរដ្ឋសភា សម្រេចបានក្រោមការដឹកនាំប្រកបដោយភាពឈ្លាសវៃ ចក្ខុវិស័យវែងឆ្ងាយ និងគតិបណ្ឌិតដ៏ខ្ពង់ខ្ពស់បំផុតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា។

តាមរយៈកិច្ចប្រជុំនេះដែរលោកអភិបាលរងខេត្តរំពឹងថា ការរៀបចំរបាយការណ៍ស្តីពីវឌ្ឍនភាព និងសមិទ្ធផលសំខាន់ៗចាប់ពីឆ្នាំ២០២៣ ដល់ឆ្នាំ២០២៦ នឹងមានភាពគ្រប់ជ្រុងជ្រោយ ត្រឹមត្រូវ និងអាចឆ្លុះបញ្ចាំងបានយ៉ាងច្បាស់អំពីសមិទ្ធផល និងការរីកចម្រើនដែលខេត្តកំពង់ធំសម្រេចបានក្នុងរយៈពេលកន្លងមក៕

ដោយ ស៊ុម វណ្ណា