AKP អង់ការ៉ា ថ្ងៃទី១៤ ខែកញ្ញា ឆ្នាំ២០២៦--អ្នកសារព័ត៌មានកម្ពុជា ពីររូប បាននិងកំពុងចូលរួមក្នុងវគ្គបណ្តុះបណ្តាលពិសេស ស្តីពី «សារព័ត៌មានសង្គ្រាម» (War Journalism) ដែលរៀបចំឡើងនៅរដ្ឋធានីអង់ការ៉ា ប្រទេសតួកគី ដើម្បីពង្រឹងសមត្ថភាព ជំនាញរាយការណ៍ព័ត៌មានក្នុងស្ថានភាពអាសន្ន និងបច្ចេកទេសការពារសុវត្ថិភាពផ្ទាល់ខ្លួនក្នុងតំបន់ដែលមានជម្លោះប្រដាប់អាវុធ។

វគ្គបណ្តុះបណ្តាលកម្រិតអន្តរជាតិនេះ រៀបចំឡើងដោយកិច្ចសហប្រតិបត្តិការរវាងភ្នាក់ងារព័ត៌មានរដ្ឋតួក​គី Anadolu Agency (AA) អាជ្ញាធរសហប្រតិបត្តិការ និងការអភិវឌ្ឍតួកគី (TIKA) ព្រមទាំងបណ្ឌិត្យសភានគរបាលជាតិតួកគី។ កម្មវិធីនេះ បានទាក់ទាញអ្នកសារព័ត៌មាន និងអ្នកយកព័ត៌មានមកពីបណ្តាប្រទេសជាច្រើនជុំវិញពិភពលោក រួមទាំងតំណាងអ្នកសារព័ត៌មានមកពីប្រទេសកម្ពុជា ផងដែរ។

វគ្គបណ្ដុះបណ្ដាលនេះ ក្នុងប្រយោជន៍ដើម្បីត្រៀមលក្ខណៈឆ្លើយតបទៅនឹងគ្រោះថ្នាក់ដែលមើលមិនឃើញ អ្នកចូលរួមទទួលនឹងបានការហ្វឹកហ្វឺនយ៉ាងហ្មត់ចត់ទាំងទ្រឹស្តី និងការអនុវត្តផ្ទាល់លើប្រធានបទសំខាន់ៗ រួមមាន៖ សុវត្ថិភាព និងការរស់រានមានជីវិត៖ បច្ចេកទេសគេចខ្លួនពីការបាញ់ប្រហារ ការការពារខ្លួនពីអាវុធគីមី គ្រាប់មីន និងការរស់នៅក្នុងតំបន់គ្មានស្បៀងអាហារ។ ការសង្គ្រោះបន្ទាន់ (First Aid)៖ វិធីសាស្ត្រសង្គ្រោះជីវិតបឋមនៅលើសមរភូមិ ការឃាត់ឈាម និងការដឹកជញ្ជូនអ្នករបួសក្នុងស្ថានភាពប្រញាប់ប្រញាល់។ ចិត្តវិទ្យាសង្គ្រាម៖ ការគ្រប់គ្រងផ្លូវចិត្ត និងសម្ពាធអារម្មណ៍ពេលស្ថិតក្នុងស្ថានភាពតានតឹង ឬការគំរាមកំហែងដល់ជីវិត។ ក្រមសីលធម៌សារព័ត៌មាន៖ ការរាយការណ៍ព័ត៌មានប្រកបដោយការទទួលខុសត្រូវ មិនលំអៀង និងការគោរពសិទ្ធិមនុស្សក្នុងកំឡុងពេលមានជម្លោះ។

ជាមួយគ្នានេះ តំណាងអ្នកសារព័ត៌មានកម្ពុជា បានសម្តែងនូវការចាប់អារម្មណ៍យ៉ាងខ្លាំងចំពោះការហ្វឹកហ្វឺនជាក់ស្តែង ដែលមានការបង្កើតស៊ីមេទ្រី (Simulation) ដូចទៅនឹងសមរភូមិពិតៗ។ បទពិសោធន៍នេះមិនត្រឹមតែជួយឱ្យពួកគាត់យល់ដឹងពីតម្លៃនៃសុវត្ថិភាពផ្ទាល់ខ្លួនប៉ុណ្ណោះទេ ប៉ុន្តែថែមទាំងបង្កើនភាពជឿជាក់ក្នុងការប្រមូល និងផ្ទៀងផ្ទាត់ព័ត៌មានប្រកបដោយសុក្រឹតភាព ដើរតួនាទីជាស្ពានចម្លងព័ត៌មានពិតជូនសាធារណជន។

ការចូលរួមរបស់អ្នកសារព័ត៌មានកម្ពុជា នៅក្នុងកម្មវិធីកម្រិតពិភពលោកនេះ គឺជាជំហានដ៏សំខាន់មួយក្នុងការលើកកម្ពស់វិស័យសារព័ត៌មាននៅកម្ពុជា ឱ្យមានស្តង់ដារប្រកួតប្រជែង និងមានការប្រុងប្រយ័ត្នខ្ពស់ មិនត្រឹមតែសម្រាប់ការយកព័ត៌មានក្នុងសង្គ្រាមនោះទេ ប៉ុន្តែរួមបញ្ចូលទាំងការរាយការណ៍អំពីគ្រោះមហន្តរាយធម្មជាតិ និងកលយុគផ្សេងៗផងដែរ។

សូមបញ្ជាក់ផងដែរថា អ្នកសារព័ត៌មានកម្ពុជា ២រូប ដែលត្រូវបានជ្រើសរើសឱ្យចូលរួមវគ្គបណ្តុះបណ្តាលដ៏មានសារសំខាន់នេះ រួមមាន៖ លោក យា ចិន្តាខន្តី មកពីទីភ្នាក់ងារសារព័ត៌មានកម្ពុជា (AKP) និងលោក ហ៊ីម ករុណា មកពីទូរទស្សន៍ជាតិកម្ពុជា (TVK)។ វគ្គបណ្តុះបណ្តាលពិសេស ស្តីពី «សារព័ត៌មានសង្គ្រាម» (War Journalism) នេះ នឹងប្រព្រឹត្តទៅចាប់ពីថ្ងៃទី១៤ ដល់ថ្ងៃទី២៥ ខែកញ្ញា ឆ្នាំ២០២៦ នៅទីក្រុងអង់ការ៉ា ប្រទេសតួកគី៕

ដោយ៖ យា ចិន្តាខន្តី