AKPកំពង់ធំទី១៤ខែកញ្ញា ឆ្នាំ២០២៦--លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំបានណែនាំដល់កងកម្លាំងត្រូវបន្តពង្រឹងការគ្រប់គ្រងបញ្ជានិងកិច្ចអន្តរាគមន៍ដល់ប្រជាពលរដ្ឋ។ឧត្តមសេនីយ៍ទោស្នងការបានណែនាំដូចនេះក្នុងពិធីគោរពទង់ជាតិ នៃព្រះរាជាណាចក្រកម្ពុជានៅបរិវេណស្នងការដ្ឋាននគរបាលខេត្តនាព្រឹកថ្ងៃទី១៤ខែកញ្ញាឆ្នាំ២០២៦ដោយមានកងកម្លាំងនគរបាលចូលរួមចំនួន ៣៧០នាក់។

លោកឧត្តមសេនីយ៍ទោ ហេង សុផលបានណែនាំដល់លោកនាយការិយាល័យជំនាញទាំង៣២ឱ្យបន្តពង្រឹងការគ្រប់គ្រងកម្លាំងឱ្យបានហ្មត់ចត់ តាមរយៈការត្រួតពិនិត្យវត្តមានកងកម្លាំងជាក់ស្តែងក្នុងពេលបំពេញភារកិច្ច ព្រមទាំងពង្រឹងរបៀបរបបការងារជំនាញនិងតាមដាន ត្រួតពិនិត្យការបំពេញភារកិច្ចតាមឋានានុក្រម សេចក្តីប្រកាសនិងបទបញ្ជារបស់ថ្នាក់ដឹកនាំ ប្រកបដោយស្មារតីទទួលខុសត្រូវខ្ពស់។

ការអនុវត្តការងារប្រចាំថ្ងៃដូចជាការគោរពទង់ជាតិ ការប្រចាំបញ្ជានិងការផ្លាស់ប្តូរវេនប្រចាំការនៅតាមអង្គភាព ដើម្បីធានាថាកងកម្លាំង បានការត្រៀមខ្លួនជានិច្ច សម្រាប់អន្តរាគមន៍ និងជួយសង្គ្រោះប្រជាពលរដ្ឋ នៅពេលជួបគ្រោះថ្នាក់ ឧបទ្ទវហេតុ ឬគ្រោះមហន្តរាយដែលបណ្តាលមកពីបាតុភូតធម្មជាតិជាយថាហេតុ។

ដោយបច្ចុប្បន្នស្ថិតក្នុងរដូវវស្សានិងអាកាសធាតុមានការប្រែប្រួល លោកឧត្តមសេនីយ៍ទោស្នងការបានផ្តាំផ្ញើដល់កងកម្លាំងទាំងអស់ឱ្យយកចិត្តទុកដាក់ថែរក្សាសុខភាព តាមរយៈការរស់នៅស្អាត បរិភោគអាហារស្អាត និងរក្សាអនាម័យជាប្រចាំ។ត្រូវចូលរួមធ្វើពលកម្មអនាម័យបោសសម្អាតបរិស្ថានជុំវិញកន្លែងបំពេញភារកិច្ចនិងកន្លែងស្នាក់នៅ ឱ្យមានសោភ័ណភាព សណ្តាប់ធ្នាប់ និងអនាម័យល្អ។

លោកឧត្តមសេនីយ៍ទោស្នងការក៏បានជំរុញឱ្យកងកម្លាំងបន្តពង្រឹងសាមគ្គីភាពនិងឯកភាពផ្ទៃក្នុង ព្រមទាំងយកចិត្តទុកដាក់ត្រួតពិនិត្យនិងជួយដោះស្រាយបញ្ហាប្រឈមរបស់មន្ត្រីក្រោមឱវាទ ក្នុងនោះ ត្រូវចេះជួយឧបត្ថម្ភគ្នាតាមលទ្ធភាព ទាំងធនធាន សម្ភារៈនិងគ្រឿងឧបភោគបរិភោគ ព្រមទាំងលើកទឹកចិត្ត និងជួយយកអាសារគ្នាទៅវិញទៅមកនៅពេលជួបការលំបាក។

លោកឧត្តមសេនីយ៍ទោ ហេង សុផលស្នងការនគរបាលខេត្តកំពង់ធំបានបញ្ជាក់ថា ការរក្សាបាននូវសាមគ្គីភាព ឯកភាពផ្ទៃក្នុង និងស្មារតីទទួលខុសត្រូវរបស់កងកម្លាំងគ្រប់រូប គឺជាកត្តាសំខាន់ក្នុងការពង្រឹងប្រសិទ្ធភាពការងារ និងរួមចំណែកកសាងអង្គភាពឱ្យកាន់តែរឹងមាំ មានសណ្តាប់ធ្នាប់និងមានការរីកចម្រើនជាបន្តបន្ទាប់៕

ដោយ៖ ស៊ុម វណ្ណា