AKP ភ្នំពេញ ថ្ងៃទី១២ ខែកញ្ញា ឆ្នាំ២០២៦--

ឯកឧត្តម សរ សិទ្ធិ រដ្ឋលេខាធិការ ក្រសួងមហាផ្ទៃ និងជាប្រធានសហព័ន្ធកីឡាសូហ្វតិន្នីសកម្ពុជាបានលើកបង្ហាញពីឆន្ទៈរបស់ថ្នាក់ដឹកនាំ គ្រូបង្វឹក អត្តពលិកសូហ្វតិន្នីសកម្ពុជាថា បើទោះបីជា យើងមិនសង្ឃឹមឈ្នះមេដាយក៏ដោយ ក៏យើងនឹងប្រឹងប្រែងប្រកួតឱ្យអស់ពីសមត្ថភាព បច្ចេកទេសប្រកបដោយស្មារតីកីឡាដ៏មោះមុត ក្នុងការចូលរួមប្រកួតកីឡាអាស៊ី (Asian Games) នៅប្រទេសជប៉ុន ឆាប់ៗនេះ។

នេះជាការលើកឡើងរបស់ឯកឧត្តម នៅក្នុងពិធីសំណេះសំណាលលើកទឹកចិត្តមុនចូលរួមប្រកួត ដោយនឹងចេញដំណើរនាថ្ងៃទី១៣ ខែកញ្ញា ឆ្នាំ២០២៦ ដោយមានកីឡាករ កីឡាការិនីជម្រើសជាតិសូហ្វតិន្នីសកម្ពុជា១០នាក់ និងគ្រូបង្វឹក២នាក់ ប្រតិភូម្នាក់នឹងត្រូវចេញដំណើរទៅចូលរួមប្រកួតកីឡាអាស៊ី លើកទី២០ នៅប្រទេសជប៉ុន ឆ្នាំ២០២៦។ ឯកឧត្តម សរ សិទ្ធិ លើកឡើងថា ប្រភេទកីឡាសូហ្វតិន្នីសកម្ពុជា ជាប្រភេទកីឡា១ ក្នុងចំណោម១៤ប្រភេទកីឡារបស់កម្ពុជា ដែលត្រៀមចូលរួមប្រកួតកីឡាអាស៊ី ក្នុងខែកញ្ញានេះ នៅប្រទេសជប៉ុន ហើយយើងក៏មិនអាចសង្ឃឹមថាយើងនឹងអាចដណ្តើមបានមេដាយទាំងអស់នោះទេ ប៉ុន្តែការចូលរួមនេះ គឺដើម្បីបង្ហាញស្មារតីកីឡា និងការផ្សព្វផ្សាយវប្បធម៌ អរិយធម៌ខ្មែរលើឆាកអន្តជាតិផងដែរ។

ឯកឧត្តម សរ សិទ្ធិ មានប្រសាសន៍បែបនេះថា៖ «ក្នុងនាមជាអ្នកកីឡា យើងមិនផ្តោតតែទៅលើមេដាយមួយមុខនោះទេ ប៉ុន្តែជាការរួមជាមួយគ្នានឹងការបង្ហាញវត្តមានប្រភេទកីឡាសូហ្វតិន្នីសកម្ពុជានៅលើវេទិកាអន្តរជាតិ ក្នុងការផ្សព្វផ្សាយអរិយធម៌ វប្បធម៌ជាតិសាសន៍របស់ខ្មែរយើងទៅលើឆាកអន្តរជាតិ បើទោះបីជាយើងមិនសង្ឃឹមថានឹងអាចដណ្តើមបានមេដាយក៏ដោយ ក៏ស្មារតីកីឡារបស់យើងនៅតែមាន ដោយយើងនៅតែតស៊ូនៅលើទីលានកីឡាជាមួយគេ។ យើងនឹងខិតខំប្រឹងប្រែងឱ្យអស់ពីលទ្ធភាព អស់ពីបច្ចេកទេស តិចនិច ភាពប៉ុនប្រសព្វ ការប្រឹងប្រែងហ្វឹកហាត់របស់យើងនៅលើទីលានប្រកួត ដោយរឿងឈ្នះចាញ់ជារឿងធម្មតា»។

ឯកឧត្តមប្រធានសហព័ន្ធបន្ថែមថា កាលពីដើមឆ្នាំនេះ សហព័ន្ធកីឡាសូហ្វតិន្នីសកម្ពុជាបានបញ្ជូនអត្តលិកយើងទៅចូលរួមប្រកួត Asia Junior នៅប្រទេសឥណ្ឌាដោយយើងគិតដូចគ្នាដែរថា យើងនឹងមិនដណ្តើមបានមេដាយនោះទេ ប៉ុន្តែឆ្លងកាត់ការខិតខំប្រឹងប្រែងយើងដណ្តើមបានមេដាយរហូតដល់៥គ្រឿង គឺមេដាយប្រាក់២ និងសំរឹទ្ធិ៣គ្រឿងប្រកបដោយមោទនភាពសម្រាប់ជាតិ និងសហព័ន្ធកីឡាសួហ្វតិន្នីសកម្ពុជាផងដែរ។

គួរបញ្ជាក់ថា ការប្រកួតកីឡាអាស៊ី (Asian Games) លើកទី២០ នៅទីក្រុងណាកូយ៉ា ប្រទេសជប៉ុន ពីថ្ងៃទី១៩ ខែកញ្ញា ដល់ថ្ងៃទី០៤ ខែតុលា ឆ្នាំ២០២៦ គឺកម្ពុជាបានសម្រេចបញ្ជូនកីឡាចំនួន១៤ប្រភេទ រួមមាន៖ ហែលទឹក អត្តពលកម្ម ប្រដាល់សកល ជឺជីតស៊ូ យូដូ ការ៉ាតេ តេក្វាន់ដូWT ទ្រីយ៉ាត្លុង ចំបាប់ អេឡិចត្រូនិក បាល់ទាត់លើតុ គុនចម្រុះ ទូកក្តោង និងសូហ្វតិន្នីស ដោយមានប្រតិភូ មន្ត្រី គ្រូបង្វឹក គ្រូជំនួយ កីឡាករ កីឡាការិនីសរុប ចំនួន ១០៦នាក់។ ក្នុងនោះសហព័ន្ធកីឡាសូហ្វតិន្នីសកម្ពុជាបានចាត់បញ្ជូន ប្រតិភូ គ្រូបង្វឹក-គ្រូជំនួយ និងកីឡាករ-កីឡាការិនី សរុបចំនួន១៣នាក់ រួមមាន៖ កញ្ញា ឃនសាត សាន្នីតា ប្រតិភូ លោក យី សារិន គ្រូបង្វឹក លោក OGIWARA MASATO គ្រូជំនួយ កីឡាករ ៥នាក់ គឺ ឌឹម សំសុជាភារុណ, យី គាវីរៈ កាន់ សុភ័ណ្ឌ, សយ សុធន់, ចៅ វីវ៉ា និងកីឡាការិនី៥នាក់ រួមមាន៖កីឡាការិនី ម៉េត ម៉ារីយ៉ាន, ឆាន ឈាវហួយ, យាន សុខឿន, ឃុន ចន្ទរ៉ូសិកា និងកីឡាការិនី ឈន ច័ន្ទកញ្ញា៕

ដោយ ហេង ណាលីន (រូបភាព៖ សហព័ន្ធ)