AKP សៀមរាប ថ្ងៃទី១១ ខែកញ្ញា ឆ្នាំ២០២៦--ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុក ជាអគ្គនាយក នៃមជ្ឈ មណ្ឌលសកម្មភាពកំចាត់មីនកម្ពុជា(CMAC)បានឱ្យដឹងថា ស៊ីម៉ាក់បានកំពុងជំរុញការពន្លឿនការបោសសម្អាតគ្រាប់បែកចង្កោម និងសំណល់ជាតិផ្ទុះពីសង្គ្រាម ដើម្បីធានាសុវត្ថិភាពប្រជាពលរដ្ឋ និងស្តារការប្រើប្រាស់ដីធ្លីឡើងវិញ ក្រោយការស្រាវជ្រាវរកឃើញសំណល់គ្រាប់បែកចង្កោមជាច្រើននៅតំបន់រងផលប៉ះពាល់ពីការឈ្លានពានរបស់យោធាថៃក្នុងឆ្នាំ២០២៥។

ការលើកឡើងនេះ ធ្វើឡើងក្នុងសិក្ខាសាលាស្តីពី «ផលប៉ះពាល់ដោយសារគ្រាប់បែកចង្កោមពីការឈ្លានពានរបស់ថៃ ក្នុងឆ្នាំ២០២៥ និងដំណើរឆ្ពោះទៅធានាសុខសុវត្ថិភាពតំបន់រងផលប៉ះពាល់» ដែលរៀបចំដោយអង្គភាព CMAC នៅសារមន្ទីរតេជោសន្តិភាព ខេត្តសៀមរាប នាថ្ងៃទី១១ ខែកញ្ញា ឆ្នាំ២០២៦ ដោយមានការចូលរួមពីអាជ្ញាធរមីន ស្ថាប័នជាតិ និងអន្តរជាតិ អង្គការដៃគូអភិវឌ្ឍន៍ និងប្រតិបត្តិករសកម្មភាពមីនជាច្រើន។

តាមការបង្ហាញក្នុងសិក្ខាសាលា ក្រុមជំនាញបានរកឃើញសំណល់គ្រាប់បែកចង្កោមប្រភេទ M42, M46 និង M85 នៅតំបន់រងផលប៉ះពាល់ ដែលបានបន្សល់ទុកកូនគ្រាប់មិនទាន់ផ្ទុះ និងបង្កហានិភ័យរយៈពេលវែងដល់ប្រជាពលរដ្ឋ កសិករ និងការប្រើប្រាស់ដីធ្លី។ ហើយការប្រើប្រាស់អាវុធធុនធ្ងន់ និងគ្រាប់បែកចង្កោមក្នុងអំឡុងការវាយប្រហារ បានបង្កការខូចខាតដល់ហេដ្ឋារចនាសម្ព័ន្ធសាធារណៈ រួមមានសាលារៀន វត្តអារាម មណ្ឌលសុខភាព និងទីតាំងស៊ីវិលមួយចំនួន ខណៈសំណល់ជាតិផ្ទុះដែលនៅសេសសល់នៅតែបន្តគំរាមកំហែងដល់ជីវិតប្រជាពលរដ្ឋ ជាពិសេសកុមារ។

សិក្ខាសាលានេះក៏បានផ្តោតលើការចែករំលែកភស្តុតាង និងព័ត៌មានជាក់ស្តែង ពីតំបន់រងផលប៉ះពាល់ ការវាយតម្លៃហានិភ័យ ការស្រាវជ្រាវ និងកំណត់ទីតាំងរងផលប៉ះពាល់ ការអប់រំផ្សព្វផ្សាយអំពីគ្រោះថ្នាក់ដោយសារសំណល់ជាតិផ្ទុះ ការគាំទ្រជនរងគ្រោះ និងការពន្លឿនការបោសសម្អាត។ ជាមួយគ្នានេះ សិក្ខាសាលានេះ ក៏បានក្លាយជាវេទិកាសម្រាប់ពង្រឹងកិច្ចសហប្រតិបត្តិការរវាងស្ថាប័នជាតិ និងដៃគូអន្តរជាតិ ក្នុងការកៀរគរធនធាន បច្ចេកទេស និងជំនួយមនុស្សធម៌ ដើម្បីឆ្លើយតបនឹងផលវិបាកដែលបន្សល់ទុកដោយសំណល់យុទ្ធភណ្ឌសង្គ្រាម។

ឯកឧត្តមបានគូសបញ្ជាក់ថា ការឈប់ប្រយុទ្ធមិនមានន័យថា គ្រោះថ្នាក់បានបញ្ចប់នោះទេ ព្រោះគ្រាប់បែកចង្កោម និងសំណល់ជាតិផ្ទុះដែលនៅសេសសល់នៅតែជាការគំរាមកំហែងដល់ជីវិតមនុស្ស និងការអភិវឌ្ឍន៍។ ដូច្នេះការរួមគ្នារបស់ស្ថាប័នជាតិ ដៃគូអភិវឌ្ឍន៍ និងប្រតិបត្តិករអន្តរជាតិ គឺមានសារៈសំខាន់ក្នុងការពន្លឿនការបោសសម្អាត និងធានាឱ្យតំបន់រងផលប៉ះពាល់មានសុវត្ថិភាព និងអាចប្រើប្រាស់បានឡើងវិញ៕

ដោយ ឃុត សៅ