AKP ថ្ងៃទី១១ ខែកញ្ញា ឆ្នាំ២០២៦ -- ក្រុមហ៊ុនធានារ៉ាប់រង ហ្វតតេ បានធ្វើការវិនិយោគលើសញ្ញាបណ្ណចីរភាពមានបុគ្គលធានា» (Guaranteed Sustainability Bond) របស់គ្រឹះស្ថានមីក្រូហិរញ្ញវត្ថុ អិលអូអិលស៊ី (ខេមបូឌា) ភីអិលស៊ី ដែលបានចុះបញ្ជីនៅលើផ្សារមូលបត្រកម្ពុជា (CSX)។  ក្នុងពិធីចុះបញ្ជីលក់សញ្ញាបណ្ណចីរភាពជាផ្លូការរបស់ក្រុមហ៊ុន អិលអូអិលស៊ី (ខេមបូឌា) ភីអិលស៊ី នៅផ្សារមូលបត្រកម្ពុជា នាថ្ងៃទី១០ ខែកញ្ញា ឆ្នាំ២០២៦ គឺជាព្រឹត្តិការណ៍ដ៏សំខាន់មួយទៀតក្នុងការពង្រឹងការប្តេជ្ញាចិត្តរបស់ក្រុមហ៊ុន ហ្វតតេ ក្នុងការគាំទ្រដល់ការអភិវឌ្ឍសេដ្ឋកិច្ចរបស់ប្រទេសកម្ពុជា និងការពង្រឹងទីផ្សារទុនដែលកំពុងរីកចម្រើនរបស់ប្រទេស​។

សញ្ញាបណ្ណចីរភាពមានបុគ្គលធានារបស់គ្រឹះស្ថាន អិលអូអិលស៊ី កំពុងបើកទំព័រថ្មីលើទីផ្សារទុនរបស់ប្រទេសកម្ពុជា ក្នុងនាមជាការបោះផ្សាយសញ្ញាបណ្ណដំបូងគេបង្អស់ដែលមានការធានាពីសាជីវកម្មធានាឥណទានកម្ពុជា(CGCC)។ ព្រឹត្តិការណ៍ដ៏សំខាន់នេះមិនត្រឹមតែពង្រីកវិសាលភាពនៃឱកាសវិនិយោគ នៅលើទីផ្សារប៉ុណ្ណោះទេ ប៉ុន្តែថែមទាំងជួយពង្រឹងទំនុកចិត្តក្នុងវិស័យមូលបត្របំណុល (Fixed-Income Sector) ដែលកំពុងរីកចម្រើននៅកម្ពុជាផងដែរ។ នេះបើយោងតាមសេចក្ដីប្រកាសព័ត៌មានរបស់ក្រុមហ៊ុនធានារ៉ាប់រង ហ្វតតេ។

ក្នុងការវិនិយោគនេះ គឺជាផ្នែកមួយនៃតួនាទីដ៏ទូលំទូលាយរបស់ក្រុមហ៊ុន ហ្វតតេ ក្នុងនាមជាក្រុមហ៊ុនធានារ៉ាប់រងមួយនៅប្រទេសកម្ពុជាដែលការគ្រប់គ្រងទ្រព្យសម្បត្តិហិរញ្ញវត្ថុរយៈពេលវែងដោយការទទួលខុសត្រូវ គឺជាផ្នែកដ៏សំខាន់មួយក្នុងការកសាងភាពរឹងមាំផ្នែកហិរញ្ញវត្ថុប្រកបដោយចីរភាព។ តាមរយៈការវិនិយោគលើសញ្ញាបណ្ណចីរភាពមានបុគ្គលធានាដែលបានបោះផ្សាយក្នុងស្រុកនេះ ក្រុមហ៊ុន ហ្វតតេ ក៏កំពុងបង្ហាញផងដែរនូវទំនុកចិត្តយ៉ាងមុតមាំលើវិស័យហិរញ្ញវត្ថុរបស់កម្ពុជា និងការអភិវឌ្ឍជាបន្តបន្ទាប់របស់ខ្លួន។

សញ្ញាបណ្ណនេះ ក៏ផ្តល់ឱកាសឱ្យក្រុមហ៊ុន ហ្វតតេ ចូលរួមចំណែកដល់គំនិតផ្តួចផ្តើមបៃតង និងសង្គមដ៏មានអត្ថន័យដែលអាចបង្កើតផលប្រយោជន៍យូរអង្វែងដល់សហគមន៍ទូទាំងប្រទេស។ តាមរយៈការកៀរគរទុនវិនិយោគទៅកាន់គម្រោងដែលមានលទ្ធផលវិជ្ជមានលើបរិស្ថាន និងសង្គម ក្រុមហ៊ុន ហ្វតតេ កំពុងគាំទ្រដល់កិច្ចខិតខំប្រឹងប្រែងនានាដែលជំរុញកំណើនប្រកបដោយចីរភាព និងរួមចំណែកដល់អនាគតដ៏រឹងមាំ និងមានបរិយាបន្នសម្រាប់ប្រទេសកម្ពុជា។

បើតាមមន្រ្ដីគ្រប់គ្រងជាន់ខ្ពស់ដរបស់ក្រុមហ៊ុនធានារ៉ាប់រង ហ្វតតេ បានឱ្យដឹងថា សម្រាប់ការវិនិយោគនេះ កើតឡើងស្របពេលដែលស្ថានភាពហិរញ្ញវត្ថុរបស់ប្រទេសកម្ពុជាបន្តវិវត្តន៍រីកចម្រើន ក្នុងនោះទីផ្សារទុនបានបង្កើតឡើងនូវឱកាសថ្មីៗសម្រាប់ក្រុមហ៊ុននានាក្នុងការប្រមូលទុន និងសម្រាប់ស្ថាប័នវិនិយោគក្នុងការចូលរួមចំណែកដល់ការអភិវឌ្ឍសេដ្ឋកិច្ចរបស់ប្រទេស។ ការចូលរួមរបស់ក្រុមហ៊ុន ហ្វតតេ បានបន្ថែមទម្ងន់ដល់ប្រព័ន្ធអេកូឡូស៊ីដែលកំពុងរីកចម្រើន  គាំទ្រដល់ការកើតមានឡើងនូវទ្រព្យសកម្មហិរញ្ញវត្ថុថ្មីៗ និងឱកាសវិនិយោគដែលមានភាពសម្បូរបែបទូលំទូលាយ ជាងមុននៅក្នុងប្រទេសកម្ពុជា។

លោក Sergei Korol ប្រធាននាយកប្រតិបត្តិធានារ៉ាប់រង នៃ ហ្វតតេ គ្រុប បានគូសបញ្ជាក់ថា ក្នុងនាមជាក្រុមហ៊ុនធានារ៉ាប់រង ហ្វតតេ មានតួនាទីយ៉ាងសំខាន់ក្នុងការគាំទ្រដល់ការអភិវឌ្ឍប្រព័ន្ធហិរញ្ញវត្ថុរបស់កម្ពុជា។ លោកបានបញ្ជាក់បន្ថែមថា៖ «ការវិនិយោគរបស់យើងលើសញ្ញាបណ្ណចីរភាពមានបុគ្គលធានារបស់គ្រឹះស្ថាន អិលអូអិលស៊ី បានឆ្លុះបញ្ចាំងនូវទំនុកចិត្តរបស់យើងចំពោះសក្តានុពលសេដ្ឋកិច្ចរបស់កម្ពុជា និងការប្តេជ្ញាចិត្តរបស់យើងក្នុងការចូលរួមចំណែកដល់ការអភិវឌ្ឍទីផ្សារទុនឱ្យកាន់តែរឹងមាំ និងមានភាពចម្រុះ។ យើងជឿជាក់ថា ទីផ្សារសញ្ញាបណ្ណដែលមានសុខភាពល្អ គឺមានសារៈសំខាន់សម្រាប់ការអភិវឌ្ឍសេដ្ឋកិច្ចរយៈពេលវែងរបស់ប្រទេសកម្ពុជា។»

លោក Sergei Korol បានលើកឡើងផងដែរថា តាមរយៈការចូលរួមក្នុងនាមជាវិនិយោគិន ក្រុមហ៊ុន ហ្វតតេ  មិនត្រឹមតែគ្រប់គ្រងទ្រព្យសកម្មរបស់ខ្លួនដោយការទទួលខុសត្រូវប៉ុណ្ណោះទេ ប៉ុន្តែថែមទាំងគាំទ្រដល់កំណើននៃឱកាសផ្តល់ហិរញ្ញប្បទានប្រកបដោយចីរភាពសម្រាប់អាជីវកម្ម និងស្ថាប័ននានានៅក្នុងប្រទេសកម្ពុជាផងដែរ។

ជាមួយគ្នានេះដែរ លោក Sergei Korol  បានសង្កត់ធ្ងន់ថា៖ «ឆ្ពោះទៅមុខ ក្រុមហ៊ុន ហ្វតតេ មើលឃើញថាការអភិវឌ្ឍជាបន្តបន្ទាប់នៃទីផ្សារទុនរបស់ប្រទេសកម្ពុជា គឺជាផ្នែកដ៏សំខាន់មួយក្នុងការកសាងប្រព័ន្ធអេកូឡូស៊ីហិរញ្ញវត្ថុមួយដែលមានភាពធន់ជាងមុន។ តាមរយៈការវិនិយោគប្រកបដោយការទទួលខុសត្រូវ និងការប្តេជ្ញាចិត្តរយៈពេលវែង ក្រុមហ៊ុន ហ្វតតេ មានគោលបំណងរួមចំណែកដល់វឌ្ឍនភាពនេះ បន្តបំពេញតួនាទីស្នូលរបស់ខ្លួនក្នុងនាមជាក្រុមហ៊ុនធានារ៉ាប់រងគឺការការពារប្រជាជន អាជីវកម្មនិងសហគមន៍​ ​សម្រាប់អនាគត»៕

ដោយ៖ រិទ្ធី