AKP ព្រះសីហនុ ថ្ងៃទី១១ ខែកញ្ញា ឆ្នាំ២០២៦--កាលពីថ្ងៃទី៨ ខែកញ្ញា ឆ្នាំ២០២៦ កម្លាំងគណៈ បញ្ជាការឯកភាពរដ្ឋបាលក្រុងព្រះសីហនុ មានការសម្របសម្រួលនីតិវិធីពីតំណាងអយ្យការអមសាលាដំបូងខេត្តព្រះសីហនុ បានចុះធ្វើរដ្ឋបាលចំហទីតាំងផ្ទះល្វែងចំនួន០២ទីតាំង(ក្នុងប្លុកតែមួយ)បានរកឃើញសម្ភារ និងវត្ថុតាងជាឧបករណ៍អេឡិចត្រូនិច ជាប់ពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា (Online Scams)ព្រមទាំងរកឃើញជនបរទេសស្នាក់នៅគ្មានលិខិតឆ្លងដែនត្រឹមត្រូវ ស្ថិតនៅភូមិ៥ សង្កាត់ លេខ៤ ក្រុងព្រះសីហនុ ខេត្តព្រះសីហនុ។

ក្នុងកិច្ចប្រតិបត្តិការនេះ កម្លាំងជំនាញបានសម្រេចដកហូតវត្ថុតាងរួមមាន៖
-កុំព្យូទ័រ All-In-One ចំនួន ០៨គ្រឿង
-កុំព្យូទ័រយួរដៃ(Laptop) ចំនួន ០៣គ្រឿង
-ទូរស័ព្ទដៃសរុបចំនួន ៧៤គ្រឿង។

ក្នុងប្រតិបត្តិការនេះដែរ សមត្ថកិច្ចបានធ្វើការឃាត់ខ្លួនជនជាតិវៀតណាមចំនួន ០៧នាក់ (ប្រុស)។ ក្នុងនោះ (គ្មានលិខិតឆ្លងដែន និងឯកសារពាក់ព័ន្ធត្រឹមត្រូវចំនួន ០១នាក់)។

បច្ចុប្បន្នជនសង្ស័យចំនួន ០៧នាក់ រួមជាមួយវត្ថុតាង ត្រូវបានបញ្ជូនទៅកាន់ស្នងការដ្ឋាននគរបាលខេត្តព្រះសីហនុ ដើម្បីអនុវត្តនីតិវិធីបន្ត៕

ដោយ ងូ សុមុនី