AKP បាត់ដំបង ថ្ងៃទី១១ ខែកញ្ញា ឆ្នាំ២០២៦--ឯកឧត្តម សុខ លូ អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តបាត់ដំបងបានណែនាំដល់អាជ្ញាធរ និងសមត្ថកិច្ចបង្កើនការបង្រ្កាបគ្រឿងញៀន ក្មេងទំនើង ល្បែងស៊ីសង បទល្មើសនេសាទ និងបទល្មើសគ្រប់ប្រភេទឱ្យកាន់តែមានប្រសិទ្ធភាពបន្ថែមទៀត។ឯកឧត្តមជំរុញពន្លឿនការរៀបចំចរាចរណ៍ក្នុងក្រុងបាត់ដំបង សំដៅកាត់បន្ថយការកកស្ទះ និងរឹតបន្តឹងការអនុវត្តន៍ច្បាប់ចរាចរណ៍ផ្លូវគោកដើម្បីកាត់បន្ថយអត្រាគ្រោះថ្នាក់ចរាចរណ៍។

ឯកឧត្តមបានមានប្រសាសន៍ដូចនេះនៅពេលអញ្ជើញដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្តបាត់ដំបងប្រចាំខែសីហា ឆ្នាំ២០២៦ ដែលកិច្ចប្រជុំនេះធ្វើឡើងនៅសាលប្រជុំសាលាខេត្តបាត់ដំបង នៅថ្ងៃទី១១ ខែកញ្ញា ឆ្នាំ២០២៦។

ឯកឧត្តមបានក្រើនរំឭកដល់អាជ្ញាធរក្រុង ស្រុក ត្រូវខិតខំបន្តការរៀបចំសណ្ដាប់ធ្នាប់សាធារណៈ លុបបំបាត់សំណង់មិនរៀបរយ ហាមឃាត់ការសាងសង់សំណង់រឹងរំលោភលើដីសាធារណៈរបស់រដ្ឋ ។ អាជ្ញាធរក្រុង ស្រុកត្រូវបន្តយុទ្ធនាការផ្ទះមួយខ្នងដើមឈើមួយដើមដោយត្រូវបង្កើនការដាំដើមឈើនៅតាមទីប្រជុំជនដើម្បីលើកកម្ពស់សោភ័ណភាពបរិស្ថានបៃតង ជាពិសេសត្រូវថែទាំដើមឈើដែលបានដាំរួចឱ្យបានលូតលាស់ល្អ។ មន្ទីរ អង្គភាព ក្រុង-ស្រុក ចូលរួមអនុវត្តយុទ្ធនាការប្រយុទ្ធប្រឆាំងព័ត៌មានក្លែងក្លាយ ដោយចូលរួមផ្សាយរាល់ព័ត៌មានពិត មានប្រភពច្បាស់លាស់ របស់រដ្ឋាភិបាល និងប្រតិកម្មរហ័សលើព័ត៌មានក្លែងក្លាយ ដើម្បីលុបបំបាត់ព័ត៌មានបំពុលសង្គម។

ឯកឧត្តម អភិបាលខេត្ត ក៏បានជំរុញដល់អាជ្ញាធរក្រុង-ស្រុកត្រូវខិតខំផ្សព្វផ្សាយកៀរគរយុវជន ពិសេសយុវជនដែលមកពីគ្រួសារក្រីក្រ និងគ្រួសារងាយហានិភ័យ ឱ្យចូលរៀនជំនាញបច្ចេកទេសវិជ្ជាជីវៈ ដើម្បីមានជំនាញមួយច្បាស់លាស់ប្រចាំជីវិត មានការងារធ្វើសមរម្យ និងមានប្រាក់ចំណូលខ្ពស់ ខណៈខេត្តបាត់ដំបង មានវិទ្យាស្ថានសម្រាប់បណ្តុះបណ្តាលជំនាញបច្ចេកទេសរហូតដល់៣ទីតាំងដែលអាចទទួលសិស្សចូលរៀនបានជាច្រើននាក់ ៕

ដោយ ណយ នឿន (ប្រភព៖រដ្ឋបាលខេត្តបាត់ដំបង)