‎AKP ភ្នំពេញ ថ្ងៃទី១០ ខែកញ្ញា ឆ្នាំ២០២៦-- ឯកឧត្តម ពេជ្រ វាសនា អនុរដ្ឋលេខាធិការក្រសួងធនធានទឹក និងឧតុនិយម បានដឹកនាំប្រតិភូអន្តរក្រសួង អញ្ជើញចូលជួបសម្តែងការគួរសមជាមួយ ឯកឧត្តម YASUI TAKEHIRO អគ្គនាយកទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) នៅទីស្នាក់ការកណ្តាល JICA នៅទីក្រុងតូក្យូ ប្រទេសជប៉ុន នារសៀលថ្ងៃព្រហស្បតិ៍ ទី១០ ខែកញ្ញា ឆ្នាំ២០២៦។

ឯកឧត្តម ពេជ្រ វាសនា បាននាំយកនូវសេចក្តីថ្លែងអំណរគុណយ៉ាងជ្រាលជ្រៅពីសំណាក់ ឯកឧត្តមរដ្ឋមន្ដ្រី ថោ ជេដ្ឋា ជូនចំពោះ JICA ដែលតែងតែយកចិត្តទុកដាក់ និងគាំទ្រដល់ការអភិវឌ្ឍលើគ្រប់វិស័យនៅកម្ពុជា ពិសេស ការគាំទ្រលើការគ្រប់គ្រង និងការអភិវឌ្ឍវិស័យធនធានទឹក តាមរយៈជំនួយអភិវឌ្ឍន៍ផ្លូវការ (ODA) រួមមានការបញ្ជូនទីប្រឹក្សាបច្ចេកទេស ការអនុវត្តគម្រោងកិច្ចសហប្រតិបត្តិការបច្ចេកទេស និងគម្រោងឥណទានសម្បទានជាដើម។

ឯកឧត្តម YASUI TAKEHIRO អគ្គនាយក JICA បានសម្តែងនូវការកោតសរសើរ និងវាយតម្លៃខ្ពស់ចំពោះកិច្ចសហប្រតិបត្តិការយ៉ាងរលូន ក្នុងការគ្រប់គ្រង និងដំណើរការគម្រោងនានាដែលជាជំនួយរបស់ JICA កន្លងមក។ ជាមួយគ្នានេះ ឯកឧត្តមអគ្គនាយក ក៏បានសំណូមពរឱ្យភាគីពាក់ព័ន្ធបន្តពង្រឹងកិច្ចសហប្រតិបត្តិការដ៏ល្អប្រពៃនេះបន្ថែមទៀត សម្រាប់គម្រោងដែលកំពុងអនុវត្តនាពេលបច្ចុប្បន្ន ក៏ដូចជាគម្រោងនានា ពេលអនាគត៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)