AKP បន្ទាយមានជ័យ ថ្ងៃទី១០ ខែកញ្ញា ឆ្នាំ២០២៦ --ការយកចិត្តទុកដាក់ចំពោះសុខទុក្ខ និងជីវភាពរស់នៅរបស់ប្រជាពលរដ្ឋភៀសសឹកនៅតាម មូលដ្ឋាន បានបន្តបង្ហាញឱ្យឃើញតាមរយៈការនាំយកអំណោយដ៏ថ្លៃថ្លារបស់សម្តេចមហា បវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ចែកជូនដល់ ប្រជា ពលរដ្ឋភៀសសឹកជាង ៣.០០០គ្រួសារ ដែលកំពុងស្នាក់នៅក្នុងភូមិរង់ចាំ ឃុំស្លក្រាម ស្រុកស្វាយចេក ខេត្តបន្ទាយមានជ័យ។

នាព្រឹកថ្ងៃទី១០ ខែកញ្ញា ឆ្នាំ២០២៦ ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូ អមនាយក រដ្ឋមន្ត្រី អគ្គនាយកនៃអគ្គនាយក ដ្ឋានគយ និងរដ្ឋាករកម្ពុជា និងជាប្រធានសមាគមសង្គហមិត្ត មន្ត្រីរាជការនៃអគ្គនាយកដ្ឋានគយ និងរដ្ឋាករកម្ពុជា ដោយមានការអម ដំណើរពីឯកឧត្តម អ៊ុ រាត្រី អភិបាល នៃគណៈអភិបាលខេត្តបន្ទាយមានជ័យ ព្រមទាំងមន្ត្រីគយ និងរដ្ឋាករ បាននាំយក អំណោយរបស់សម្តេចមហាបវរធិបតី និងលោកជំទាវបណ្ឌិត ទៅប្រគល់ ជូនប្រជាពលរដ្ឋ ទាំង៦ភូមិ។

អំណោយដែលត្រូវបាននាំយកទៅចែកជូនរួមមាន គ្រឿងឧបភោគបរិភោគ សម្ភារប្រើប្រាស់ ប្រចាំថ្ងៃ និងថវិកាមួយចំនួន ដើម្បីជួយសម្រាលការលំបាក និងការចំណាយប្រចាំថ្ងៃរបស់បងប្អូន ប្រជាពលរដ្ឋដែលបានផ្លាស់ទីមកស្នាក់នៅទីតាំងសុវត្ថិភាព ក្នុងអំឡុងពេលប្រឈម នឹងស្ថានភាព លំបាកដោយសារសង្គ្រាមឈ្លានពាន ពីសំណាក់ភាគីថៃមកលើដែន អធិបតេយ្យភាពកម្ពុជា នាពេលកន្លងមកនេះ។

ក្នុងឱកាសនោះ ឯកឧត្តមបណ្ឌិត គុណ ញឹម បានពាំនាំប្រសាសន៍ផ្តាំផ្ញើ និងសួរសុខទុក្ខ ដោយក្តីនឹករលឹកពីសំណាក់ សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនចំពោះបងប្អូនប្រជាពលរដ្ឋ ភៀសសឹកទាំងអស់ ដោយបញ្ជាក់ថា សម្តេច និងលោកជំទាវ តែងតែយកចិត្តទុកដាក់ចំពោះសុខទុក្ខ សុវត្ថិភាព និងជីវភាពរស់នៅរបស់ ប្រជាពលរដ្ឋនៅគ្រប់ទីកន្លែង ជាពិសេសប្រជាពលរដ្ឋដែលកំពុងជួបការលំបាក ដោយសារការ ភៀសខ្លួន។

ឯកឧត្តមបានគូសបញ្ជាក់ថា ការផ្តល់ជំនួយមិនត្រឹមតែជាការសម្រាលបន្ទុកជីវភាពនៅ ក្នុងពេលមានការលំបាកប៉ុណ្ណោះទេ ប៉ុន្តែថែមទាំងជាការបង្ហាញពីការយកចិត្តទុកដាក់ និងការចែក រំលែកទុក្ខលំបាកជាមួយប្រជាពលរដ្ឋរបស់ថ្នាក់ដឹកនាំរាជរដ្ឋាភិបាល និងស្ថាប័នពាក់ព័ន្ធ។

ជាមួយគ្នានេះ ឯកឧត្តមបណ្ឌិត គុណ ញឹម ក៏បានក្រើនរំលឹកដល់បងប្អូនប្រជាពលរដ្ឋ ភៀសសឹកឱ្យបន្តយកចិត្តទុកដាក់ថែរក្សាសុខភាព អនុវត្តន៍អនាម័យ និងថែរក្សាសុវត្ថិភាព ក្នុងការរស់នៅ ព្រមទាំងជំរុញការប្រកបរបររកស៊ីតាមលទ្ធភាព ជាពិសេសការធ្វើកសិកម្ម ដាំដុះដំណាំ ចិញ្ចឹមសត្វ និងប្រកបអាជីវកម្មផ្សេងៗ ដើម្បីបង្កើនចំណូល និងពង្រឹងជីវភាពគ្រួសារ។
ដោយឡែក ឯកឧត្តម អ៊ុ រាត្រី អភិបាលខេត្តបន្ទាយមានជ័យ បានថ្លែងអំណរគុណយ៉ាង ជ្រាលជ្រៅចំពោះឯកឧត្តមបណ្ឌិត គុណ ញឹម និងសមាគមសង្គហមិត្តមន្ត្រីរាជការ នៃអគ្គនាយកដ្ឋានគយ និងរដ្ឋាករកម្ពុជា ដែលបាននាំយកអំណោយរបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត មកចែកជូនបងប្អូន ប្រជាពលរដ្ឋភៀសសឹកនៅភូមិរង់ចាំ។

ឯកឧត្តមអភិបាលខេត្តបានបញ្ជាក់ថា ការចូលរួមរបស់ស្ថាប័នរដ្ឋ និងសប្បុរសជននានា ក្នុងការជួយឧបត្ថម្ភប្រជាពលរដ្ឋភៀសសឹក គឺជាកម្លាំងចិត្តដ៏មានតម្លៃសម្រាប់បងប្អូន ប្រជាពលរដ្ឋដែលកំពុងប្រឈមនឹងការលំបាក ហើយក៏ជាការបង្ហាញពីស្មារតីសាមគ្គីភាព និងការចែករំលែកក្នុងសង្គមកម្ពុជាផងដែរ។

សម្រាប់ប្រជាពលរដ្ឋជាង ៣.០០០គ្រួសារ ក្នុង៦ភូមិ ការទទួលបានគ្រឿងឧបភោគបរិភោគ សម្ភារប្រើប្រាស់ និងថវិកានាពេលនេះ មិនត្រឹមតែជាជំនួយសម្រាប់ដោះស្រាយតម្រូវការ ជាក់ស្តែងប្រចាំថ្ងៃប៉ុណ្ណោះទេ ប៉ុន្តែថែមទាំងជាសារបញ្ជាក់ថា ពួកគាត់មិនត្រូវបានទុកឱ្យប្រឈម នឹងការលំបាកតែម្នាក់ឯងឡើយ ខណៈរាជរដ្ឋាភិបាល អាជ្ញាធរមូលដ្ឋាន និងស្ថាប័នពាក់ព័ន្ធ នៅតែបន្តយកចិត្តទុកដាក់ និងរួមគ្នាដោះស្រាយបញ្ហាប្រឈមរបស់ប្រជាពលរដ្ឋតាមលទ្ធភាព។

សកម្មភាពមនុស្សធម៌នេះ ក៏បានរួមចំណែកពង្រឹងកម្លាំងចិត្ត និងភាពកក់ក្តៅដល់ ប្រជាពលរដ្ឋភៀសសឹក ក្នុងដំណាក់កាលដែលពួកគាត់ត្រូវការការគាំពារ ការយកចិត្តទុកដាក់ និងការលើកទឹកចិត្តពីសង្គមជុំវិញខ្លួន៕

ដោយ ឈុន សារ៉ាត