AKP ភ្នំពេញ ថ្ងៃទី១០ ខែកញ្ញា ឆ្នាំ២០២៦ -- សហគមន៍កសិកម្មចំនួន២ នៅក្នុងខេត្តបន្ទាយមានជ័យ និងក្រុមបណ្តុំអាជីវកម្មចំនួន១ មកពីខេត្តបាត់ដំបង បានចុះកិច្ចសន្យាក្នុងការផលិត និងផ្គត់ផ្គង់ស្រូវសែនក្រអូប អនុវត្តស្តង់ដា SRP និងស្រូវចំណីក្នុងបរិមាណផលប្រមាណ ៧,២០២តោន ឱ្យទៅក្រុមហ៊ុនខ្មែរហ្វ៊ូតគ្រុប។

ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងពិធីចុះកិច្ចសន្យានេះធ្វើឡើងនារសៀលថ្ងៃទី០៩ ខែកញ្ញា ឆ្នាំ២០២៦ នៅលើផ្ទៃដីទំហំ ១.៩២៦,៥ហិកតា ដែលមានសមាជិកចូលរួមផលិតចំនួន ៤០៦គ្រួសារ។ ពិធីនេះដែរ ធ្វើឡើងក្រោមអធិបតីភាព ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ នៅមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ។

គួរបញ្ជាក់ថា ស្រូវសែនក្រអូប គឺជាពូជស្រូវស្រាល មិនប្រកាន់រដូវ ដែលបន្សុទ្ធ និងបញ្ចេញដោយវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា (កាឌី) នៃក្រសួងកសិកម្ម រុក្ខាប្រមាញ់ និងនេសាទ នៅចុងឆ្នាំ២០១៩។ ពូជស្រូវសែនក្រអូប០១ កម្ពុជាបានទទួលពានរង្វាន់មាសពីប្រទេសចិនជាបន្តបន្ទាប់ ដោយសារលក្ខណៈពិសេស ដូចជាក្លិនក្រអូប គុណភាពអង្ករល្អ វែងរលូន និងបាយទន់ឆ្ងាញ់ពិសារ។

នាកន្លងមក ក្រសួងកសិកម្ម រុក្ខាប្រមាញ់ និងនេសាទ ក៏បានលើកទឹកចិត្តប្រជាកសិករឱ្យងាកមកដាំពូជស្រូវសែនក្រអូប០១ ដោយសារពូជនេះផ្ដល់ទិន្នផលខ្ពស់ និងជាពិសេស វាមានតម្លៃខ្ពស់នៅលើទីផ្សារជាតិ និងអន្តរជាតិ៕

ដោយ៖ មករា