AKP ភ្នំពេញ ថ្ងៃទី៩ ខែកញ្ញា ឆ្នាំ២០២៦–លោកជំទាវ ប៊ុន វណ្ណឌី រដ្ឋលេខាធិការលេខាធិការ នៃលេខាធិដ្ឋានអាកាសចរណ៍ស៊ីវិល អនុប្រធានក្រុមការងារចលនាស្ត្រី នៃក្រុមការងារចុះមូលដ្ឋានក្រុងសំពៅពូន ខេត្តកណ្តាលបានគូសបញ្ជាក់ថា ជំងឺគ្រុនឈាមនៅតែជាបញ្ហាសុខភាពដែលទាមទារឱ្យយើងទាំងអស់គ្នាយកចិត្តទុកដាក់ និងចូលរួមបង្ការជាប្រចាំ ដោយការបង្ការ និងទប់ស្កាត់ជំងឺគ្រុនឈាមមិនមែនជាភារកិច្ចរបស់ក្រុមគ្រូពេទ្យ ឬអាជ្ញាធរមូលដ្ឋានតែប៉ុណ្ណោះទេ ប៉ុន្តែជាភារកិច្ចរួមរបស់ប្រជាពលរដ្ឋគ្រប់រូប គ្រប់គ្រួសារ និងសហគមន៍ទាំងមូល ដែលការបង្ការត្រូវចាប់ផ្តើមពីគេហដ្ឋានរបស់យើងផ្ទាល់ ដោយត្រូវសម្អាតបរិស្ថាន កុំទុកឱ្យមានទឹកដក់ បំបាត់ទីជម្រក និងប្រភពបន្តពូជមូស ព្រមទាំងរក្សាអនាម័យជាប្រចាំ។

ក្នុងពិធីប្រកាសបើកយុទ្ធនាការផ្សព្វផ្សាយ បង្ការ ទប់ស្កាត់ជំងឺគ្រុនឈាម និងលើកកម្ពស់ការថែទាំសុខភាពសហគមន៍នៅសង្កាត់ព្រែកស្ពឺ ក្រុងសំពៅពូន ខេត្តកណ្តាល ព្រឹកថ្ងៃទី៩ ខែកញ្ញា ឆ្នាំ២០២៦ លោក ជំទាវ ប៊ុន វណ្ណឌី មានប្រសាសន៍ថា យុទ្ធនាការនេះ ត្រូវបានរៀបចំឡើងក្នុងគោលបំណងផ្សព្វផ្សាយ និងលើកកម្ពស់ការយល់ដឹងរបស់ប្រជាពលរដ្ឋអំពីវិធានការបង្ការ និងទប់ស្កាត់ជំងឺគ្រុនឈាម ជំរុញការសម្អាតបរិស្ថាន បំបាត់ទឹកដក់ និងទីជម្រកបន្តពូជមូស ព្រមទាំងលើកកម្ពស់ការថែទាំសុខភាពក្នុងគ្រួសារ និងសហគមន៍ ក្រោមការគាំទ្រ និងការផ្តល់គោលការណ៍ពី ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុកលេខាធិការដ្ឋានអាកាសចរណ៍ស៊ីវិល និងជាប្រធានក្រុមការងារចុះមូលដ្ឋានក្រុងសំពៅពូន ដែលតែងតែយកចិត្តទុកដាក់ គាំទ្រ និងលើកទឹកចិត្តដល់ក្រុមការងារក្នុងការចូលរួមបម្រើប្រជាពលរដ្ឋ និងអនុវត្តសកម្មភាពដែលផ្តល់ផលប្រយោជន៍ជាក់ស្តែងដល់មូលដ្ឋាន និងសហគមន៍។ ជាមួយគ្នានេះ លោកជំទាវបានថ្លែងអំណរគុណចំពោះមន្ទីរពេទ្យកាល់ម៉ែត្រ ដែលបានបង្ហាញឆន្ទៈ និងផ្តល់ការគាំទ្រក្នុងការចូលរួមសហការជាមួយក្រុមការងារចុះមូលដ្ឋានក្រុងសំពៅពូន ក្នុងសកម្មភាពលើកកម្ពស់សុខភាពសហគមន៍នាពេលនេះ ដែលកិច្ចសហការនេះនឹងរួមចំណែកជាកម្លាំងបន្ថែមដ៏មានសារៈសំខាន់ សម្រាប់ការងារអប់រំ ផ្សព្វផ្សាយ និងការថែទាំសុខភាពជូនប្រជាពលរដ្ឋ។

ក្នុងឱកាសនេះ លោកជំទាវរដ្ឋលេខាធិការបានអំពាវនាវដល់បងប្អូនប្រជាពលរដ្ឋទាំង៥សង្កាត់ ក្នុងក្រុងសំពៅពូនសូមចូលរួមសម្អាតបរិស្ថាន បំបាត់ទឹកដក់ និងទីជម្រកបន្តពូជមូស ព្រមទាំងអនុវត្តវិធានការបង្ការ និងទប់ស្កាត់ជំងឺគ្រុនឈាមឱ្យបានជាប្រចាំ ហើយជួយផ្សព្វផ្សាយបន្តទៅតាមភូមិ និងសង្កាត់រៀងៗខ្លួន។

លោកជំទាវថែមទាំងបានគូសបញ្ជាក់ពីអត្ថន័យដ៏សំខាន់នៃយុទ្ធនាការនាថ្ងៃនេះថា ជាការប្រមូលផ្តុំកម្លាំង និងការចូលរួមពីគ្រប់ភាគី រួមមាន ក្រុមការងារ ក្រុមគ្រូពេទ្យ មណ្ឌលសុខភាព អាជ្ញាធរមូលដ្ឋាន មេភូមិ កងកម្លាំងមានសមត្ថកិច្ច ក្រុមយុវជន សិស្សកាកបាទក្រហម កាយរិទ្ធ ក្រុមសិល្បករ សិល្បការិនី ព្រមទាំងអ្នកពាក់ព័ន្ធនានា ដោយសូមឱ្យស្មារតីនៃការចូលរួមនាថ្ងៃនេះមិនបញ្ចប់ត្រឹមតែជាពិធីមួយថ្ងៃនេះនោះទេ ប៉ុន្តែសូមបន្តទៅជាសកម្មភាពជាក់ស្តែងនៅតាមមូលដ្ឋាន ដើម្បីធ្វើឱ្យបរិស្ថានរបស់យើងកាន់តែស្អាត ប្រជាពលរដ្ឋកាន់តែមានការយល់ដឹង និងសហគមន៍របស់យើងកាន់តែមានសុខភាពល្អ៕

ដោយ៖ ចាន់ សុភឿន