AKP ភ្នំពេញ ថ្ងៃទី៨ ខែកញ្ញា ឆ្នាំ២០២៦–ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាមានប្រសាសន៍ថា ទន្ទឹមនឹងមោទនភាព និងសមិទ្ធផលដែលសម្រេចបានរបស់ក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២-២០២៥ យើងក៏នៅមានបញ្ហាប្រឈម និងចំណុចខ្វះខាតដែលនៅសេសសល់សំខាន់ៗដែលត្រូវធ្វើការដោះស្រាយក្នុងនោះរួមមាន ធនធានថវិកានៅមានកម្រិត ការផ្ទេរថវិកាមិនទាន់ពេលវេលា ការផ្ទេរមុខងារនៅមិនទាន់ភ្ជាប់ពេញលេញជាមួយនឹងធនធាន និងសិទ្ធិសម្រេច សមត្ថភាពបច្ចេកទេសនៅមានកម្រិត ទទួលបន្ទុកនៃការងារស្មៀន និងបុគ្គលិកកើតឡើងជាប្រចាំ ការចូលរួមរបស់ប្រជាពលរដ្ឋនៅមិនទាន់បានទូលំទូលាយ ព្រមទាំងការសម្របសម្រួលតួនាទីរវាងរដ្ឋបាលថ្នាក់មូលដ្ឋាន និងស្ថាប័នជំនាញមួយចំនួននៅមិនទាន់មានភាពច្បាស់លាស់ស៊ីចង្វាក់គ្នាគ្រប់គ្រាន់នៅឡើយ។

ការលើកឡើងរបស់ប្រមុខក្រសួងមហាផ្ទៃដូចខាងលើនេះ ក្នុងឱកាសនៃការបិទសន្និបាតបូកសរុបសមិទ្ធផលការងាររបស់ក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២-២០២៥ នៅសណ្ឋាគាសុខា ព្រឹកថ្ងៃទី៨ ខែកញ្ញា ឆ្នាំ២០២៦ ក្រោយពីបានដំណើរការទៅអស់ រយៈពេល១ថ្ងៃកន្លះរួចមក ដោយឯកឧត្តមអភិសន្តិបណ្ឌិត ស សុខា បានបន្ថែមថា ជាមួយគ្នានេះ ការវាយតម្លៃបានបង្ហាញឱ្យឃើញថា ប្រព័ន្ធទិន្នន័យ និងរបាយការណ៍នាពេលកន្លងមកផ្ដោតលើភាគច្រើនទៅលើសកម្មភាព និងបរិមាណដែលបានអនុវត្តដូចជា ចំនួនគម្រោង ចំនួនសេវា ឬប្រវែងដែលបានសាងសង់ ខណៈទិន្នន័យលទ្ធផលនៃការផ្លាស់ប្ដូរ និងផលប្រយោជន៍ជាក់ស្ដែងរបស់ប្រជាពលរដ្ឋនៅមិនទាន់មានគ្រប់គ្រាន់។ ក្នុងន័យនេះ បើតាមប្រមុខក្រសួងមហាផ្ទៃថា ត្រូវបន្តផ្លាស់ប្ដូរវិធីការគ្រប់គ្រងផ្អែកលើផែនការសកម្មភាព និងធាតុចូលទៅជាការគ្រប់គ្រងផ្អែកលើលទ្ធផល និងផលប៉ះពាល់ដោយផ្ទាល់ ដោយមិនគិតត្រឹមតែសួរថាយើងបានធ្វើអ្វីខ្លះ ប៉ុន្តែយើងត្រូវសួរថា អ្វីដែលយើងធ្វើបាន បានធ្វើឱ្យជីវភាព និងគុណភាពរស់នៅរបស់ប្រជាពលរដ្ឋបានប្រសើរឡើងហើយឬនៅ ដែលការផ្លាស់ប្ដូរទស្សនវិស័យនេះ និងការមើលឃើញនេះនឹងជួយឱ្យមានការរៀបចំផែនការ បែងចែកធនធាន និងការអនុវត្តគម្រោង និងការវាយតម្លៃកាន់តែផ្ដោតលើប្រសិទ្ធភាព ប្រសិទ្ធផល គុណភាព និងផលប្រយោជន៍ជាក់ស្ដែងរបស់ប្រជាពលរដ្ឋ៕

ដោយ៖ ចាន់ សុភឿន