AKPភ្នំពេញថ្ងៃទី០៨ ខែកញ្ញា ឆ្នាំ ២០២៦– ឯកឧត្តមបណ្ឌិត ធន់ វឌ្ឍនា ប្រធានស្តីទីព្រឹទ្ធសភា បានជំរុញឱ្យបន្តត្រួតពិនិត្យវឌ្ឍនភាពការងារនីតិកម្ម លើកកម្ពស់ប្រសិទ្ធភាពនៃការអនុវត្តច្បាប់ និងលើកកម្ពស់ការអភិវឌ្ឍសង្គម និងសេដ្ឋកិច្ចជាតិឱ្យមានប្រសិទ្ធភាពឆ្លើយតបគោលដៅអភិវឌ្ឍន៍ជាតិ ឆ្នាំ២០៥០។ ការជំរុញរបស់ប្រធានស្តីទីព្រឹទ្ធសភាបែបនេះធ្វើឡើងក្នុងកិច្ចប្រជុំមួយកាលពីរសៀលថ្ងៃទី៧ ខែកញ្ញា ឆ្នាំ២០២៦ នៅវិមានព្រឹទ្ធសភា។

ក្នុងកិច្ចប្រជុំនេះ ឯកឧត្តមបណ្ឌិត បានសង្កត់ធ្ងន់លើការកំណត់ឱ្យបានច្បាស់លាស់នូវលិខិតបទដ្ឋានគតិយុត្តដែលមានស្រាប់ក្នុងការគាំទ្រការអនុវត្តច្បាប់ និងឯកសារដែលត្រូវបន្តជំរុញឱ្យធ្វើបន្ត ដូចជា អនុក្រឹត្យ ប្រកាសរបស់ក្រសួងសាមី ប្រកាសអន្តរក្រសួង និងលិខិតបទដ្ឋានគតិយុត្តផ្សេងទៀត ព្រមទាំងពិភាក្សាលើនីតិវិធីនៃការផ្ញើលិខិតផ្លូវការទៅកាន់ភាគីពាក់ព័ន្ធ ដើម្បីបង្កើនប្រសិទ្ធភាពការងារ និងធានាឱ្យបាននូវការឆ្លើយតបទាន់ពេលវេលា។

នាឱកាសនេះ ឯកឧត្តមបណ្ឌិត ធន់ វឌ្ឍនា បានគូសបញ្ជាក់ពីសារៈសំខាន់នៃការផ្សព្វផ្សាយព័ត៌មាន និងទំនាក់ទំនងសាធារណៈ ព្រមទាំងជំរុញឱ្យបង្កើនកិច្ចសហការជាមួយស្ថាប័នសារព័ត៌មានជាតិ និងអន្តរជាតិក្នុងការចូលរួមផ្តល់កិច្ចសម្ភាសន៍ ក៏ដូចជាសរសេរជាអត្ថបទផ្សាយក្នុងកាសែត និងទស្សនាវដ្តី ដើម្បីផ្សព្វផ្សាយព័ត៌មានពិតឱ្យទូលំទូលាយលើឆាកអន្តរជាតិ។ 

ឯកឧត្តមបណ្ឌិត បានកោតសរសើរចំពោះការចូលរួមយ៉ាងសកម្មរបស់សមាជិកព្រឹទ្ធសភា ព្រមទាំងបានយល់ស្របលើការរៀបចំយន្តការបន្តក្នុងការត្រួតពិនិត្យលិខិតបទដ្ឋានគតិយុត្តគាំទ្រច្បាប់ និងការបន្តដោះស្រាយរាល់កង្វល់បម្រើផលប្រយោជន៍ប្រជាពលរដ្ឋ ជាពិសេសកង្វល់ដែលលើកឡើងដោយសមាជិកក្រុមប្រឹក្សាឃុំ សង្កាត់៕

ដោយ៖ ចាន់ សុភឿន (ប្រភព៖ ព្រឹទ្ធសភា)