AKP បន្ទាយមានជ័យ ថ្ងៃទី០៧ ខែកញ្ញា ឆ្នាំ២០២៦--ដើមឈើមួយដើម អាចចាប់ផ្តើមពីការដាំដោយដៃមនុស្ស ប៉ុន្តែអត្ថប្រយោជន៍របស់វាអាចបន្តរីកសាយជាច្រើនឆ្នាំទៅមុខ។ ក្នុងស្មារតីចូលរួមលើកកម្ពស់បរិស្ថានបៃតង និងបង្កើតបរិយាកាសល្អប្រសើរសម្រាប់អ្នកជំងឺ និងប្រជាពលរដ្ឋដែលមកទទួលសេវាសុខាភិបាល នៅព្រឹកថ្ងៃទី០៧ ខែកញ្ញា ឆ្នាំ២០២៦ នេះ លោកវេជ្ជបណ្ឌិត អ៊ាវ តារាវុធ ប្រធានមន្ទីរពេទ្យបង្អែកសិរីសោភ័ណ បានដឹកនាំលោក លោកស្រី មន្ត្រីរាជការ បុគ្គលិក កម្មករ និងសិស្សកម្មសិក្សា នៃមន្ទីរពេទ្យ ចូលរួមដាំដើមឈើនៅជុំវិញបរិវេណ និងតាមបណ្តោយផ្លូវចូលមន្ទីរពេទ្យ។

សកម្មភាពនេះមិនត្រឹមតែជាការបង្កើនភាពបៃតងនៅក្នុងបរិវេណមន្ទីរពេទ្យប៉ុណ្ណោះទេ ប៉ុន្តែថែមទាំងបង្ហាញពីការយកចិត្តទុកដាក់របស់ថ្នាក់ដឹកនាំ និងក្រុមការងារមន្ទីរពេទ្យចំពោះបរិស្ថាន សោភ័ណភាព និងគុណភាពនៃកន្លែងផ្តល់សេវាសុខាភិបាល។ ដើមឈើដែលត្រូវបានដាំនៅជុំវិញមន្ទីរពេទ្យ នឹងក្លាយជាផ្នែកមួយនៃទេសភាពបៃតង ដែលជួយធ្វើឱ្យបរិយាកាសនៅក្នុងមន្ទីរពេទ្យកាន់តែមានភាពស្រស់ស្អាត ស្រស់ស្រាយ និងមានភាពទាក់ទាញ។

លោកវេជ្ជបណ្ឌិត អ៊ាវ តារាវុធ បានមានប្រសាសន៍ថា ការដាំដើមឈើនេះ មានគោលបំណងចូលរួមធ្វើឱ្យមន្ទីរពេទ្យមានសោភ័ណភាព និងបរិស្ថានល្អប្រសើរ។ ជាពិសេស វាជាការចូលរួមបង្កើតបរិយាកាសបៃតង ដែលអាចផ្តល់ភាពស្រស់ស្រាយដល់អ្នកជំងឺ អ្នកមកទទួលសេវា ក៏ដូចជាមន្ត្រី បុគ្គលិក និងអ្នកបំពេញការងារនៅក្នុងមន្ទីរពេទ្យផងដែរ។

ប្រធានមន្ទីរពេទ្យបង្អែកសិរីសោភ័ណ ក៏បានបញ្ជាក់ឱ្យឃើញថា ការថែរក្សាបរិស្ថាននៅក្នុងមន្ទីរពេទ្យ គឺជាផ្នែកមួយដែលមិនអាចមើលរំលងបាន។ មន្ទីរពេទ្យមិនមែនជាកន្លែងសម្រាប់ព្យាបាលជំងឺតែប៉ុណ្ណោះទេ ប៉ុន្តែគួរតែជាទីកន្លែងដែលមានអនាម័យ សណ្តាប់ធ្នាប់ សោភ័ណភាព និងបរិយាកាសល្អ ដើម្បីជួយបង្កើនភាពកក់ក្តៅ និងទំនុកចិត្តរបស់អ្នកជំងឺ និងក្រុមគ្រួសារ។

ការដាំដើមឈើនៅតាមផ្លូវចូល និងជុំវិញមន្ទីរពេទ្យ ក៏ជាសកម្មភាពមួយដែលបង្ហាញពីការចូលរួមជាក្រុម។ លោក លោកស្រី មន្ត្រីរាជការ បុគ្គលិក កម្មករ និងសិស្សកម្មសិក្សា បានរួមគ្នាធ្វើសកម្មភាពនេះដោយស្មារតីសហការគ្នា ដែលអាចចាត់ទុកថាជាការបណ្តុះស្មារតីស្រឡាញ់បរិស្ថាន និងការទទួលខុសត្រូវរួមចំពោះកន្លែងធ្វើការ និងសហគមន៍។ ដើមឈើដែលដាំនៅថ្ងៃនេះ ទោះបីនៅមានទំហំតូចក៏ដោយ ប៉ុន្តែប្រសិនបើទទួលបានការថែទាំ និងអភិរក្សបានល្អ វានឹងលូតលាស់ក្លាយជាម្លប់បៃតងនាពេលអនាគត។ ម្លប់ទាំងនោះមិនត្រឹមតែជួយលើកកម្ពស់សោភ័ណភាពបរិវេណមន្ទីរពេទ្យប៉ុណ្ណោះទេ ប៉ុន្តែអាចចូលរួមបង្កើតបរិយាកាសមានផាសុកភាព និងជួយកាត់បន្ថយភាពក្តៅនៅជុំវិញអគារ និងតំបន់សាធារណៈមួយចំនួនផងដែរ។

គួរបញ្ជាក់ថា ដើមឈើដែលបានយកមកដាំក្នុងសកម្មភាពនេះ ត្រូវបានផ្តល់ដោយ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ដែលជាការរួមចំណែកដ៏មានសារៈសំខាន់ក្នុងការលើកកម្ពស់បរិស្ថាន និងសោភ័ណភាពនៅក្នុងបរិវេណមន្ទីរពេទ្យបង្អែកសិរីសោភ័ណ។

ក្នុងឱកាសនេះ ក្នុងនាមថ្នាក់ដឹកនាំ មន្ត្រីរាជការ បុគ្គលិក និងកម្មករទាំងអស់ នៃមន្ទីរពេទ្យបង្អែកសិរីសោភ័ណ បានសម្តែងនូវការគោរព និងថ្លែងអំណរគុណយ៉ាងជ្រាលជ្រៅបំផុត ជូនចំពោះ ឯកឧត្តម អ៊ុំ រាត្រី និងលោកជំទាវ ព្រមទាំងក្រុមគ្រួសារ ចំពោះការផ្តល់ដើមឈើ និងការចូលរួមចំណែកក្នុងការកែលម្អបរិស្ថានមន្ទីរពេទ្យ។ ថ្នាក់ដឹកនាំ និងបុគ្គលិកមន្ទីរពេទ្យបង្អែកសិរីសោភ័ណ បានគោរពជូនពរ ឯកឧត្តម និងលោកជំទាវ ព្រមទាំងក្រុមគ្រួសារ សូមទទួលបានសុខភាពល្អបរិបូរណ៍ សុភមង្គល និងជោគជ័យលើគ្រប់ភារកិច្ច ដើម្បីបន្តរួមចំណែកបម្រើផលប្រយោជន៍សាធារណៈ និងការអភិវឌ្ឍមូលដ្ឋានឱ្យកាន់តែរីកចម្រើន។

សកម្មភាពដាំដើមឈើនៅមន្ទីរពេទ្យបង្អែកសិរីសោភ័ណនាពេលនេះ គឺជាសកម្មភាពតូចមួយ ប៉ុន្តែមានអត្ថន័យធំធេង ព្រោះវាបានបង្ហាញថា ការថែទាំសុខភាព និងការថែរក្សាបរិស្ថាន គឺអាចដើរទន្ទឹមគ្នាបាន។ នៅពេលបរិវេណមន្ទីរពេទ្យកាន់តែបៃតង ស្អាត និងមានសណ្តាប់ធ្នាប់ នោះក៏ជាផ្នែកមួយនៃការបង្កើតបរិយាកាសល្អសម្រាប់ការផ្តល់ និងទទួលសេវាសុខាភិបាល ដែលជាផលប្រយោជន៍សម្រាប់អ្នកជំងឺ បុគ្គលិក និងសហគមន៍ទាំងមូល៕

ដោយ៖ ឈុន សារ៉ាត