AKP ភ្នំពេញ ថ្ងៃទី៣ ខែកញ្ញា ឆ្នាំ២០២៦–លោកស្រី ទេស សុដាវី អនុប្រធាននាយកដ្ឋានរដ្ឋបាល ផែនការ និងសហប្រតិបត្តិការ នៅថ្ងៃទី០២ ខែកញ្ញា ឆ្នាំ២០២៦ បានដឹកនាំក្រុមការងារយេនឌ័ររបស់អាជ្ញាធរទន្លេសាប ចុះប្រជុំផ្សព្វផ្សាយ ស្តីពី“ការចូលរួមយេនឌ័រក្នុងការអភិរក្សធនធានជលផល និងបរិស្ថាន” នៅក្នុងតំបន់បឹងទន្លេសាប ស្ថិតនៅស្រុកកំពង់ត្រឡាច ខេត្តកំពង់ឆ្នាំង ។

លោកស្រី ទេស សុដាវី បានលើកឡើងថា ក្រុមការងារចុះផ្សព្វផ្សាយមានគោលបំណងចំនួន ៥គឺ ទី១ ការប្រជុំផ្សព្វផ្សាយពីសារៈសំខាន់ធនធានធម្មជាតិបឹងទន្លេសាប ទី២ ការបង្ហាញទស្សនៈយេនឌ័រ និងសិទ្ធិចូលរួមរាល់កិច្ចការសង្គម ការរួមបញ្ចូល GEDSI ក្នុងការអភិរក្សធនធានជលផល និងបរិស្ថាន ដោយសមភាព និងសមធម៌ ទី៣ ការបង្កើនការយល់ដឹងពីសហគមន៍អំពីតួនាទីស្ត្រី និងបរិយាបន្នសង្គម ទី៤ ការជំរុញការចូលរួមសកម្មពីគ្រប់ភាគី ដើម្បីគ្រប់គ្រងធនធានជលផល និងបរិស្ថានប្រកបដោយប្រសិទ្ធភា និងទី៥ ការបង្កើនការយល់ដឹងពីផលប៉ះពាល់អាកាសធាតុ និងធនធានធម្មជាតិនៅតំបន់បឹងទន្លេសាប ។

សូមជម្រាបជូនថា សកម្មភាពនេះ បានជួយលើកកម្ពស់ការយល់ដឹងពីសមភាព សមធម៌យេនឌ័រ និងសិទ្ធិរបស់ស្ត្រី និងបរិយាបន្នសង្គម ក្នុងការចូលរួមការពារ និងគ្រប់គ្រងធនធានធម្មជាតិ ដ៏សំខាន់ក្នុងការធានានិរន្តរភាពនៃធនធានជលផល និងបរិស្ថាននៅតំបន់បឹងទន្លេសាប ៕

ដោយ៖ ណយ នឿន (ប្រភព៖អាជ្ញាធរទន្លេសាប)