AKP បន្ទាយមានជ័យ ថ្ងៃទី២ ខែកញ្ញា ឆ្នាំ២០២៦--ដើម្បីការពារ និងអភិរក្សធនធានមច្ឆាជាតិឱ្យបានគង់វង្សក្នុងរដូវត្រីពងកូន អាជ្ញាធរខេត្តបន្ទាយមានជ័យ បានបើកប្រតិបត្តិការចុះល្បាត និងបង្ក្រាបបទល្មើសនេសាទយ៉ាងក្តៅគគុក នៅផ្ទៃទឹកនៃអាងទឹកត្រពាំងថ្ម    ព្រមទាំងបានអំពាវនាវយ៉ាងទទូចដល់បងប្អូនប្រជាពលរដ្ឋឱ្យឈប់ប្រើប្រាស់ឧបករណ៍នេសាទខុសច្បាប់គ្រប់ប្រភេទ។

ប្រតិបត្តិការចុះល្បាតផ្ទាល់នៅលើផ្ទៃទឹកនា «អាងទឹកត្រពាំងថ្ម» នេះ បានធ្វើឡើងនារសៀលថ្ងៃទី១ ខែកញ្ញា ឆ្នាំ២០២៦ ដោយមានការដឹកនាំពី លោក ឃ្លោក នួយ អភិបាលរងខេត្តបន្ទាយមានជ័យ តំណាង ឯកឧត្តម អ៊ុំ រាត្រី អភិបាលនៃគណៈអភិបាលខេត្ត ដោយមានការអមដំណើរពី លោក ហី រីហាំង អភិបាលរងស្រុក និងជាប្រធានគណៈកម្មការទប់ស្កាត់បង្ក្រាបបទល្មើសធនធានធម្មជាតិអាងត្រពាំងថ្ម ព្រមទាំងកម្លាំងចម្រុះសរុប ១១នាក់ ដោយប្រើប្រាស់មធ្យោបាយទូកស្មាច់ចំនួន ២គ្រឿង។

ក្នុងឱកាសចុះពិនិត្យស្ថានភាពជាក់ស្តែងនោះ លោក ឃ្លោក នួយ បានថ្លែងអំពាវនាវយ៉ាងទទូចដល់បងប្អូននេសាទ និងប្រជាពលរដ្ឋក្នុងមូលដ្ឋានឱ្យភ្ញាក់រលឹក និងបញ្ឈប់ជាបន្ទាន់នូវការប្រើប្រាស់ឧបករណ៍នេសាទដែលច្បាប់ហាមឃាត់ នៅក្នុងអាងទឹកត្រពាំងថ្ម ក៏ដូចជាតំបន់ទឹកលិចផ្សេងៗទៀត។ លោកបានគូសបញ្ជាក់ថា រដូវនេះជារដូវបិទនេសាទ និងជាពេលវេលាយ៉ាងសំខាន់សម្រាប់សត្វត្រីពងកូន និងបន្តពូជ ដូច្នេះការចូលរួមថែរក្សាមច្ឆាជាតិនៅពេលនេះ គឺជាការធានានូវប្រភពស្បៀងអាហារ និងជីវភាពរស់នៅដ៏ប្រកបដោយចីរភាពសម្រាប់កូនចៅជំនាន់ក្រោយ។ 

ជាមួយគ្នានេះ លោកអភិបាលរងខេត្ត ក៏បានដាក់បទបញ្ជា និងព្រមានធ្ងន់ៗដល់ជនល្មើសទាំងឡាយណាដែលនៅតែជំពាក់ជំពិននឹងអំពើខុសច្បាប់នេះថា អាជ្ញាធរនឹងអនុវត្តន៍វិធានការច្បាប់យ៉ាងម៉ឺងម៉ាត់បំផុត ដោយគ្មានការលើកលែងឡើយ។

ជាលទ្ធផល នៅក្នុងបេសកកម្មចុះល្បាតចម្រុះនាថ្ងៃដដែលនោះ កម្លាំងជំនាញបានស្រាវជ្រាវ និងប្រមូលវត្ថុតាងឧបករណ៍នេសាទខុសច្បាប់ជាច្រើនប្រភេទ ដែលជនខិលខូចបានលួចដាក់ក្នុងអាងរួមមាន អ៊ុយចំនួន ៨១ស្បៃមុង ប្រវែងសរុប ១.៨០០ម៉ែត្រ លបកែច្នៃចំនួន ២៥បង្គោលអ៊ុយ ចំនួន ១០២ដើម។ ដើម្បីបង្ហាញពីឆន្ទៈយ៉ាងមុតមាំក្នុងការប្រឆាំងបទល្មើសធនធានធម្មជាតិ ឧបករណ៍នេសាទខុសច្បាប់ដែលត្រូវបានបង្ក្រាប និងរឹបអូសបានទាំងអស់នេះត្រូវបាន លោកអភិបាលរងខេត្ត រួមជាមួយកម្លាំងចម្រុះ រៀបចំដុតបំផ្លាញចោលភ្លាមៗនៅនឹងកន្លែង នៅលើខ្នងទំនប់អាងស្ពានទី១។

អាជ្ញាធរខេត្តបន្ទាយមានជ័យ នៅតែបន្តអំពាវនាវឱ្យប្រជាពលរដ្ឋចូលរួមធ្វើជាភ្នែកជាច្រមុះ និងរាយការណ៍ជាបន្ទាន់មកអាជ្ញាធរមូលដ្ឋាន ប្រសិនបើប្រទះឃើញសកម្មភាពនេសាទខុសច្បាប់ ដើម្បីរួមគ្នារក្សាអាងទឹកត្រពាំងថ្ម ឱ្យក្លាយជាជម្រកមច្ឆាជាតិ និងជាតំបន់អភិរក្សប្រកបដោយសមាសភាពជីវៈចម្រុះដ៏សសម្បូរបែប៕

ដោយ ឈុន សារ៉ាត