AKPបន្ទាយមានជ័យថ្ងៃទី៣១ខែសីហាឆ្នាំ២០២៦--ការកែលម្អ និងអភិវឌ្ឍហេដ្ឋារចនាសម្ព័ន្ធនៅតាមមូលដ្ឋាន ជាពិសេសផ្លូវថ្នល់ ដែលជាតម្រូវការចាំបាច់ប្រចាំថ្ងៃរបស់ប្រជាពលរដ្ឋ គឺជាកត្តាសំខាន់មួយក្នុងការលើកកម្ពស់ជីវភាព និងសម្រួលដល់ការធ្វើដំណើរ ស្របតាមទិសដៅអភិវឌ្ឍរបស់រាជរដ្ឋាភិបាល។ ជាក់ស្តែង ផ្លូវបេតុងមួយខ្សែមានប្រវែងជាង ២០០ម៉ែត្រ នៅក្នុងភូមិណាំតៅ ឃុំណាំតៅ ស្រុកភ្នំស្រុក ខេត្តបន្ទាយ មានជ័យ ត្រូវបានដាក់ឱ្យប្រើប្រាស់ជាផ្លូវការហើយ ដើម្បីបម្រើផលប្រយោជន៍ជូនប្រជាពលរដ្ឋ និងសិស្សានុសិស្សក្នុងមូលដ្ឋាន។

ថ្លែងក្នុងពិធីសម្ពោធ និងកាត់ខ្សែបូដាក់ឱ្យប្រើប្រាស់ផ្លូវបេតុងជាផ្លូវការកាលពីថ្ងៃទី៣០ ខែសីហា ឆ្នាំ២០២៦ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ បានគូសបញ្ជាក់ពីសារៈសំខាន់នៃសមិទ្ធផលហេដ្ឋារចនាសម្ព័ន្ធនេះ ដោយចាត់ទុកថា ផ្លូវបេតុងដែលបានសាងសង់រួច គឺជាចំណងដៃថ្មីមួយសម្រាប់ប្រជាពលរដ្ឋ និងជាផ្នែកមួយនៃការរួមចំណែកលើកកម្ពស់ការអភិវឌ្ឍនៅមូលដ្ឋាន។    

ឯកឧត្តមអភិបាលខេត្តបានលើកឡើងថា ការសាងសង់ផ្លូវមិនមែនគ្រាន់តែជាការផ្តល់មធ្យោបាយធ្វើដំណើរប៉ុណ្ណោះ ទេ ប៉ុន្តែជាការបង្កើតលក្ខខណ្ឌអំណោយផលសម្រាប់ប្រជាពលរដ្ឋក្នុងការរស់នៅ ប្រកបរបររកស៊ី និងការទទួលបានសេវាសាធារណៈនានា ក៏ដូចជាការផ្តល់ភាពងាយស្រួលដល់កុមារ និងយុវជនក្នុងការធ្វើដំណើរទៅសាលារៀន។

ផ្លូវបេតុងប្រវែងជាង ២០០ម៉ែត្រនេះ ក៏មានសារៈសំខាន់ជាពិសេសចំពោះសិស្សានុសិស្សក្នុងមូលដ្ឋាន ព្រោះផ្លូវដែលមានសភាពល្អជួយឱ្យការធ្វើដំណើរទៅសិក្សារៀនសូត្រកាន់តែងាយស្រួល សុវត្ថិភាព និងចំណេញ ពេលវេលា។ ក្នុងន័យនេះ សមិទ្ធផលផ្លូវមួយខ្សែ អាចត្រូវបានចាត់ទុកថា ជាការវិនិយោគមួយដែលផ្តល់ផលប្រយោជន៍ទាំងក្នុងពេលបច្ចុប្បន្ន និងរយៈពេលវែងដល់សហគមន៍។

ឯកឧត្តម អ៊ុំ រាត្រី ក៏បានសង្កត់ធ្ងន់លើការចូលរួមរបស់ប្រជាពលរដ្ឋក្នុងការថែរក្សាសមិទ្ធផលដែលបានកើតឡើងនៅក្នុងមូលដ្ឋាន ដោយសារផ្លូវថ្នល់ និងហេដ្ឋារចនាសម្ព័ន្ធសាធារណៈ គឺជាទ្រព្យសម្បត្តិរួមដែលត្រូវការការចូលរួមថែរក្សាពីគ្រប់ភាគី ដើម្បីធានាឱ្យអាចប្រើប្រាស់បានយូរអង្វែង និងបន្តផ្តល់ប្រយោជន៍ដល់សហគមន៍។

ជាមួយគ្នានេះ ការដាក់ឱ្យប្រើប្រាស់ផ្លូវបេតុងថ្មី ក៏បានបង្ហាញពីការយកចិត្តទុកដាក់របស់អាជ្ញាធរមូលដ្ឋានក្នុងការឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ។ ការមានផ្លូវធ្វើដំណើ រដែលមានគុណភាព នឹងជួយសម្រួលដល់ការចេញចូលរបស់ប្រជាពលរដ្ឋ ការដឹកជញ្ជូនកសិផល និងការតភ្ជាប់ពីតំបន់លំនៅឋានទៅកាន់ទីប្រជុំជន សាលារៀន និងសេវាសាធារណៈនានា។ 

ពិធីនេះក៏ជាឱកាសបង្ហាញពីភាពសប្បា យរីករាយ និងការគាំទ្ររបស់ប្រជាព លរដ្ឋចំពោះសមិទ្ធផលថ្មីដែលកើតមានក្នុងមូលដ្ឋាន ខណៈផ្លូវថ្មីនេះត្រូវបានរំពឹងថា នឹងក្លាយជាផ្នែកមួយជួយលើកកម្ពស់សោភ័ណភាពភូមិឃុំ និងបង្កើនភាពងាយស្រួលក្នុងការរស់នៅរបស់ប្រជាពលរដ្ឋ។

ការដាក់ឱ្យប្រើប្រាស់ផ្លូវបេតុងថ្មីនេះ មិនត្រឹមតែជាសមិទ្ធផលផ្នែករូបវន្តមួយនៅក្នុងភូមិណាំតៅប៉ុណ្ណោះទេ ប៉ុន្តែថែមទាំងជាចំណងដៃដែលឆ្លើយតបនឹងតម្រូវការប្រចាំថ្ងៃរបស់ប្រជាពលរដ្ឋ និងជួយបង្កើតបរិយាកាសកាន់តែប្រសើរសម្រាប់កុមារ និងសិស្សានុសិស្សក្នុងការធ្វើដំណើរទៅសិក្សា។

សមិទ្ធផលនេះក៏ជាការឆ្លុះបញ្ចាំងឱ្យឃើញថា ការអភិវឌ្ឍពីមូលដ្ឋាន គឺជាកម្លាំងជំរុញដ៏សំខាន់មួយសម្រាប់ការលើកកម្ពស់គុណភាពជីវិតរបស់ប្រជាពលរដ្ឋ ខណៈការបន្តពង្រឹងហេដ្ឋារចនាសម្ព័ន្ធនានា នឹងកាន់តែជួយឱ្យមូលដ្ឋានមានការតភ្ជាប់ល្អប្រសើរ និងមានសក្តានុពលក្នុងការអភិវឌ្ឍប្រកបដោយចីរភាព៕

ដោយ៖ ឈុនសារ៉ាត