AKP សៀមរាប ថ្ងៃទី២៦ ខែសីហា ឆ្នាំ២០២៦ — ឯកឧត្តម អ្នកឧកញ៉ា សៀង ណាំ អ្នកតំណាងរាស្ត្រមណ្ឌលសៀមរាប បានលើកឡើងថា ការកសាងហេដ្ឋារចនាសម្ព័ន្ធក្នុងវត្តអារាម គឺជាកិច្ចការដ៏មានសារៈសំខាន់មួយ ក្នុងការទ្រទ្រង់ព្រះពុទ្ធសាសនា ព្រមទាំងផ្តល់ផលប្រយោជន៍ដល់សង្គមជាតិ និងប្រជាពលរដ្ឋទូទៅ។

ការលើកឡើងរបស់ឯកឧត្តមបែបនេះ បានធ្វើឡើងក្នុងពិធីបុណ្យផ្កាប្រាក់សាមគ្គី និងពិធីបុកគ្រឹះសាងសង់ខ្លោងទ្វារវត្តប្រាសាទគោកចក ស្ថិតនៅសង្កាត់គោកចក ក្រុងសៀមរាប នាព្រឹកថ្ងៃទី២៦ ខែសីហា ឆ្នាំ២០២៦ ក្រោមការផ្ដួចផ្ដើមរបស់ព្រះគ្រូវិចិត្រវង្សា ហែម គឹមសាន ព្រះគ្រូចៅអធិការវត្ត រួមជាមួយព្រះសង្ឃ អាចារ្យ គណៈកម្មការ អាជ្ញាធរមូលដ្ឋាន និងពុទ្ធបរិស័ទជិតឆ្ងាយ។

ឯកឧត្តម សៀង ណាំ បានមានប្រសាសន៍ថា វិស័យពុទ្ធសាសនា និងអាណាចក្រត្រូវដើរទន្ទឹមគ្នា។ ការរួមដៃគ្នារបស់បងប្អូនពុទ្ធបរិស័ទក្នុងការប្រមូលបច្ច័យកសាងខ្លោងទ្វារវត្តប្រាសាទគោកចកនាពេលនេះ គឺបង្ហាញពីកម្លាំងសាមគ្គីភាពយ៉ាងរឹងមាំ និងសទ្ធាជ្រះថ្លាចំពោះព្រះពុទ្ធសាសនា។ ខ្លោងទ្វារវត្តថ្មីនេះ មិនត្រឹមតែជាសមិទ្ធផលរូបវន្ត និងជាមុខមាត់របស់វត្តប៉ុណ្ណោះទេ ប៉ុន្តែក៏ជាការចូលរួមចំណែកថែរក្សាអត្តសញ្ញាណ វប្បធម៌ និងសោភ័ណភាពដូនតានៅក្នុងទឹកដីប្រវត្តិសាស្ត្រអង្គររបស់យើងផងដែរ។ ឯកឧត្តម បានកោតសរសើរ និងថ្លែងអំណរគុណយ៉ាងជ្រាលជ្រៅចំពោះទឹកចិត្តសប្បុរសធម៌របស់បងប្អូនទាំងអស់គ្នា។

ជាមួយគ្នានេះ ឯកឧត្តមក៏បានអំពាវនាវដល់ពុទ្ធបរិស័ទ និងប្រជាពលរដ្ឋទាំងអស់ ឱ្យចូលរួមថែរក្សាសមិទ្ធផលនានាដែលបានកសាងឡើង និងបន្តពង្រឹងសាមគ្គីភាពក្នុងសហគមន៍ ដើម្បីរក្សាបាននូវសុខសន្តិភាពនិងការអភិវឌ្ឍប្រកបដោយចីរភាព។

ព្រះគ្រូវិចិត្រវង្សា ហែម គឹមសាន មានថេរដីកាថា ខ្លោងទ្វារវត្តប្រាសាទគោកចក ដែលគ្រោងសាងសង់នេះ មានទទឹង ១០,៥០ម៉ែត្រ និងកម្ពស់ ១១,៥០ម៉ែត្រ ដោយគ្រោងចំណាយថវិកាសរុបប្រមាណ ៣៦.០០០ដុល្លារអាម៉េរិក។ ព្រះអង្គបានបញ្ជាក់ថា ពិធីបុណ្យផ្កាប្រាក់សាមគ្គី គឺជាការប្រមូលផ្តុំកម្លាំងសទ្ធាពីពុទ្ធបរិស័ទគ្រប់មជ្ឈដ្ឋាន ដើម្បីរួមចំណែកកសាងសមិទ្ធផលសម្រាប់ព្រះពុទ្ធសាសនា និងសង្គមជាតិ៕

ដោយ៖ ឃុត សៅ