AKP កណ្ដាល ថ្ងៃទី២៦ ខែសីហា ឆ្នាំ២០២៦-- រដ្ឋបាលខេត្តកណ្ដាល នៅថ្ងៃទី២៦ ខែសីហា ឆ្នាំ២០២៦ បានរៀបចំពិធីលែងកូនត្រី ត្រីមេពូជ និងកូនបង្កង អបអរសាទរទិវាមច្ឆាជាតិ ០១កក្កដា ឆ្នាំ២០២៦ ក្រោមអធិបតីភាពឯកឧត្តម ណៅ ធួក សមាជិករដ្ឋសភា នៃព្រះរាជាណាចក្រកម្ពុជា ដោយពិធីនេះបានប្រារព្ធធ្វើនៅបរិវេណវត្តកោះខ្នុរ ឃុំព្រែករកា ស្រុកកណ្តាលស្ទឹង ខេត្តកណ្តាល។

លោក ហេង សុភារិទ្ធិ នាយខណ្ឌរដ្ឋបាលជលផលកណ្តាល បានឱ្យដឹងថា កម្មវិធីថ្ងៃនេះនឹងលែងកូនត្រី និងកូនបង្កង ក្នុងនោះកូនត្រី ចំនួន ២០០ ០០០ កូន ត្រីគល់រាំង ចំនួន ០២ ក្បាល ត្រីរាជ ចំនួន០៣ ក្បាល ទម្ងន់ក្នុងមួយក្បាល ០៥ គីឡូក្រាម ត្រីមេពូជចម្រុះ ៣០គីឡូក្រាម និងកូនបង្កង ចំនួន ៣០ ០០០ កូន ដើម្បីបង្កើនផលស្តុកនៅក្នុងធម្មជាតិឱ្យកាន់តែសម្បូរណ៍ឡើងថែមទៀត សម្រាបប្រើប្រាស់ក្នុងសហគមន៍មូលដ្ឋាន។

ក្នុងពិធីនេះក៏មានការអញ្ជើញចូលរួមពីឯកឧត្តម នូ សាខន ប្រធានក្រុមប្រឹក្សាខេត្តកណ្តាល និងឯកឧត្តម គួច ចំរើន អភិបាលខេត្តកណ្តាល និងមន្រ្តីនៃមន្ទីរ អង្គភាពជុំវិញខេត្តជាច្រើនរូបទៀត៕

ដោយ ណយ នឿន (ប្រភព៖ រដ្ឋបាលខេត្តកណ្តាល)